Azərbaycanda müstəqil medianın dövlət tərəfindən maliyyələşdirilməsində yeni mərhələ başladı. Müstəqil mediamızın 2009-cu ildən başlanmış bütün dövlət maliyyələşmə tarixində ilk dəfə olaraq çap media ilə yanaşı, saytların da şəffaf maliyyələşdirilməsinə start verildi. Ola bilər ki, kənardan bir çoxlarına bu asan gəlir. Düşünürlər ki, burada nə var ki, dövlətin ayrıdığı pulu bölüşdürürsən media subyektlərinin arasında, iş bitib gedir. İşin içində olanlar bilir ki, bu olduqca məsuliyyətli bir prosesdir. Təbiidir ki, istənilən ideyanın, layihənin həyata keçirilməsində 100 faizlik ideallıq təmin olunmur. Əyər-əskiklik hər işdə olur və olacaq. Bundan əlavə, söhbət puldan və onu alan jurnalist təbəqəsindən gedirsə, vəziyyət bir qədər də qəlizləşir. Əvvəla, pul elə şeydir ki, onu sevməyən yoxdur. Haqqı çatan da, çatmayan da onu əldə etmək istəyir. İkincisi isə, bu pul jurnalistlər kimi həssas təbəqə arasında bölüşdürülürsə, deməli, məsuliyyət bir qədər də artmış olur.
Biz bu prosesi 2009-cu ildən bu tərəfə müşahidə edirik. Qəzetlərə maliyyə ayrılan ilkin illəri göz qabağına gətirək. Hər qəzet çıxaran pul almağa iddialıydı. İndi prosesdən görürük ki, ölkədə öz mövcudluğunu qoruyan qəzetlərin, demək olar ki, hamısı maliyyələşmədən bəhrələnir. Bu istiqamətdə səs-küy yoxdur. MEDİA adlı qurum yaranandan sonra həyata keçirdiyi ən vacib layihələrdən biri onlayn medianın maliyyələşməsi ilə bağlı məsuliyyəti üzərinə götürməsi oldu. Etiraf edək ki, bu sahədə vəziyyət qəzetlərdən daha ağırdı. Çünki hazırda sayt açıb onlayn media adına iddalı olan subyektlərin sayı həddən artıq çoxdur. 20 manata bir domen alıb, 200 manata sayt yığdırıb adını baş redaktor yazdıran kifayət qədər belə iddialı subyektlər var. Bütün bu dedi-qoduların, müəyyən narazılıqların olacağı gözləniləndi. Media adı ilə həyata keçirilən hansı layihədə belə olmayıb ki? Ancaq budəfəki prosesin fərqli tərəfi nəzərə çarpır. Prosesi təqdir edib, razılıq ifadə edənlər də az deyil. Söhbət yalnız pul alan saytlar və onların sahiblərinin mövqeyindən getmir. Kənar müşahidəçilər, media ekspertləri hesab edirlər ki, bu yolla saytların iqtisadi müstəqilliyi təmin oluna bilər. Hələlik bir neçə sayta maliyyə ayrılıb. Düzdür, iddialı olan, maliyyələşməyə haqqı çatanların hamısı əhatə olunmayıb. Ancaq prosesin bitdiyini də heç kim demir. Əksinə, bildirilir ki, növbəti prosesdə daha çox saytın adı maliyyələşməyə düşəcək. Ola bilər ki, ilkin maliyyə alan saytlardan bəziləri qoyulan tələbləri yerinə yetirmədikləri üçün başqaları ilə əvəzlənsinlər. Etirazların fonunda maraqlı detallar da nəzərimizdən qaçmadı. Hətta maliyyədən bəhrələnən bəzi media subyektlərinin rəhbərlərinin prosesə lağla yanaşdığının şahidi olduq. Bu fonda irad belə olub ki, yeni saytlarla tanınmışlar niyə bir siyahıya salınır və s. Çox bəsit yanaşmadır. Bu siyahıda layiq olan bütün saytların adı keçməlidir. Yeni yaradılana dəstək lazımdır ki, ayaqda qalsın. Tanınmış sayta da maliyyə olmalıdır ki, fəaliyyətini, qazandığı uğurları davam etdirə bilsin. Bəli, MEDİA saytların maliyyələşməsində məhz bu qızıl ortanı tapa bildiyi üçün maliyyələşmə ilə bağlı atdığı ilk addımı təqdirəlayiq saymaq olar.
Məhəmmədəli QƏRİBLİ
