Bu gün Azərbaycanda media subyekti adına iddialı olan kifayət qədər qəzet, sayt, bloq olsa da, onların heç də hamısı bu parametrlərə cavab vermir.
Bildiyimiz kimi, Medianın İnkişafı Agentliyi tərəfindən onlayn media subyektlərinin maliyyələşdirilməsi ilə bağlı elan edilən müsabiqədə 30-dan artıq sayt qalib gəlib. Qaliblər siyahısında adı olmayan bəzi saytların rəhbərləri bu müsabiqə ətrafında qaralama kampaniyası aparır, müəyyən arqumentlər irəli sürürlər, iddia edirlər ki, maliyyə alan saytlar heç də o parametrlərə uyğun gəlmirlər və sair.
Bu müsabiqənin nəticələrini qaralamaq istəyən saytların iddialarının əsassız olduğunu deyən “Yeniçağ.az”ın baş redaktoru Aqil Ələsgər “Bakı-Xəbər”ə bildirdi ki, MEDİA-nın keçirdiyi müsabiqəyə və onun nəticələrinə kölgə salmaq, qara yaxmaq istəyənlərin niyyətlərini anlamaq elə də çətin deyil, onlar heç cür başqasının uğurlarını həzm edə bilmirlər. MEDİA-nın təşkil etdiyi müsabiqənin obyektiv və şəffaf keçirildiyini deyən A.Ələsgərin sözlərinə görə, bu işə qara yaxanlar öz həmkarlarına paxıllıq edənlərdir. “Açığını deyək, jurnalistin jurnalistdən başqa düşməni yoxdur. Digər peşə sahibləri arasında mövcud olan həmrəylik, bir-birinin uğurlarını qəbul etmək çox təəssüf ki, jurnalistlər arasında müşahidə olunmur. Biz bunu əvvəlki proseslərdə də dəfələrlə görmüşük. Necə ki, birinci və ikinci jurnalist binalarında mənzillərin jurnalistlər arasında bölüşdürülməsi prosesində bəzi jurnalistlərin davranışları, hərəkətləri hamını üzmüşdü, narahat etmişdi, hətta narazılıqların ifadə olunmasında qarğış notlarından da istifadə edənlər olurdu.
Medianın İnkişafı Agentliyi müsabiqədə qalib gələn saytların siyahısını açıqladıqdan sonra da eyni mənzərənin şahidi olduq. Burada qara yaxanlar, narazılıq edənlər tapıldı. Əslində, onların narazılığı gözlənilən idi. Heç kəs öz saytının səviyyəsinə, gördüyü işə baxmır, amma istəyir ki, onun saytı seçilsin. Bir sözlə, heç kəs öz ayranına turş demir”.
A.Ələsgər hesab edir ki, bu proses yeni başlayıb, ilk dəfədir saytlarla bağlı belə bir qərar verilir, bəlkə gələcəkdə bu gün adı siyahıda olmayan saytlar da olacaq. Onun sözlərinə görə, dövlətin qoyduğu şərtlər də bəllidir, bu şərtlərə uyğun fəaliyyət göstərənlər, əlbəttə, bundan sonra da dövlətdən dəstək alaraq fəaliyyətlərini davam etdirəcəklər: “Yox, şərtlərə uyğun fəaliyyət göstərməyəcəklərsə, o saytlar prosesdən kənarda qalacaqlar. Onun üçün də Medianın İnkişafı Agentliyinə və qalib saytların siyahısına qarşı “səlib yürüşünə” çıxmaq heç vaxt düzgün deyil. Həmkarlarımız səbrli davranmalı və prosesləri izləməli, eyni zamanda da öz nöqsanlarını (əgər varsa, bunu özləri daha yaxşı bilirlər - A.Ə.) düzəltmək üçün addımlar atmalı, nəinki hər kəsi qılınclayıb qalib gələn həmkarlarının sevinclərini qursaqlarında buraxmamalıdırlar. Məncə, biz qalibi təbrik etməyi əvvəl-axır öyrənməliyik” - deyə A.Ələsgər qeyd etdi.
İradə SARIYEVA
