Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib ki, münaqişə başa çatandan sonra BMT-nin ali rəhbərliyi tərəfindən hələ də regiona səfər olmayıb.
O qeyd edib ki, normalda 30 ildən artıq davam edən, bu qədər humanitar fəlakətlərə, faciələrə səbəb olmuş post-münaqişə şəraitində BMT-nin ali rəhbərliyi səviyyəsində regiona səfər edilməli və bu münaqişənin həll edilməsi, BMT Təhlükəsizlik Şurasının qətnamələrinin həyata keçirilməsi faktları, əslində, təqdir olunmalı idi:
“Təəssüflər olsun ki, necə BMT Təhlükəsizlik Şurasının qətnamələri 30 il masa üzərində qaldısa, biz bu məsələdə də BMT rəhbərliyi tərəfindən hər hansı ciddi fəaliyyət müşahidə etmirik. Azərbaycana münasibətdə “Marşal planı” yoxdur. Bəlkə Azərbaycan xalqı və dövləti onların təqdim edəcəyi formada bunun arzusunda da deyil. Bizim özümüzün milli resurslarımız var. Amma burada həmrəylik nümunələri çox vacibdir. Məsələn, Türkiyənin, Qazaxıstanın, Özbəkistanın qardaş dəstəyi, Füzuli şəhərində məktəb layihəsi ilə bağlı təkliflər və digər layihələr həmrəyliyin, qardaşlığın nümunəsidir. Bu kimi addımlar Azərbaycan tərəfindən də müsbət qiymətləndirilir”.
Çox maraqlıdır, BMT baş katibi mütəmadi olaraq Ukraynaya səfər edir. Bütün bunların fonunda Azərbaycana bir dəfə də olsun səfərin edilməməsi qurumun ikili standartlara uyğun yanaşmasından xəbər verirmi?
Siyasi şərhçi Sahil Kərimli “Bakı-Xəbər” ə açıqlamasında bildirdi ki, Prezdentin köməkçisi Hikmət Hacıyevin son açıqlamaları beynəlxalq dairələr üçün çox ciddi mesaj kimi qəbul olunmalıdır: “Azərbaycan son 30 ildə necə ikili standartlar siyasəti ilə üzələşirdisə, bu gün də təəssüf ki, bəzi dairələr ölkəmizə qarşı bu ədalətsiz mövqelərini davam etdirirlər. Azərbaycan dövləti 30 il işğalda saxlanılan torpaqlarını cəmi 44 günə azad etdi və tarixi Zəfəri ilə bütün dünyanı heyran qoydu. Bu gün şübhə yoxdur ki, bəzi böyük dövlətlər, müxtəlif beynəlxalq qurumlar Azərbaycanın bu qələbəsini heç cür həzm edə bilmir. Qələbəmizə qısqanclıqla yanaşılır. Halbuki, münaqişənin həlli prosesinə vasitəçi kimi qatılan ölkələr, həmçinin BMT 30 ilə yaxın bir dövrdə erməni vandalizminə, işğala, ədalətsizliyə göz yumdu, Ermənistana heç bir təzyiq edilımədi. Azərbaycan həmin ölkələrin, təşkilatların görməli olduqları işi öz gücünə etdi və hamıya lazımi dərs verdi. Bu gün Azərbaycanın ərazi bütövlüyünün təmin edilməsindən iki ilə yaxın zaman keçir, amma təəssüf ki, BMT TŞ rəhbərliyindən heç kim bölgəyə səfər etmnəyib, azad edilmiş ərazilərdəki vandalizm aktları ilə tanış olmayıb. Bu, Azərbaycana qarşı tutulan haqsız mövqe, çoxstandartlı siyasətdir. Eyni zamanda biz son aylarda ABŞ və Fransanın ölkəmizə qarşı sərgilədiyi xoşagəlməyən mövqenin də şahidi oluruq. Dəfələrlə müraciət edilıməyinə baxmayaraq, həmin ölkələrin səfirləri Şuşaya səfər etməkdən yayınır. Bu da Azərbaycan dövlətinə və xalqına qarşı açıq hörmətsizlikdir. Əgər bu ölkədə səfirsənsə, diplomatik fəaliyyətlə məşğulsansa, Azərbaycan dövlətinin dəvət etdiyi səfərlərdə iştirak etmək sənin borcundur. Amma biz dost münasibəti əvəzinə bu kimi anlaşılmaz mövqenin şahidi oluruq. Bu da birmənalı olaraq qısqanclıq, gözügötürməzlikdir. Azərbaycan bölgədə yeni reallıqları artıq çoxdan yaradıb və bu xoş niyyətini diqtə edir. Yeni reallıq nədən ibarətdir? Bölgədə uzunmüddətli sülhə və təhlükəsziliyə nail olmaq, nıəqliyyat və kommunikasiyaları açmaqla region iqtisadiyyatını daha da inkişaf etdirmək, Cənubu Qafqaz ölkələri və xalqlarının gələcək rifahını təmin etmək. Bu reallıqları bütün dünya qəbul edir və alqışlayır. Görünür, adları çəkilən ölkələr Azərbaycanın bölgədki liderliyinin möhkəmlənməsindən narahatdır. Yaxşı olar ki, həmin ölkələr gözlərini yaxşı açsınlar, bölgədə gedən proseslərə xoş niyyət nümayiş etdirsinlər. Görünür, BMT-nin rəhbərliyi həmin ölkələrin təsir dairəsindən çıxa bilmir”.
Məhəmmədəli QƏRİBLİ
