Rusiya prezidenti Vladimir Putin Rusiya Federasiyasının milli təhlükəsizlik strategiyasını təsdiqləyib. Bu barədə fərman rəsmi hüquqi internet portalında yayımlanıb. Fərmanın imzalandığı gündən qüvvəyə mindiyi qeyd olunur.
Milli Təhlükəsizlik Strategiyası Rusiyanın milli maraqlarını və strateji milli prioritetlərini, uzunmüddətli perspektivdə milli təhlükəsizliyin gücləndirilməsinə və davamlı inkişafının təmin edilməsinə yönəlmiş daxili və xarici siyasət sahəsindəki hədəfləri, vəzifələri və tədbirləri müəyyənləşdirən əsas strateji planlaşdırma sənədidir. Strategiyanın əvvəlki versiyası Rusiya Prezidentinin 31 dekabr 2015-ci il tarixli fərmanı ilə təsdiq edilmişdi. Strategiyanın yeni versiyası bu ilin may ayının sonunda RF Təhlükəsizlik Şurası tərəfindən təsdiqlənib. Təhlükəsizlik Şurasının katibi Nikolay Patruşevin o vaxt söylədiyi kimi, yenilənmiş strategiya Rusiya xalqının həyat keyfiyyətinin yaxşılaşdırılmasına və qorunmasına, Rusiya Federasiyasının müdafiə qabiliyyətinin daha da gücləndirilməsinə, Rusiya cəmiyyətinin daxili birliyinə və həmrəyliyinə kömək, milli inkişaf hədəflərinə nail olmaq, ölkənin rəqabət qabiliyyətini və beynəlxalq nüfuzunu artırmaq məqsədilə hazırlanıb.
Strategiyanın yeni versiyasında ən yüksək prioritet Rusiya xalqının qorunub saxlanmasına verilir. Bundan əlavə, Rusiyanın beynəlxalq aləmdə proqnozlaşdırma səviyyəsinin artırılması, güvən və təhlükəsizliyi yaxşılaşdırmaq istəyi vurğulanır. Eyni zamanda, Rusiya Federasiyasının suverenliyinə və ərazi bütövlüyünə təhlükə yaradan dost olmayan hərəkətlərin qarşısını almaq üçün simmetrik və asimmetrik tədbirlərin qəbul edilməsinin qanuniliyi qeyd edilir.
Bildirilir ki, Rusiyanın qəbul etdiyi yeni strategiya bir neçə gün əvvəl imzalanan Bayden-Conson Xartiyasına cavab sayılır. Bu versiyanı nə dərəcədə əsaslı saymaq olar?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Bayden və Consonun imzaladığı Yeni Atlantik Xartiyası olduqca mühüm sənəddir: “Xüsusilə də orada dövlətlərin suverenliyi və ərazi bütövlüyünün vacibliyi vurğulanır. Bu, Qarabağla bağlı məsələdə bizim üçün faydalı sayıla bilər. Sənəddə NATO-ya üzv olan müttəfiqlərin maraqlarının qorunması ilə bağlı müddəa da yer alıb. Bu da Türkiyəyə qarşı Qərbin bəzi ölkələrinin mövqeyinin dəyişəcəyilə bağlı bizdə ümidlər yaradır. Putinin imzaladığı Milli Təhlükəsizlik Strategiyasının sırf bu sənədlə əlaqəli olduğunu düşünmürəm. Çünki bu, qısa müddətdə hazırlanan sənəd deyil ki, Atlantik Xartiyasına alternativ olsun. Bunun hazırlanması üçün uzun vaxt sərf edilir. ABŞ-la İngilətərə rəhbərlərinin imzaladığı sənəddə yeni detalların, demək olar ki, çox az olduğu qeyd olunur. Rusiyanın qəbul etdiyi Strategiyada Xartiyaya cavab sayılan detallar kifayət qədər var. Bu da tərəflərin ənənəvi mövqeyindən qaynaqlanır. Rusiyanın yeni Strategiyasında daha çox hegemonluğun qorunmasına, milli birliyə töhfə məsələsinə ciddi yer ayrılıb. Bu bir daha göstərir ki, Qərblə Rusiya arasındakı gərginlik, nəinki azalıb, əksinə, şiddətlə davam edəcək. Bundan sonra ciddi addım atılmasa, prosesin yaxşılığa doğru gedəcəyinə ümid yeri qalmır”.
Məhəmmədli QƏRİBLİ
