Medianın İnkişafı Agentliyindən verilən məlumata görə, agentlik tərəfindən onlayn media subyektlərinin (veb-saytların) inkişafı, iqtisadi müstəqilliyinin gücləndirilməsi, fəaliyyətinin təkmilləşdirilməsi, habelə dövlət və cəmiyyət üçün əhəmiyyət kəsb edən layihələrin həyata keçirilməsi məqsədilə təşkil edilən müsabiqənin qalibləri məlum olub. 30-dan artıq onlayn media subyekti müsabiqədə qalıb gəlib.
Çap mediası ilə paralel olaraq, bu dəfə onlayn medianın da bu şəkildə maliyyələşdirilməsi müsbət hadisə olsa da, bəziləri yenə də əsassız olaraq narazılıq edirlər, sosial şəbəkələrdə, əllərində olan media resurslarında xoşagəlməz fikirlər səsləndirirlər, iddia edirlər ki, guya seçim qeyri-obyektiv olub, “daha vacib” onlayn media qurumları kənarda qalıb. Əslində, siyahı da ortadadır, maliyyə ayrılan saytların sayı da məlumdur, adları da. Elələri var ki, əllərində beş sayt var, onlar bu saytların hamısının müsabiqədə yer tutub pul qazanmasını istəyir, amma saytlardan yalnız biri vəsait alıb, onda başlayırlar ki, seçim obyektiv olmayıb. Ümumiyyətlə, bu cür nəcib işlərə qara yaxanların niyyətini heç cür anlamaq mümkün deyil. Əlbəttə, ekspertlər, obyektiv media adamları məsələyə başqa cür yanaşırlar, bildirirlər ki, bu çox obyektiv seçim olub və vəsait ayrılan saytlar ölkə mediasında yeri, çəkisi olanlardır.
“Belələri hər şeyə qara yaxmağa öyrəşiblər”
Siyasi şərhçi, tanınmış media eksperti Azər Həsrət “Bakı-Xəbər”ə bildirdi ki, Azərbaycan cəmiyyətində plüralizm, fikir müxtəlifliyi var: “Amma bir qrup insan da var ki, onlar üçün nə edilsə, xeyri yoxdur, mütləq özlərindən nəsə bir qüsur uyduracaqlar, narazı qalacaqlar, istənilən məsələyə bir “mız” qoyacaqlar. Mən onlara loru dildə “mız qoyan”lar, “vedrə bağlayanlar” deyirəm. Belələri hər şeyə qara yaxmağa öyrəşiblər. Mən o siyahıya baxmışam, MEDİA həqiqətən də kifayət qədər tanınmış onlayn media sübyektlərinə, qəzetlərə maliyyə ayırıb. Sözsüz, bu siyahıda yer alan media subyektləri ölkəmizdə haqqı çatan, layiq olan media qurumlarının hamısı demək deyil, təbii, qıraqda qalan ola bilər. Amma bu, obyektivliyi kölgə altına salmaq üçün yetərli arqument deyil. Ona görə ki, resurslar məhduddur, bəlli bir sayda media qurumlarına pul ayrılmalı idi, o sayda da media qurumlarına pul ayrılıb. Yəni belə olduğu şəraitdə adamlar durub iddia edə bilməzlər ki, tutalım, orada 50 deyil, 500 sayta pul ayrılmalıdır. Bu maliyyə sınırsız deyil ki, hər gələnə, hər iddia edənə verilsin. Bu baxımdan, düşünürəm ki, o adamlara çox da bənd olmaq lazım deyil, Medianın İnkişafı Agentliyi doğru yoldadır, düzgün qərar verib”.
A.Həsrət ona inanır ki, Medianın İnkişafı Agentliyinin rəhbərliyi həqiqətən də Azərbaycana faydalı ola biləcək media subyektlərinə maliyyə ayrılmasına çalışıb. O hesab edir ki, iş olan yerdə xırda nöqsanlar, hansısa gözdən qaçırmalar tam mümkündür, amma bunlar heç bir vəchlə görülən, həyata keçirilən nəcib işlərə kölgə sala bilməz. “Lakin, bütövlükdə, prosesin obyektivliyini şübhə altına almaq doğru yanaşma deyil. Düşünürəm ki, narazı qalan insanların çoxu (onlara həmkalarımız deyə bilmirik, çünki onların əksəriyyətini həmkar hesab edə bilmirik - A.H.), əllərində saytlar, media qurumları olmasına baxmayaraq, jurnalistikaya dəxli olmayan adamlardır. Bu gün bir yazını düzəməlli yaza bilməyən çoxlu sayda adam var, haqqı çatmaya-çatmaya “maliyyə almağa bizim də haqqımız vardı, amma vermədilər” deyə narazılıq edirlər. Yəni belələri artıq əməllərindən əl çəkməlidirlər. Normal, layiq olduqları bir səviyyədə münasibət bildirməlidirlər. Məsələn, götürüb qalib gələn saytlarla özlərinin saytlarını, media qurumlarını yan-yana qoymalı, xidmətlərini, səviyyəsini, jurnalistika məhsulu olaraq keyfiyyətini müqayisə etməlidirlər, ondan sonra deməlidirlər ki, bəli, mənimki daha keyfiyyətlidir, amma tutalım, “A” adlı media qurumu bizdən kifayət qədər geridədir, necə olub ki, ona maliyyə ayrılıb, bizə yox. Onda bu olardı predmet üzrə müqayisə, narazılıq. Yoxsa, ucdantutma götürüb “qeyri-obyektiv oldu” və sair söyləmək düzgün deyil. Biz nə deyirik ki, sən öz media subyektini gətir qoy qalib gələnlərlə bir sıraya, müqayisə et. Jurnalistika, elmi-nəzəri baxımından sübut et ki, sənin media qurumun o qalib gələndən daha üstündür. Biz də baxaq kənardan tərəfsiz adamlar kimi, “adam haqlıdır” deyək. Şəxsən mənim saytım Medianın İnkişafı Agentliyindən maliyyə almır, almağa da səbəb yoxdur, baxmayaraq, hazırda özüm də media işlədirəm, özü də uzun illərdir. Görürsünüz, hamını təbrik etmişəm, agentliyin gördüyü işlərin də üzərinə kölgə salan heç nə demirəm” - deyə A.Həsrət vurğuladı.
İradə SARIYEVA
