Məlum olduğu kimi, Azərbaycan Respublikasının Medianın İnkişafı Agentliyi (MEDİA) tərəfindən onlayn media subyektlərinin (veb-saytların) inkişafı, iqtisadi müstəqilliyinin gücləndirilməsi, fəaliyyətinin təkmilləşdirilməsi, dövlət və cəmiyyət üçün əhəmiyyət kəsb edən layihələrin həyata keçirilməsi məqsədilə təşkil edilən müsabiqənin qalibləri açıqlanıb.
Müsabiqənin qalibləri ilə həmsöhbət olduq. Baş redaktorlar hesab edirlər ki, MEDİA tərəfindən saytlara maliyyə yardımının edilməsi onlayn medianın inkişaf etməsinə səbəb olacaq.
Bahəddin Həziyev: “...ilk təcrübədir və düşünürəm, getdikcə daha da təkmil forma və yaradıcı məzmun ala biləcək”
"Bizim Yol" saytının baş redaktoru Bahəddin Həziyev “Bakı-Xəbər”ə açıqlamasında bunları qeyd etdi: “Bizimyol.info” olaraq biz də Medianın İnkişafı Agentliyinin müsabiqəsində iştirak etdik. Artıq müsabiqənin nəticələri də açıqlanıb. Bu müsabiqələrdən keçən bütün çap və elektron media quruluşlarını, həmkarlarımı təbrik edirəm, uğurlu-xeyirli olsun deyirəm. Jurnalist əməyi ağır əməkdir və hesab edirəm ki, bu imkandan istifadə edərək jurnalistləri yaradıcılığa maddi olaraq daha da stimullaşdırmaq olar. Yəni bəlkə kiçik də olsa, bir dəstəkdir və gələcəkdə daha böyük və daha effektiv olacağına inanıram. Doğrudur, müxtəlif fikirlər var, tənqidi qeydlər var. İşin daha da irəliləməsi üçün təkliflər də edilir. Bunları da təhlil edib, maraqlı və faydalı olanlarını nəzərə almaq lazımdır. Ümid edirəm ki, gələcəkdə nəzərə alınacaq.
Bəli, “Bizimyol.info” da bu müsabiqədən keçib. Biz müşahidə edirik ki, nə keçmişdə "Bizim Yol" qəzetinin keçmiş KİVDF xəttilə, nə də indi “Bizimyol.info” saytına MEDİA xəttilə maliyyə dəstəyinin göstərilməsi mübahisə mövzusu olmayıb və deyil, iradlar doğurmur. Hətta həmkarlarımız layiq olduğumuzu yazırlar. "Bizim Yol" qəzeti də 2019-cu ilin əvvəlində o zamankı KİVDF-nin qərarı ilə əsassız və hətta müəmmalı olaraq maliyyələşmədən kənarda buraxılanda bu, mediada və sosial şəbəkələrdə bizə qarşı haqsızlıq kimi dəyərləndirildi. İyulun 1-də verilən qərarda da bizim olmağımızı bu məsələlərə ən çox tənqidi yanaşan həmkarlarımız da təqdir ediblər. Bu, çox sevindirici və qürurverici bir qiymətdir. Bizi dəstəkləyən hər kəsə təşəkkür edirəm. Hər şeyin ideal olduğunu kimsə deyə bilməz. Xüsusilə veb-saytların maliyyələşməsi kimi çətin bir işdə. Subyektiv yanaşmalar, yanlış dəyərləndirmələr ola bilər. Heç kim səhvlərdən sığortalanmayıb. Bizə maliyyə dəstəyi ayrılmasaydı belə, biz bu sahədəki öz bilik və təcrübəmizi bu işə kömək üçün bölüşməyə hazır olduğumuzu demişdik. Düşünürəm ki, Medianın İnkişafı Agentliyi də haqlı, əsaslı tənqidləri, faydalı təklifləri öyrənəcək, nəzərə alacaq. Medianın işi yaradıcı iş olduğu üçün media ilə iş də yaradıcılıq işidir. Biz həm doğru, həm yanlış qərarlardan, addımlardan öyrənə-öyrənə yeni, daha üst mərhələyə çata bilərik. Nə etdiklərimizin hamısının doğru olduğunu deməliyik, nə də tənqiddən çəkinib heç nə etməmək yolunu seçməliyik. Tənqidləri iqnor etmək, daha pisi, susdurmağa çalışmaq bizi yanlışa sürükləyər. Ancaq tək tənqid də deyil, təqdirlər də var. Düşünürəm ki, MEDİA da bunlardan doğru nəticələr çıxararaq, işini gələcəkdə daha da səmərəli quracaq. Bu gün dəstək almayan saytlar bəlkə sabah bizdən də çox uğur qazanıb dəstək ala biləcəklər. Saytların maliyyələşməsi ilk təcrübədir və düşünürəm, getdikcə daha da təkmil forma və yaradıcı məzmun ala biləcək”.
Seymur Verdizadə: “Qalib olan saytlar əmək münasibətlərinin leqallaşdırılmasının qeydinə qalacaq, nəhayət, “qara mühasibatlıq” anlayışı ortadan qalxacaq”
“Yenisabah.az” saytının baş redaktoru Seymur Verdizadə bildirdi ki, Medianın İnkişafı Agentliyinin saytlar üçün təşkil etdiyi müsabiqənin nəticələrinin birmənalı qarşılanmaması normaldır: “Aydın məsələdir ki, hamı rəhbərlik etdiyi, yaxud çalışdığı saytın adını qaliblərin siyahısında görmək istəyir. Ümid edirəm ki, narazılıqlar araşdırılacaq, təkliflər nəzərə alınacaq. MEDİA rəhbərliyi müzakirələrə açıqdır, bütün rəyləri dinləmək istəyir. MEDİA-nın qapısı jurnalistlərin üzünə açıq olduğu üçün hər kəs öz fikrini sərbəst şəkildə ifadə edə bilər. Hesab edirəm ki, KİV-in maddi sıxıntı içində olduğu indiki dönəmdə dövlətin maliyyə dəstəyi verəcəyi qəzet və saytların seçimi əvvəlki dövrlə müqayisədə xeyli obyektivdir. Siyahıya nəzər salsaq görərik ki, orada çox sayda müstəqil media orqanının adı var. Bu fakt özlüyündə əhəmiyyətli irəliləyişdir və müstəqil mətbuatın inkişafına töhfə sayıla bilər. MEDİA indiyə kimi qəzetlərə maddi dəstək vermişdi. Saytlarla bağlı bu addım isə ilk ciddi təcrübədir. Bu qərar qəbul edilərkən tanınmış jurnalistlərlə müntəzəm məsləhətləşmələr aparılıb, media ictimaiyyətinin rəy və təklifləri nəzərə alınıb. Qarşıdakı dövrdə bu praktika daha da təkmilləşəcək. Ən çox təqdir etdiyim məqam MEDİA-nın bu müsabiqə üçün irəli sürdüyü şərtlərdir. Qalib olan saytlar əmək münasibətlərinin leqallaşdırılmasının qeydinə qalacaq, nəhayət, “qara mühasibatlıq” anlayışı ortadan qalxacaq. Bu isə jurnalistlərin gələcəkdə daha yaxşı pensiya alması deməkdir. Dövlət dəstəyinin jurnalistin gələcək təminatının yaxşılaşdırılmasına yönəlməsini alqışlayıram”.
Aqil Ələsgər: “...mətbuatın ümumi inkişaf strategiyasının tərkib hissəsi olaraq çox müsbət addımdır”
“Yeni Çağ” Media Qrupunun direktoru Aqil Ələsgər bildirdi ki, hələ ötən dönəmlərdən uzun müddətdir davam edən gözləntilərin yekununda Medianın İnkişafı Agentliyinin (MEDİA) onlayn mediaya maddi dəstək proqramını həyata keçirməsi mətbuatın ümumi inkişaf strategiyasının tərkib hissəsi olaraq, çox müsbət və əhəmiyyətli addımdır: “Mövcud vəziyyətdə onlayn medianın, ümumiyyətlə, mətbuatın dayanıqlı fəaliyyətinin və əlbəttə ki, mümkün inkişafının təmin olunması baxımından, bu dəstəyin müsbət təsiri, məncə, özünü çox gözlətməyəcək. Bu dəstək həm də onun göstəricisidir ki, medianın inkişafına yönəlik atılan addımlar, cənab Prezidentin təqribən 10 il əvvəl bəyan etdiyi prinsiplər ardıcıllıqla öz yerini tutmaqdadır.
Bu mənada, fəaliyyətə başlamasından qısa müddət keçən MEDİA-nın öz funksiyasını yüksək səviyyədə həyata keçirdiyi mütləq qeyd olunmalıdır. Hər halda, MEDİA rəhbərliyinin ölkənin aparıcı KİV rəhbərləri ilə görüşləri, jurnalistlərin peşəkarlığının artırılmasına hədəflənmiş seminar və başqa tədbirləri, o cümlədən, media orqanlarının maddi-texniki bazasının gücləndirilməsinə hədəflənmiş addımları prosesin davamlı olacağının təsdiqidir. Sözsüz ki, görülən bu işlər fonunda onilliklər boyunca ölkədə medianın inkişafına cavabdeh olmuş strukturların və məmurların yarıtmaz fəaliyyəti, medianın inkişafına deyil, onun boğulmasına hesablanmış qərarları xatırlanır, bu zaman əsaslı müqayisə imkanı yaranır. Bu müqayisənin ortaya çıxardığı gerçəklik isə hər kəsin görəcəyi qədər ortadadır.
Sözsüz ki, mətbuatın, xüsusilə də onlayn medianın inkişafını bütünlüklə dövlət dəstəyinə bağlamaq doğru olmazdı. Medianın maddi bazasının formalaşması və onun biznes struktur kimi təşəkkül taparaq rentabelli sahəyə çevrilməsinin təmin olunması zəruridir. Bunun üçünsə, ilk növbədə, medianın reklam bazarı formalaşmalıdır. Belə olan təqdirdə, həm media özünü maliyyələşdirmək imkanında olacaq, həm də dövlətin yükü azalacaq. İnanıram ki, indi vüsət alan proses, nəticə etibarilə, həmin nöqtəyə aparacaq”
Ruslan Bəşirli: “...onlayn medianın inkişafına səbəb olacaq”
“Avropa.info” saytının direktoru Ruslan Bəşirli qeyd etdi ki, Azərbaycanda ilk dəfə onlayn mediaya maddi yardım ayrılması hadisəsi baş verdi: “Uzun müddət idi ki, bu haqda danışılırdı, təşəbbüslər irəli sürülürdü. Lakin Medianın İnkişafı Agentliyinin qurulmasından sonra bu proses sürətləndirildi. MEDİA-nın keçirdiyi müsabiqənin nəticələrinə diqqət yetirdikdə görünür ki, daha çox maddi təminata ehtiyacı olan saytlar və xəbər portalları diqqətə alınıb. Bu baxımdan, müsabiqənin nəticələrini doğru hesab edirəm. Hesab edirəm ki, MEDİA-nın keçirdiyi bu müsabiqə onlayn medianın inkişafına səbəb olacaq. Şübhəsiz ki, medianın inkişafı üçün atılan bütün bu addımlar cənab Prezident İlham Əliyevin siyasi iradəsinə dayanır. Ölkə başçısı Azərbaycanda həm onlayn, həm də çap medianın inkişafında maraqlıdır və bir qəzetçi olaraq bu bizi sevindirir”.
Fərid Şahbazlı: “Medianın İnkişafı Agentliyi yarandığı qısa müddət ərzində medianın bütün sferalarını əhatə etməyə çalışır”
“Editor.az” portalının rəhbəri Fərid Şahbazlı bildirdi ki, Medianın İnkişafı Agentliyi yarandığı qısa müddət ərzində medianın bütün sferalarını əhatə etməyə çalışır: “Məlumdur ki, bundan əvvəl fəaliyyət göstərən Kütləvi İnformasiya Vasitələrinə Dövlət Dəstəyi Fondunun fəaliyyətində internet media subyektləri diqqətdən kənarda qalırdı. Baxmayaraq, ictimai rəyin formalaşmasında internet medianın rolu böyükdür. Ancaq bu sahə dövlət dəstəyindən kənarda qalırdı.
MEDİA-nın elan etdiyi müsabiqənin şərtləri başadüşülən və normal şərtlərdir. Məlum şərtlər normal fəaliyyət göstərən bütün internet media resursları üçün uyğundur”.
Həmsöhbətimiz hesab edir ki, istənilən müsabiqə zamanı narazılar olur: “Ancaq hesab edirəm ki, Medianın İnkişafı Agentliyinin açıqladığı siyahıda ölkədə ictimai rəyin formalaşmasında mühüm rol oynayan xəbər resursları qaliblər siyahısındadır. Həmin xəbər saytları bu günə qədər böyük büdcəyə sahib olmayıblar”.
F.Şahbazlı onu da əlavə etdi ki, MEDİA-nın fəaliyyətindən açıq şəkildə bəlli olur ki, Azərbaycan mediasında fundamental dəyişikliklərə nail olmaq istəyir: “Bura jurnalistlərin peşə hazırlığının artırılması, medianın maddi-texniki bazasının gücləndirilməsi, beynəlxalq əməkdaşlıq imkanının artırılması, həmçinin, qanunvericilik bazasının təkmilləşdirilməsi kimi istiqamətləri əhatə edir. Qalib həmkarları təbrik edirəm, digər həmkarlara isə növbəti mərhələlərdə uğurlar arzu edirəm. Bu müsabiqənin nəticələri ölkəmizin internet media məkanında rəqabətliliyi artıracaq, internet medianı keyfiyyətcə yeni mərhələyə qaldıracaq və ümumilikdə, qazanan Azərbaycan mediası olacaq”.
Günel CƏLİLOVA
