“Praktiki olaraq bu iş başlanıb, amma bizim istədiyimiz kimi rəvan getmir”. Bu barədə Prezident İlham Əliyev və Qazaxıstan Prezidenti Kasım-Jomart Tokayevlə mətbuata bəyanatında bildirib.
Ölkə başçısının sözlərinə görə, biz Azərbaycan ilə Ermənistan arasında münasibətlərin normallaşması əzmindəyik: “İkinci Qarabağ müharibəsi başa çatandan sonra məhz Azərbaycan sülh müqaviləsi üzərində işə başlamağı təklif etdi. Praktiki olaraq bu iş başlanıb, amma bizim istədiyimiz kimi rəvan getmir. Lakin bunun alternativi yoxdur. Hətta 30 illik işğala və Azərbaycan xalqının məruz qaldığı məhrumiyyətlərə, hazırda bərpa etməli olduğumuz dağıntılara baxmayaraq, qonşular arasında münasibətlər normal olmalıdır. Bununla belə, biz gələcəyə baxırıq və hesab edirik ki, suverenlik, ərazi bütövlüyü, sərhədlərin toxunulmazlığı, BMT-nin Nizamnaməsi, beynəlxalq hüququn bütün əsas normaları və prinsipləri əsasında sülh müqaviləsinə nail olmaq mümkündür, bu müqavilə çoxillik düşmənçilik səhifəsini çevirəcək”.
“Ermənistanın 44 günlük müharibənin nəticələrini dəyişməsi üçün nə siyasi, nə də hərbi resursları yoxdur”
Məsələyə münasibət bildirən Yeni Yol Partiyasının sədri Ramil Hüseynovun fikrincə, Ermənistanın mövcud reallıqlarla barışmaqdan başqa alternativi yoxdur: “Bəli, reallıq ondan ibarətdir ki, Ermənistan hakimiyyəti bütün vasitələrlə prosesləri uzatmaq yolunu tutub. Delimitasiya prosesini uzadır, Qarabağda yerləşən ordu birləşmələrini oradan çıxarmır, Zəngəzur dəhlizinin açılmasına mane olurlar və s. Axmaqcasına ümid edirlər ki, geosiyasi vəziyyət dəyişəcək və bu zaman Ermənistan təşəbbüsü yenidən ələ alacaq. Halbuki, bu, mümkün olan iş deyil. Ermənistanın 44 günlük müharibənin nəticələrini dəyişməsi üçün nə siyasi, nə də hərbi resursları yoxdur. Bunu özləri də yaxşı bilirlər. Ancaq əfsuslar olsun ki, həyasızcasına prosesi uzatmaq yolunu tutublar. Baş nazir Nikol Paşinyan sözdə sülhlə bağlı ümumi müsbət mesajlar verir, amma əməldə bununla bağlı konkret addımlar atmır. Halbuki, 10 noyabr razılaşmasından sonra Azərbaycan Ordusu bir neçə uğurlu lokal hərbi əməliyyatlar keçirib. Nəticədə ordumuzun Qarabağa nəzarət arealı daha da genişlənib. Bəzən deyirlər ki, guya Paşinyan Ermənistandakı revanşist qüvvələrdən çəkindiyi üçün sülh danışıqlarında praktiki addımlar atmır. Ancaq hesab edirəm ki, bu, yanaşma doğru deyil. Ona görə doğru deyil ki, Ermənistanda revanşist qüvvələrin sosial bazası zəifdir. Üstəlik, erməni ictimai rəyində müxalif qüvvələr, xüsusən də parlament müxalifəti Rusiyanın maşası hesab olunur. Problem ondadır ki, Paşinyan hakimiyyəti Avropa İttifaqı timsalında Fransanı regiona dəvət etməklə prosesləri tormozlayır. Bəzi müstəqil erməni politoloqları da etiraf edirlər ki, sərhəddə fəaliyyət göstərən Aİ monitorinq missiyasının yarısı kəşfiyyatçılardan ibarətdir. Çünki Fransa sülh sazişinin tezliklə imzalanmasını istəmir. Fransada hesab edirlər ki, Rusiyanın Ukrayna bataqlığında çabalaması bu ölkənin Ermənistandakı varlığına son qoyacaq. Nəticədə yaranan boşluğu Fransa dolduracaq. Ermənistanın sülh prosesini tormozlaması həm də bununla bağlıdır. Ancaq bunların heç biri mövcud reallıqları dəyişə bilməyəcək. Ermənistanın inkişafı Azərbaycanla sülh sazişi imzalamaqdan keçir”.
Vidadi ORDAHALLI
