Ermənistanın baş naziri Nikol Paşinyan Brüsseldə İlham Əliyevlə nəzərdə tutulan görüş ərəfəsində parlamentdən kənar siyasi qüvvələrin rəhbərləri ilə görüşüb.
Görüşdə “Respublika” partiyasının rəhbəri Aram Darkisyan, Xristian-demokrat partiyasının sədri Armen Levon Şirinyan, “Vahid Vətən” partiyasının rəhbəri Mqer Terteryan, “Suveren Ermənistan” partiyasının sədri David Danadaryan, Sosial-demokratların lideri Sedrak Açemyan və “Vətənin gücü” partiyasının sədri Tiqran Arzakançyan iştirak edib. Müzakirə edilən məsələlərlə bağlı rəsmi açıqlama verilməyib. Ancaq görüşün avqustun 31-də nəzərdə tutulan mühüm danışıqların astanasında baş tutması maraqlı suallar doğurur. Paşinyan bu siyasi güclərlə nəyi müzalirə edə bilər?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, parlamentdə təmsil olunmayan partiyalarla Paşinyan bundan öncə də görüşlər keçirib: “Bu, həmin formatda ilk görüş deyil. Brüssel görüşü ərəfəsində belə bir görüşün keçirilməsi zərürəti nədən yaranıb? Parlamentdə təmsil olunan partiyalar Paşinyana qarşı kəskin müxalifətdədirlər. Əslinə qalsa, onlarla görüş tamamilə əhəmiyyətsiz olardı. Onlar Paşinyanı vətən xaini hesab edirlər. Hər dəfə Paşinyanla onların arasında ciddi qarşıdurmalar yaranır. Paşinyan bütün günahları sabiq ölkə rəhbərləri Köçəryan və Sarkisyanın üzərinə atmağa çalışır. Bu səbəbdən də, Paşinyanın arxalana biləcəyi partiyalar parlamentdən kənardakılardı. Onların da ciddi siyasi çəkisi yoxdur. Hətta onların da arasında Paşinyana qarşı kəskin müxalifətdə olanlar var. Görüşün Brüsseldə olacaq görüşlə əlaqəsi var. Brüsseldə əsas mövzu sülh sazişinin imzalanması ilə bağlı irəliyə doğru addımların atılması olacaq. Bu, artıq bizim tərəfdən elan edilib. Şübhəsiz ki, bu, Ermənistan cəmiyyətində ciddi etirazlar doğuracaq. Ona görə də, Paşinyan özünə dəstəyi indidən sığortalamaq istəyir. Ancaq bir şey də aydındır ki, Paşinyan günü-gündən dəstəyini itirməkdədir. Düzü, bu bizim marağımıza cavab vermir. Ümid etmək olar ki, Brüsseldə müəyyən addımlar atılacaq. Paşinyan bu razılaşmaların fonunda ciddi addımlar atacaq. Əvvəl də razılaşmalar olurdu, ancaq Paşinyan bu istiqmətdə heç bir addım atmırdı. Moskva da bu formatda görüş keçirmək istəyir. Görünür, Moskva bu görüşü Brüsseldən sonra keçirməkdə xüsusilə maraqlıdır. Moskvanın əldə olunan razılaşmaların icrasını təmin etmək imkanı daha çoxdur. Laçınla bağlı məsələdə biz bunu gördük. Ermənilər etiraz etdi, ancaq Moskvanın mövqeyi onları alternativ yol təklifini qəbul etməyə vadar etdi”.
Məhəmmədəli QƏRİBLİ
