Məlum olduğu kimi, ABŞ dövlət katibi Entoni Blinkenin Filip Rikeri Qafqaz danışıqları üzrə baş məsləhətçi və Minsk Qrupunun həmsədri təyin etməsi Azərbaycanda sərt tənqid olunur. İstər rəsmi, istərsə də qeyri-rəsmi səviyyədə bunun doğru olmadığı bəyan olunub.
Ən azından ona görə ki, Minsk Qrupu fəaliyyəti dövründə özünü doğrultmadı və məsələ öz həllini 44 günlük İkinci Qarabağ müharibəsi nəticəsində tapdı. Bu isə o deməkdir ki, Minsk Qrupu tarixdə qaldı və onu diriltmək cəhdlərinin bir mənası yoxdur.
Bu arada ABŞ-ın vasitəçi təyinatına Bakının kəskin reaksiyasına Fransanın ATƏT-dəki daimi nümayəndəliyi də cavab verib. Cavabda qeyd edilir ki, giya Fransa Qarabağ məsələsinin həlli ilə bağlı forum təşkil edir: “Bilirsinizmi ki, Fransa ABŞ və Rusiya ilə birlikdə 1997-ci il yanvarın 1-dən ATƏT-in Minsk Qrupuna həmsədrlik edir? Qrup son nəticədə Cənubi Qafqazda sabitliyin bərqərar olması üçün Dağlıq Qarabağ münaqişəsinin sülh yolu ilə həlli üzrə danışıqlar üçün forum təşkil edir”.
Bəli, Fransa 1997-ci ildə həmsədr oldu. O vaxt Azərbaycan Fransanın ermənilərlə olan yaxınlığını nəzərə alaraq buna razılaşmırdı. Həmin dövrdə prezident olan Jak Şirak mərhum prezident Heydər Əliyevdən xahiş etdi ki, Fransanın həmsədr olmasına Azərbaycan razılıq versin. Şəxsən Şirak Heydər Əliyevə söz verdi etdi ki, məhz ermənilərlə olan dostluq münasibətlərindən istifadə edərək Fransa Qarabağ məsələsinin həllinə töhvə verəcək. Ermənistanı yola gətirəcək. Ancaq Fransa verdiyi sözü tutmadı.
Haçan Fransa Qarabağ məsələsinin həllinə töhfə verdi ki, bir də forum təşkil etsin?
“Məqsəd odur ki, erməni separatçılarını yenidən dirçəltsinlər”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, həmsədrlərin heç biri, o cümlədən Fransa Qarabağ məsələsinin həlli ilə bağlı səy göstərməyib: “Həm ABŞ, həm də Fransa Minsk Qrupu tərkibində səmərəli fəaliyyət göstərməyib. O cümlədən, Rusiya da bu çərçivədə hansısa səylər göstərməyib. Minsk Qrupunun həmsədrlərindən biri olan ABŞ daim erməni separatçılarına ayrıca yardım göstərib. O cümlədən, Fransa da hansısa xüsusi təşəbbüslə çıxış etməyib. Əksinə, rəsmi Paris bütün vasitələrlə çalışıb ki, məsələnin həlli uzansın. Hesab ediblər ki, işğal faktının uzanması ermənilərin xeyrinə işləyir. Artıq Azərbaycan ərazilərinin işğalı ilə nəticələnən Qarabağ münaqişəsi həll olunub. İşğal faktı əsasən aradan qaldırılıb. Ətraf 7 rayon işğalçılardan tam azad edilib və tamamilə yeni vəziyyət yaranıb. Bütün bunlar isə o deməkdir ki, ümumiyyətlə Minsk Qrupundan danışmağa dəyməz. Ancaq biz görürük ki, ABŞ və Fransa ölmüş bir qurumu yenidən diriltmək istəyir. Halbuki, bundan sonra Minsk Qrupunun hansı işlə məşğul olacağı məlum deyil. Ölmüş bir qurumu diriltmək münaqişəni yenidən yaratmaq deməkdir. Guya Fransa Minsk Qrupu çərçivəsində Qarabağla bağlı hansısa forum təşkil edəcək və təkliflər irəli sürəcək. Fransa təmsilçisinin bu fikirləri gülünc və absurddur. Rəsmi Paris forum təşkil edən idisə, 26 illik atəşkəs dövründə bunu edərdi. Niyə məhz indi bu fikrə düşüblər? Məqsəd odur ki, erməni separatçılarını yenidən dirçəltsinlər. Ona görə də Azərbaycan çox doğru olaraq Minsk Qrupunu yaxın buraxmır və bu, belə də davam etməlidir”.
Partiya sədri hesab edir ki, Fransa prosesə hansısa formada töhfə vermək istəyirsə, o zaman bunu Minsk Qrupu çərçivəsində etməyə ehtiyac yoxdur.
Vidadi ORDAHALLI
