Səbail Rayon Məhkəməsi Dövlət Təhlükəsizliyi Xidmətində davam edən cinayət işi üzrə Naxçıvan Muxtar Respublikası Şəhərsalma və Arxitektura Komitəsinin sabiq sədri Rüstəmov Hicran Yaqub oğlu barəsində həbs qətimkan müddətinin uzadılması ilə bağlı müstəntiqin vəsatətinə baxıb.
Məhkəmənin qərarı ilə Hicran Rüstəmov barəsində həbs qətimkan müddəti daha 3 ay uzadılıb.
Qeyd edək ki, Hicran Rüstəmov ötən ilin dekabrında Dövlət Təhlükəsizliyi Xidmətində başlanan cinayət işi üzrə həbs edilib.
O, vəzifə səlahiyyətlərindən sui-istifadə edərək muxtar respublika ərazisində tikinti və abadlıq işlərinin yerinə yetirilməsi üçün nəzərdə tutulan “xüsusilə külli miqdar” təşkil edən ümumilikdə 212 milyon 361 min manat dövlət vəsaitinin mənimsənilməsində ittiham edilir.
Görünən budur ki, Naxçıvanda köhnə həbslərlə bağlı məsələ tam yekunlaşmayıb. Muxtar Respublikada korrupsiya ittihamı ilə həbs edilən şəxslərlə bağlı aparılan istintaqın müddəti uzadılır. Bu həbslərin davam edəcəyi, yoxsa həbs olunnuş şəxslərlə bağlı hələ aydınlaşmayan məqamların olduğunu təxmin etmək olar?
Əslən Naxçıvandan olan siyasətçi Bədrəddin Quliyev “Bakı-Xəbər”ə açıqlamasında bildirdi ki, Naxçıvanda kadr məsələləri ilə bağlı islahatlar gedir: “Bununla paralel olaraq, bütün sahələr üzrə araşdırnalar aparılır. Hiss edilir ki, məsələlər bir qədər uzadılır. Bunun da səbəbi çox obyektiv çalarlarla bağlıdır. Təbiidir ki, söhbət ciddi məbləğdə yetintilərdən gedir. Bu səbəbdən də təqsirkarların dairəsi tam müəyyənləşməlidir. İstintaqın uzadılması bununla bağlıdır. Mən bundan sonra həmin işlər üzrə çox da iri məmurların həbs ediləcəyini gözləmirəm. Ancaq həbs edilənlərlə bağlı aydınlaşmalı məqamların olduğunu təxmin edə bilərik. Proseslərin gedişi bunu göstərir ki, dəymiş ziyanın tam həcmi müəyyənləşdirilir”.
Naxçıvandakı həbslərlə bağlı sosial şəbəkələrdə müxtəlif rəylər, fikirlər səsləndirilir. Ancaq məsələ burasındadır ki, hazırda Azərbaycanın digər bölgələrində olduğu kimi, Naxçıvanda da korrupsiya, dövlət vəsaitinin mənimsənilməsi hallarına qarşı sərt tədbirlər görülür. Heç kimə sirr deyil ki, Naxçıvan bir çox dövlət qurumlarında oturuşmuş korrupsiya sistemi mövcud olub. Araşdırmalar göstərib ki, Naxçıvana gətirilən mallarda külli miqdarda gömrükdən yayınma halları var. Məhz buna görə Naxçıvanda adambaşına düşən ümumi istehlak payı Azərbaycanın digər bölgələrindəki göstəricidən 10 faiz az göstərilib. Əslində isə bu fərq Naxçıvana malların gömrükdən kənar gətirilməsi, daha dəqiq desək, “yeyinti” ilə bağlı olub. Yeri gəlmişkən, hər il Naxçıvana dövlət büdcəsindən 500 milyon manat dotasiya verilir. Naxçıvanın öz gəliri isə 180 milyon manat göstərilib. Amma əslində bu, real rəqəm deyil. Əgər yalnız gömrükdə 100 milyon manatdan artıq mənimsəmə faktı aşkarlanıbsa, belədə ümumilikdə yeyinti və mənimsəmənin səviyyəsini təxmin etmək olar. Bütün bunların fonunda bir daha qeyd etmək istərdik ki, Naxçıvandakı həbslər digər bölgələrdə və strukturlarda analoji pozuntularla bağlı tədbirlərdən heç nə ilə fərqlənmir. Burada hər hansı siyasi çalar, siyasi məna axtarmağa ehtiyac yoxdur. Bütün təqsiri olanlar əməllərinə görə cavab verməlidir.
Məhəmmədəli QƏRİBLİ
