44 günlük müharibədən sonra general, korpus komandiri Rövşən Əkbərovun adı yenidən gündəmdə oldu. Çox maraqlıdır ki, onun adı müharibədə şücaət göstərən general qismində deyil, tutduğu vəzifədən uzaqlaşdırılması məsələsinə görə gündəmdə oldu.
Ümumiyyətlə isə, ordu korpusu komandanı, general-leytenant Rövşən Əkbərovun personası vəzifədə olduğu dönəmdə daim gündəmdə olub. 20 ilə yaxın idi ki, onun adı iş adamı Elçin Əliyevin qətlində əsas fiqurant kimi keçirdi. Elçin Əliyev 2000-ci ilin əvvəllərində Ukraynanın paytaxtı Kiyevdə tanınmış azərbaycanlı iş adamlarından biri olub. O dövrlərdə Elçin Əliyevin biznesinin əks-sədası Bakıya qədər gəlib çatırdı. Hətta onun Azərbaycanda yüksək posta təyinat ala biləcəyi xəbərləri dolaşırdı. Amma 2001-ci ilin yayında Elçin Əliyevlə bağlı sarsıdıcı xəbər yayıldı, bir anda bütün mətbuatın diqqət mərkəzinə gəldi. İlk günlər bilinən o idi ki, tanınmış biznesmenin ürəyinə hərbi bıçaqla zərbə endirərək qətlə yetiriblər. Az sonra qətldə Rövşən Əkbərovun adı hallanmağa başladı. Sonradan isə Rövşən Əkbərovun Bakıda olması və vəzifə təyinatı alması xəbəri gəldi. Ötən illər ərzində Elçin Əliyevin anası Səmayə Əliyeva oğlunun qətlinin açılması üçün çabalar göstərib, mətbuat konfransları keçirib, Avropa Məhkəməsinə müraciət edib. Səmayə Əliyeva oğlunun dəhşətli qətlində israrla Rövşən Əkbərovun adını çəkib, onu ittiham edib. Lakin Rövşən Əkbərovun vəzifədə olması bu ittihamların obyektiv araşdırılmasına mane olub. Vəzifəsindən uzaqlaşdırılandan sonra Rövşən Əkbərov məhz Kiyevdə baş verən qətl hadisəsinə görə həbs edildi.
Rövşən Əkbərovun barəsində olan cinayət işi üzrə Baş Prokurorluq tərəfindən istintaq yekunlaşdırılıb. Bu barədə Baş Prokurorluqdan məlumat verilib. Əvvəllər xəbər verildiyi kimi, aparılmış istintaqla Rövşən Əkbərovun 2001-ci il mayın 31-dən iyunun 1-nə keçən gecə Kiyev şəhəri, Deqtyaryov küçəsi 7 ünvanında yerləşən “Sikora” kafesində yeyib-içdikdən sonra saat 04 radələrində həmin kafenin yaxınlığında Elçin Əliyevlə aralarında yaranmış cüzi münaqişə səbəbindən xuliqanlıq niyyətilə sonuncunun ürək nahiyəsinə kəsici-deşici predmetlə xəsarət yetirərək Elçin Əliyevi qəsdən öldürməsinə əsaslı şübhələr müəyyən edilib. Rövşən Əkbərova Cinayət Məcəlləsinin 12.1, 120.2.2 (qəsdən adam öldürmə) və 12.1, 221.3-cü (xuliqanlıq) maddələri ilə ittiham elan edilərək, barəsində məhkəmənin qərarı ilə həbs qətimkan tədbiri seçilib. Hazırda cinayət işi baxılması üçün Bakı Hərbi Məhkəməsinə göndərilib. Qeyd edək ki, Rövşən Əkbərov həm də Azərbaycanın Milli Qəhrəmanı adını daşıyır. Maraqlıdır, ittihamlar sübuta yetirilərsə onu nə qədər həbs gözləyir? Rövşən Əkbərov Mili Qəhrəman adından və general rütbəsindən məhrum oluna bilərmi? Hüquqşunaslar hesab edir ki, irəli sürülən ittiham üzrə təqsirli bilinərsə, onu 14 ildən 20 ilədək müddətə azadlıqdan məhrumetmə cəzası gözləyir.
Cinayət Məcəlləsinin 12.1-ci maddəsi ölkə hüdudlarından kənarda cinayət törətməkdə təqsirləndirilən şəxslərin Azərbaycanda cinayət məsuliyyətinə cəlb edilməsinin əsaslarını nəzərdə tutur. Belə ki, Azərbaycan vətəndaşları ölkə hüdudlarından kənarda törətdikləri əmələ görə, bu əməl həm Azərbaycanın, həm də ərazisində törədildiyi xarici dövlətin qanunvericiliyinə əsasən cinayət sayılırsa və bu cinayətə görə həmin şəxslər xarici dövlətdə məhkum olunmamışsa, Azərbaycan Cinayət Məcəlləsi əsasında cinayət məsuliyyətinə cəlb edilir.
Cinayət Məcəlləsinin 120.2.2-ci maddəsi 14 ildən 20 ilədək müddətə azadlıqdan məhrumetmə cəzasını nəzərdə tutur. Xüsusilə ağır cinayət hesab edilən bu əmələ görə məsuliyyətə cəlbetmə müddəti 20 ildir.
Qeyd etdiyimiz kimi, R.Əkbərov Azərbaycanın Milli Qəhrəmanıdır. Bu fəxri ad ona Prezidentin (mərhum Heydər Əliyev) 5 oktyabr 1994-cü il tarixli fərmanı ilə verilib. R.Əkbərov 2011-ci ildən orduda birlik komandiri vəzifəsini tutub. İki dəfə "Azərbaycan Bayrağı" ordeni ilə, bir neçə dəfə isə müxtəlif orden və medallarla təltif edilib. Ancaq İkinci Qarabağ müharibəsi müddətində onun adı heç bir döyüş əməliyyatında hallanmayıb və sonradan təltif edilənlər sırasında da olmayıb. Bəs cinayət işi üzrə təqsirli bilinən Rövşən Əkbərov hansı halda Milli Qəhrəman adından məhrum edilə bilər?
Qanunvericiliyə görə, mükafatlardan məhrumedilmə məhkəmənin qanuni qüvvəyə minmiş qərarı ilə mümkündür. Bu zaman məhkəmə mükafatı verən struktura müraciət edərək, şəxsin həmin mükafatdan məhrum edilməsini istəyir. Məlum olduğu kimi, fəxri adların verilməsi yalnız ölkə başçısının səlahiyyətinə daxildir. Buna görə də məhkəmənin qanuni qüvvəyə minmiş hökmü ilə Prezident onu Milli Qəhrəman adından məhrum edə bilər.
R.Əkbərov eyni zamanda, general rütbəsindən də məhrum edilə bilər. Bununla da bağlı qərarın verilməsi məhkəmə təqdimatı əsasında Prezidentə məxsusdur. Hazırda Azərbaycanda 218 nəfərin Milli Qəhrəman adı var.
Daha əvvəl isə 2 nəfər Milli Qəhrəman adından məhrum edilib. Bunlar keçmiş baş nazir Surət Hüseynov və Goranboy rayonundakı “N” saylı hərbi hissənin sabiq komandiri Rasim Əkbərovdur.
Surət Hüseynova Milli Qəhrəman adı 1992-ci il oktyabrın 8-də mərhum eks-prezident Əbülfəz Elçibəy tərəfindən verilmişdi. Həmin dövrdə Surət Hüseynov baş nazirin müavini, prezidentin Qarabağ üzrə fövqəladə səlahiyyətli nümayəndəsi, ordunun korpus komandiri vəzifələrində çalışıb.
S.Hüseynov 1993-cü il 4 iyun qiyamının əsas rəhbəri olub. Prezident Əbülfəz Elçibəyin hakimiyyəti məhz Surət Hüseynovun 1993-cü ilin iyun ayında qaldırdığı hərbi qiyamla devrilib. Bundan sonra Azərbaycan prezidentinin səlahiyyətlərini icra edən parlament sədri Heydər Əliyevin imzaladığı 1993-cü il 30 iyun tarixli fərmanla Surət Hüseynov baş nazir təyin olunub.
1994-cü il oktyabrın 6-da Surət Hüseynov Milli Məclis üzvlüyündən, oktyabrın 7-də isə baş nazir vəzifəsindən azad edilib. 1994-cü il oktyabrın 14-də Milli Məclis Surət Hüseynovun cinayət məsuliyyətinə cəlb olunmasına, barəsində həbs qətimkan tədbiri seçilməsinə razılıq verilməsi və Azərbaycanın Milli Qəhrəmanı adından məhrum edilməsinin tövsiyə olunması haqqında qərar qəbul edib.
1997-ci ildə həbs edilən S.Hüseynov məhkəmənin qərarı ilə ömürlük həbs cəzasına məhkum edilib. 2004-cü il martın 17-də Prezident İlham Əliyevin imzaladığı əfv fərmanı ilə azadlığa buraxılıb.
Polkovnik-leytenant Rasim Əkbərova Prezidentin (Əbülfəz Elçibəy) 23 iyun 1992-ci il tarixli fərmanı ilə Azərbaycanın Milli Qəhrəmanı adı verilmişdi. Lakin 2001-ci ildə dövlət çevrilişinə cəhddə günahlandırılıb həbs ediləndə Azərbaycan Prezidentinin 537 saylı fərmanı ilə Rasim Əkbərov Azərbaycanın Milli Qəhrəmanı adından və “Azərbaycan Bayrağı” ordenindən məhrum edilib. Məhkəmə ona 15 il həbs cəzasə kəsmişdi.
Rasim Əkbərov Prezident İlham Əliyevin 26 avqust 2008-ci il tarixində imzaladığı əfv fərmanı ilə azadlığa buraxılıb. Göründüyü kimi, general adından, milli qəhrəman titulundan mərhum edilib ən ağır cəzaya məhkum edilməklə bağlı kifayət qədər presedent təşkil edə biləcək hadisələr baş tutub. Belə görünür ki, bu acı aqibət hazırda həbsdə olan Rövşən Əkbərovu da gözləyə bilər.
Məhəmmədəli QƏRİBLİ
