Aprelin 7-də Qarabağın sülhməramlıların nəzarətində olan hissəsində ermənilər aksiya keçirməyə cəhd ediblər. Belə ki, Xankəndidən Şuşaya gedən yolun başlanğıcına qədər yürüş edərək Azərbaycan əleyhinə fikirlər səsləndiriblər. Ancaq sözügedən aksiya uğursuz olub.
Bu aksiya ilə ermənilər öz aləmlərində dünyanın diqqətini Qarabağın “blokadasına” çəkmək istəyiblər. Burada diqqəti çəkən məqam odur ki, sözügedən aksiyada ermənilərin məqsədi Laçın yolunda Azərbaycan ekofəallarının keçirdiyi aksiyanın alternativini yaratmaq olub, amma uğursuz alınıb. Faktiki olaraq onlar uğursuzluğa düçar oldular və gördülər ki, dünyanın heç bir ölkəsindən buna reaksiya olmadı. Baxmayaraq ki, Xankəndidən başlayıb Şuşa yoluna qədər gəliblər. Lakin onların bu cəhdi heç bir rezonans doğurmadı. İstədilər ki, bizim vətəndaşların Laçın yolunda başladıqlları mülki hərəkat kimi bir hərəkata başlasınlar, amma alınmadı. Sonda da heç bir nəticə olmadığı üçün qayıdıb getdilər və Tvit atdılar ki, bizim birləşəcəyimiz bir yer varsa, o da Ermənistandır. Bütün bunlar onların uğursuzluğudur.
“Son nəticə hər şey prinsipi ilə çıxış edən erməni tərəfi "bədbəxt və əzabkeş artsaxlılar" şüarını...”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafovun fikrincə, Azərbaycan ekofəallarının iki aydan artıq davam edən aksiyası dövlətin Qarabağ üzərində suveren hüquqlarının tam və birmənalı şəkildə bərqarar olmasına yönəlmiş ictimai aksiyadır: “Ekofəalların aksiyası Qarabağda Azərbaycana aidiyyəti heç bir şubhə dogurmayan qızıl və filiz mədənlərinin seperatçılar tərəfindən istismarına qanun çərçivəsində ictimaiyyətin etiraz aksiyası olmaqla yanaşi, beynəlxalq birliyin diqqətini bu vacib məsələyə yönəltdi. Bu, Azərbaycan tərəfinin monitorinqin keçirilməsi məqsədilə tələblərini daha geniş ampluada işıqlandırmaq istəyinin təcəssümüdur. Bununla yanaşı, Laçın dəhlizi vasitəsilə Qarabağa Ermənistandan humanitar yük adı altında silahların daşınmasının qarşısının alınmasıdır. Erməni tərəfi isə bütün bunları Azərbaycanın Qarabağı Ermənistandan təcrid etmək, ermənilərə qarşı iqtisadi embarqo tətbiq etmək istəyi kimi təqdim edir. Bununla bağlı ənənəvi erməni vay-şüvənliyi vasitəsi ilə dünyaya car çəkirlər. Bu məsələlər ətrafında gerçəkdən ajiotaj yaratmaq, beynəlxalq miqyasda rezonans doğurmaq məqsədilə erməni tərəfi müxtəlif vasitələrə müraciət edir. Erməni diasporasının lobbiçilik etdiyi məlum Avropa institutlarının köməyi ilə Azərbaycana qarşı sanksiyaların tətbiqinə çalışır. Onların bununla bağlı məqsədi heç bir şeydir. Onların uğursuz aksiyası göstərdi ki, separatçılar məğlubiyyətə məhkumdular. Son nəticə hər şey prinsipi ilə çıxış edən erməni tərəfi "bədbəxt və əzabkeş artsaxlılar" şüarını gündəmdə saxlamağa, qadın fəalları, feministləri mübarizəyə qatmaqla insan haqları ilə bağlı Avropa institutlarının diqqətini bölgədə cərəyan edən hadisələrə yönəltməyə səy göstərirlər. Erməni millətçilərinin bununla bağlı hərəkətlərinə zamanında elmi kommunizmin banilərindən biri olan Fridrix Engels də maraqlı bir fikir söyləyib: "Tarix boyu erməni millətçiləri Böyuk Ermənistan naminə ən iyrənc vasitələrə əl atmış, hətta erməni qadınlarının Avropa siyasətçilərinə təsiri üçün məlum xidmətlərindən də istifadə etmişdilər”. Bu mənada, əlbəttə, tarix təkrar olunur”.
Vidadi ORDAHALLI
