Son günlər Mətbuat Şurasının növbəti qurultayının keçiriləcəyi və bunun nəticəsində yeni sədr və idarə heyətinin formalaşacağına dair məlumatlar yayılır. Bu mövzunu bir qədər dərindən araşdırmaq qərarına gəldik.
Mətbuat Şurası Azərbaycanda medianın özünütənzimləməsini həyata keçirən orqandır. 15 mart 2003-cü ildə ölkə jurnalistlərinin I qurultayında 180-dək aparıcı kütləvi informasiya vasitəsinin təsisçiliyi ilə yaradılıb. Həmin il aprelin 24-də Ədliyyə Nazirliyində dövlət qeydiyyatına alınıb. Mətbuat Şurasının məqsədi jurnalistlərin öz peşə fəaliyyətlərində qanunvericiliyin tələblərinə, peşə prinsiplərinə əməl etməsinə ictimai nəzarətin həyata keçirilməsi, dövlət orqanları və ictimaiyyətlə mətbuat arasında əlaqənin və etimadın möhkəmləndirilməsi, söz, fikir və məlumat azadlığına daha geniş imkanlar yaradılmasından ibarətdir. Şura media vasitələrinin fəaliyyət sahələrində baş verən münaqişələrin məhkəməyəqədər həlli variantlarının araşdırılmasını, redaksiya əməkdaşlarının davranışı ilə əlaqədar verilmiş şikayətlərin qəbulu, öyrənilməsi və bununla bağlı qərarların çıxarılmasını həyata keçirir.
Mətbuat Şurasının ali orqanı qurultaydır. Qurultaylar MŞ Nizamnaməsinin müvafiq bəndinin tələbinə uyğun olaraq keçirilir.
Şuraya rəhbərlik qurultay tərəfindən seçilən sədr tərəfindən aparılır. Şura sədrinin 2 müavini var. Onlardan biri jurnalistləri, digəri ictimaiyyət nümayəndələrini təmsil edir. Sədr müavinləri növbəlilik əsasında Şikayətlər üzrə Komissiyaya rəhbərlik edirlər. Şuranın qərarları İdarə Heyətinin iclaslarında kollegial şəkildə qəbul olunur. Mətbuat Şurasının sonuncu 7-ci qurultayı 2018-ci ildə keçirilib. Nizamnaməyə görə, qurultay hər 4 ildən bir baş tutur. Məntiqlə, növbəti qurultayın zamanı yetişib. Bu barədə qurumun rəhbərliyi və İdarə Heyətində təmsil olunanlar nə düşünür?
Rəşad Məcid: “Yaxın günlərdə İdarə Heyətinin toplantısı olacaq və qurultayın vaxtı müəyyənləşdiriləcək"
MŞ-nin İdarə Heyətinin üzvü Rəşad Məcidin sözlərinə görə, Azərbaycan Mətbuat Şurasının (MŞ) növbəti qurultayı yaxınlaşır: “Yaxın günlərdə İdarə Heyətinin toplantısı olacaq və qurultayın vaxtı müəyyənləşdiriləcək".
O bildirib ki, qurultayda sədr seçkisi də baş tutacaq: "Orada jurnalistlər kimi dəstəkləyərsə, həmin şəxs də MŞ-nin sədri olacaq".
Əflatun Amaşov: “Tövsiyə edirəm ki, kimsə buna görə narahatlıq keçirib hadisələri qabaqlamaq niyyətinə düşməsin”
Bu mövzu ilə bağlı MŞ sədri Əflatun Amaşov da öz münasibətini açıqlayıb. Onun sözlərinə görə, kimlərsə orda-burda deyib ki, o, Mətbuat Şurası sədrliyindən istefa ərizəsi yazıb: “Bunu mənim fikrimi öyrənmədən yazanlar da tapılıb. Bəri başdan bildirim ki, yazılanlar və deyilənlər şayiədir. İstefa verməmişəm, istefa vermək fikrim də yoxdur. Hazırda işimin başındayam. Bəli, Azərbaycan Mətbuat Şurasının Nizamnaməsinə əsasən 4 ildən bir Azərbaycan jurnalistlərinin qurultayı keçirilməlidir. Axırıncı Ali Məclis 2018-ci ildə baş tutub. Deməli, 2022-ci ildə də təşkil olunmalıdır. Bununla bağlı qərarı, yəni qurultayın keçirilməsi üzrə Nizamnamə prosedurunun reallaşdırılması qərarını Şuranın İdarə Heyəti verməlidir. Qurultayda Şuranın İdarə Heyəti üzvlüyünə və sədrliyə yenidən namizədliyimi irəli sürüb-sürməmək qərarını isə mən verməliyəm. Tövsiyə edirəm ki, kimsə buna görə narahatlıq keçirib hadisələri qabaqlamaq niyyətinə düşməsin. Belə bir niyyətə düşmək ən azından etikasızlıqdır”.
Aydın Quliyev: “Qurultayın bu il keçirilib-keçirilməyəcəyi ilə bağlı məndə heç bir bilgi yoxdur”
MŞ İdarə Heyətinin üzvü, “Bakı-Xəbər” Media Qrupunun rəhbəri Aydın Quliyev bizə açıqlamasında bildirdi ki, yeni qurultayın keçiriləcəyi ilə bağlı onda heç bir məlumat yoxdur: “Ancaq qurultayın çağırılmasında təəccüblü nəsə görmürəm. Nizamnaməyə görə, hər 4 ildən bir qurultay keçirilir. Son qurultayın 2018-ci ildə baş tutduğunu nəzərə alsaq, onda yeni qurultayın bu il keçirilməsi qrafikə uyğundur. Qurultayın bu il keçirilib-keçirilməyəcəyi ilə bağlı məndə heç bir bilgi yoxdur”.
Azər Həsrət: “Görünür, kimlərinsə iştahası qabarıb, sədrlikdə gözü var”
MŞ İdarə Heyətinin digər üzvü Azər Həsrət isə “Bakı-Xəbər”ə bildirdi ki, İdarə Heyətinin iclasının çağrılması ilə bağlı hər hansı elan yoxdur: “Belə məlumat olanda MŞ sədri iki gün əvvəl bizə toplantının olacağı ilə bağlı məlumat verir. Qurulrayın çağırılması üçün təşkilat komitəsi yaradılmalıdır. Qurultay üçün nümayəndələr seçilməlidir. Bunlar da aylarla çəkən proseslərdi. Hələ ki, belə bir elan yoxdur. Pandemiya səbəbindən MŞ-nın bir çox tədbirləri təxirə düşüb. Qurumun hazırkı İdarə Heyətinin səlahiyyət müddəti bitməkdədir. Bununla bağlı qərar İdarə Heyətində veriləcək. Əflatun Amaşovun istefa verdiyi haqda xəbər dezinformasiyadır. Görünür, kimlərinsə iştahası qabarıb, sədrlikdə gözü var. Yəqin kimlərsə Mətbuat Şurasını milli xətdən çıxarmaq üçün planlar cızır. O adamlara tövsiyəm bu olar ki, bəsdir Moskvanın çaldığına oynadılar, bir az da Azərbaycan üçün oynasınlar”.
Məhəmmədəli QƏRİBLİ
