Rusiya Federasiyası Xarici İşlər Nazirliyinin rəsmi saytında bu ölkə ilə Ermənistan arasında Dostluq, Əməkdaşlıq və Qarşılıqlı Yardım haqqında Müqavilənin bağlanmasının 25-ci ildönümü ilə bağlı bəyanat dərc edilib. Bəyanatda elə təmtəraqlı fikirlər səsləndirilib ki, sanki iki ölkə arasında münasibətlər ən yüksək səviyyədədir.
Qeyd edilir ki, iki ölkə əməkdaşlığın geniş spektri üzrə uğurla irəliləyir, qarşılıqlı fəaliyyətin effektivliyini artırır: “İkitərəfli potensialın yaradılması üçün həlledici əhəmiyyət kəsb edən Rusiya və Ermənistan rəhbərliyi arasında müntəzəm etimad əsaslı təmaslardır ki, bu da təkcə aktual məsələləri həll etməyə deyil, həm də əsas regional və beynəlxalq problemlər üzrə mövqeləri əlaqələndirməyə imkan verir. 2022-ci il aprelin 20-də Rusiya ilə Ermənistan arasında qəbul edilmiş Birgə Bəyanat da bu niyyəti təsdiqləyib. Biz əsas müttəfiq mövqeyindən İrəvana müdafiə qabiliyyətini və sərhəd təhlükəsizliyini gücləndirməkdə, qonşuları ilə əlaqələri normallaşdırmaqda kömək etməyə davam etməkdə qərarlıyıq. Əminik ki, regionda sabitliyə aparan yol 2020-ci il 9 noyabr, 11 yanvar və 26 noyabr 2021-ci il tarixli üçtərəfli sazişlərə ciddi riayət etməkdən keçir. Rusiya sülhməramlı kontingenti Dağlıq Qarabağda təhlükəsizliyin təmin edilməsində əsas amil olaraq qalır.
Biz qardaş Ermənistanla dostluğumuzu səmimiyyətlə qiymətləndiririk və ölkələrimizin, xalqlarımızın firavanlığı naminə Rusiya-Ermənistan müttəfiqliyini daha da gücləndirmək əzmindəyik”.
Belə açıqlama Kreml hakimiyyətində Ermənistana münasibətdə ikili bir xəttin olduğunu söyləməyə əsas verirmi? Məsələ ondadır ki, Rusiya XİN-i avqustun 17-də Ermənistana sərt məzmunlu nota verdi. Buna səbəb “Surmalu” ticarət mərkəzində baş verən partlayışla bağlı Rusiyanın ittiham olunması idi. Bununla bağlı Ermənistandan qəti cavab gözlədikləri notada qeyd edilirdi. İndi isə Rusiya XİN-i qardaş Ermənistanla münasibətlərin həqiqətən səmimi olmasından dəm vurur. Səmimi dostluq hara, bundan əvvəlki sərt məzmunlu nota hara? Bu baxımdan demək olarmı ki, Kreml hakimiyyətində Ermənistana münasibətdə konkret iki xətt var?
“Elə görüntü yaradırlar ki, sanki bu ölkədə güclü antirus ovqatı yoxdur
Məsələyə münasibət bildirən AMİP sədri Arzuxan Əlizadə bunu istisna etmədi: “Ermənistana münasibətdə ikili xəttin olması ortadadır. Düzdür, Rusiyada hakimiyyətin əsas iradəsini Vladimir Putin müəyyən edir. Ancaq hakimiyyət daxilində Ermənistanla bağlı ikili xətt var. Hakimiyyətin struktarlarında müəyyən dairələr var ki, davamlı olaraq Ermənistanın maraqlarından çıxış edirlər. Rusiyanın Xarici İşlər Nazirliyində, Dövlət Dumasında, media qurumlarında Ermənistanı himayə edən qruplar var. Məsələn, baxmayaraq ki, Nikol Paşinyan baş nazir olandan sonra Ermənistan-Rusiya münasibətlərində tez-tez gərginliklər yaşanır, amma rus telekanallarında ermənipərəst ekspertlər, siyasilər meydan sulayır. Dövlət Dumasının deputatı Konstantin Zatulin ermənidən çox erməniçilik edir. Marqarita Simonyan ölkənin aparıcı media resursuna rəhbərlik edir və hər fürsətdə öz bildiyini edir. Biz onu da unutmamalıyıq ki, xarici işlər naziri Sergey Lavrovun atası ermənidir. Ermənistan ara-sıra Qərbə doğru nə qədər reverans etsə də, Rusiya bu ölkənin üzərinə çox getmir. Rusiya XİN-in son bəyanatı bir daha bunu sübut edir. Elə görüntü yaradırlar ki, sanki Ermənistanda güclü antirus ovqatı yoxdur. Halbuki, İkinci Qarabağ müharibəsindən sonra Ermənistanda Rusiyaya qarşı olan nifrət daha da artıb. Bütün bunlar bir daha onu göstərir ki, Rusiya-Ermənistan münasibətləri heç də deyildiyi kimi səmimi deyi. Sadəcə, hakimiyyət daxilində Ermənistanı himayə edən dairələr güclü mövqedədilər”.
Vidadi ORDAHALLI
