ABŞ-ın Azərbaycandakı səfirliyi Azərbaycan Prezidentinin köməkçisi Hikmət Hacıyevin ABŞ Səfirliyinin Azərbaycan hökumətinin Şuşaya getməklə bağlı dəvətinə açıq şəkildə etinasızlıq göstərməsi barədə açıqlamasına cavab verib.
Səfirliyin sözçüsü “Amerikanın Səsi”nin sorğusuna cavabında bildirib: “ABŞ inanır ki, davamlı dialoq, davamlı əlaqə vasitəsilə, o cümlədən yüksək səviyyələrdə biz uzunmüddətli və hərtərəfli sülhə kömək etmək üçün mümkün olan hər şeyi edə bilərik. Daha əvvəl dediyimiz kimi, Azərbaycanın müstəqilliyi və suverenliyinin ABŞ-dan böyük dəstəkçisi yoxdur.
Amerika Birləşmiş Ştatları Səfirliyinin əməkdaşları Ağdam, Zəngilan və Füzuli də daxil olmaqla Azərbaycanın bütün bölgələrinə geniş şəkildə səfərlər ediblər və etməkdə davam edirlər. Səfirliyin əməkdaşları təhlükəsizlik, səhiyyə, enerji və iqtisadi inkişaf kimi mühüm məsələlərdə Azərbaycanla əlaqə qurmaq üçün ölkənin bütün bölgələrinə səfərlər edir”.
Azərbaycan Prezidentinin köməkçisi Hikmət Hacıyev avqustun 27-də Azərbaycanda akkreditə olunmuş çoxsaylı diplomatların, beynəlxalq təşkilatların əməkdaşlarının Azərbaycan hökuməti
tərəfindən Şuşa şəhərinə təşkil edilmiş səfəri zamanı deyib ki, Fransa və ABŞ-ın Azərbaycandakı səfirləri Şuşaya təşkil edilən səfərdə iştirak etmir:
“Onlar Azərbaycan hökumətinin dəvətinə açıq şəkildə etinasızlıq göstərdilər. Biz bunu ərazi bütövlüyümüzə qarşı hörmətsizlik kimi qəbul edirik. Fransa və ABŞ ATƏT-in Minsk Qrupunun həmsədrləri kimi 30 il ərzində münaqişənin həllinə töhfə verməyiblər. Onlar 30 il Azərbaycanın zamanını itirdilər. Bu səfərə qoşulmamaqla onlar bir daha etinasızlıq nümayiş etdirdilər”.
Göründüyü kimi, ABŞ səfirliyi Azərbaycanın səsləndirdiyi rəsmi etiraza yayındırıcı cavab verir. Azərbaycan tərəfi səfirlərin Şuşaya səfərə getməkdən boyun qaçırmasına etiraz edir, ancaq ABŞ səfirliyi digər işğaldan azad edilən rayonlara edilən səfərlərdən danışır. ABŞ və Fransa səfirləri Şuşaya getməkdən niyə belə çəkinirlər?
Politoloq Əhəd Məmmədli "Bakı-Xəbər”-ə açıqlamasında bildirdi ki, ABŞ səfirliyinin verdiyi cavab çox məntiqsizdir: "Biz Şuşadan danışırıq, onlar Ağdama, Zəngilana etdikləri səfərlə bunu kompensasiya etmək istəyirlər. Şuşadan yayınmaqlarının səbəbi bəllidir. Bilirlər ki, həmin şəhərin Azərbaycan üçün çox böyük tarixi əhəmiyyəti və simvolik mənası var. Hətta belə bir paralel də apara bilərik. Fələstinlilər üçün Qüds nədirsə, Azərbaycan üçün də Şuşa odur. Bu səfirlərin artıq neçənci dəfədir ki, Azərbaycanın mədəniyyət paytaxtı sayılan Şuşaya səfərdən nümayişkəranə şəkildə imtina etməsi həmin şəhərin bizə aid olmadığını təbliğ etmək cəhdidir. Bunun başqa adı yoxdur. Hikmət Hacıyevin çox məntiqli etirazına onlar cavab verə bilməyib. Onlar sadəcə məsələni başqa müstəviyə yömətməyə çalışıblar. Hətta ABŞ səfiri iddia edir ki, Azərbaycanın müstəqilliyini hamıdan çox istəyirlər. Ermənistan Azərbaycanın torpaqlarını işğal etdiyi zamanda onlara yox, bizə qarşı 907-ci düzəlişi tədbiq ediblər. 44 günlük müharibə dönəmində də ABŞ dəfələrlə Azərbaycandan müharibəni dayandırmağı tələb edib. Amerika heç vaxt Azərbaycanın yanında olmayıb. Bunu açıq bildirməyin vaxtdır. Onlar bilməlidirlər ki, nə Amerika, nə də Fransa Azərbaycan üçün dost ölkə ola bilər. Bu onların atdığı addımlarda özünü aydın şəkildə büruzə verir”.
Məhəmmədəli QƏRİBLİ
