Ermənistanda parlament seçkisindən müəyyən müddət keçsə də, bu ölkədə siyasi müstəvidə qeydə alınan gərginlik hələ də səngimək bilmir. Əksinə, hadisələrin inkişaf axarı qarşıdakı dövr ərzində ölkədə daha ciddi fəsadların yaranacağını istisna etmir. Hər halda, postseçki dövründə başlanan repressiyalar da bunu təsdiq edir.
Bunun əvəzində müxalifət yenə əvvəlki kimi hakimiyyəti İkinci Qarabağ müharibəsində məğlubiyyətdə, ölkəni ağır böhrana sürükləməkdə ittiham edir. Erməni ictimai xadim Lilit Poqosyanın bu fonda yazdıqları olduqca maraqlı görünür: “Azərbaycan qalib gəlmiş prezidentə sahibdir. O, gündə bir neçə dəfə 20 iyun seçkiləri ilə Ermənistanın saxta baş nazirinin imzaladığı qeyd-şərtsiz kapitulyasiya aktını ratifikasiya etmiş erməni cəmiyyətinə yumruq göstərir. Azərbaycan qılıncı şərəflə qınına qoyan, erməni ordusunu məhv etməyi az hesab edərək ölkəsinin Silahlı Qüvvələrini səylə silahlandıran, möhkəmləndirən, modernləşdirən Ali Baş Komandana sahibdir. Ermənistan isə özünün uydurduğu “vətən” müharibəsini biabırcasına uduzmuş, uğursuz olmuş, növbə ilə bütün xarici oyunçuların, eləcə də rəqibin ayaqqabılarını yalayan fərari “ali baş komandan”a sahibdir. O, ardıcıl şəkildə müdafiə xərclərini azaldır və ordunu ləğv etmək - iki illik məcburi hərbi xidməti “beş ildən bir üç aylıq” təlimlərlə əvəz etməklə hədələyir”. Bu fonda erməni müxalifətinin lideri hesab edilən sabiq prezident Robert Köçəryan son açıqlamaları ilə cəmiyyəti faktiki qanuni hakimiyyətə qarşı itaətsizliyə və inqilaba çağırıb. Onun “il yarım sonra Ermənistanda erkən seçkiyə tələbat yaranacaq, biz bu hakimiyyəti sakit buraxmayacağıq” fikri də bundan xəbər verir. Ekspertlər qeyd edir ki, seçkidə yenə qələbə qazanan Nikol Paşinyanı bundan sonra, müharibə istisna olmaqla, yenidən erkən seçki keçirməyə heç nə vadar edə bilməz. Buna baxmayaraq, Paşinyan qarşısındakı əsas maneə olan Köçəryanı neytrallaşdırmaq barədə düşünür. Təsadüfi deyil ki, keçmiş prezidentə qarşı yenidən məhkəmə işi başlayıb. Doğrudur, hazırda deputat mandatına malik olan Köçəryanı həbs etmək elə də asan deyil. Ancaq Köçəryan həddini aşarsa, parlamentdə səs çoxluğuna malik Paşinyan eks-prezidentin deputat toxunulmazlığını ləğv edə bilər. İndilikdə isə Paşinyan Köçəryana sadiq olan məmurları sıradan çıxarır. Ermənistanın Lori vilayətinin qubernatoru, hakim “Vətəndaş Müqaviləsi” partiyasının üzvü Aram Xaçatryanın açıqlamaları da bunu sübut edir.
Aram Xaçatryan bildirir ki, 20 iyun seçkisində məğlub olmuş siyasi qüvvələri dəstəkləyən yerli icra başçıları istefaya getməlidir. “Azatutyun” radiosunun məlumatına görə, qubernator iddia edib ki, bu icra nümayəndələrinə həmin icmalarda etimad yoxdur və dəstəklədikləri siyasi qüvvələrin məğlubiyyəti onların da məğlubiyyəti hesab olunur: “Bu mənim subyektiv fikrimdir ki, bu adamlar istefaya getməli və yenidən seçkidə iştirak etməlidirlər. O zaman məlum olar ki, onlara etimad var, ya yox. Bu, yeganə sivil yoldur. Mən əminəm ki, onların bir çoxu yenidən seçiləcəyinə inanmır”.
Xatırladaq ki, son seçkilər zamanı bir sıra yerli icra başçıları növbədənkənar parlament seçkisində Nikol Paşinyana müxalif olan qüvvələri dəstəkləyib. Belə qüvvələrdən biri də Robert Köçəryanın “Ermənistan” seçki bloku olub. Bəziləri isə daha bir keçmiş prezident Serj Sarkisyanın adı ilə bağlılığı olan “Şərəf duyuram” blokuna səs verib. Məsələn, Güləgərək icmasının başçısı Mqer Gevorkyan seçkiqabağı dövrdə öz siyasi mövqeyini gizlətməyərək, açıq şəkildə “Ermənistan” blokunu dəstəkləmişdi. Lakin onun başçı olduğu ərazidə Köçəryanın blokuna 6700 seçicidən yalnız 710-u səs verib. Bu bölgədə hakim “Vətəndaş Müqaviləsi” partiyasına üç dəfə çox səs verildiyi bildirilir. Lakin bu kəndə 19 ildir başçılıq edən Gevorkyan istefa vermək fikrində olmadığını deyib: “Mən niyə istefaya getməliyəm? Məni adamlar seçiblər. Ümumi iclas mənə nə vaxt “çıx get” desə, onda gedərəm. Mən hətta gələn seçkidə də namizədliyimi verəcəyəm”. Lakin Lori vilayətinin qubernatoru Aram Xaçatryan iddia edir ki, tezliklə insanlar hər bir bölgədə onlara verilmiş “polad mandatı” hiss edəcəklər. Qubernator ad çəkmədən bildirib ki, seçkiqabağı dövrdə vətəndaşlara Nikol Paşinyanın mitinqlərində iştirakı qadağan edənlər, təzyiq göstərənlər və qorxudanlar olub. Xaçatryan əmindir ki, belə hərəkətlər cəzasız qalmayacaq: “Sizi əmin edirəm ki, çox yaxın bir vaxtda bunlar praktikada həyata keçəcək. Biz o vaxt deyirdik: “Bizə polad mandat verin”. Adamlar polad mandatın gücünü özlərində hiss eləməlidirlər. Bu bir hədə deyil. Hər bir kəs öz əməllərinə görə məsuliyyət daşımalıdır”.
Erməni mediası yazır ki, ötən həftə Odzun kəndinin başçısı və “Ermənistan” blokunun tərəfdarı Arsen Titanyan qubernator Xaçatryanın ondan istefa tələb etməsi ilə bağlı polisə şikayət edib. Titanyan iddia edirdi ki, Xaçatryan onu qubernatorluğa çağırtdırıb, istefasını tələb edib və onu elə dəhlizdəcə əzişdirib. Titanyan bundan sonra da istefa verməkdən imtina edib. Hazırda hadisə üzrə cinayət işi qaldırılıb, Ermənistan Xüsusi İstintaq Xidməti Odzun icma başçısını zərərçəkən qismində tanıyıb. Amma bu iş üzrə müttəhim yoxdur. Lori qubernatoru iddia edir ki, rəqib siyasi qüvvəni təmsil edən şəxs ona şər atır. Qeyd edək ki, Güləgərək və Odzun icmalarında başçı seçkisi bu payız keçirilməlidir. İndiyədək bu vəzifəyə dörd dəfə seçilmiş Odzun icma başçısı deyib ki, vaxtından əvvəl istefaya getmək fikrində deyil. Başçı, üstəlik, qubernatoru Paşinyanın birlik çağırışına əməl etməməkdə günahlandırıb: “Mən baş nazirin çıxışını axıradək dinlədim və düşündüm ki, birliyə çağırış doğrudan da mövcuddur. Amma bəzi adamlar anlamırlar ki, baş nazir elə əvvəlki kimi bəzilərinin yox, hamının baş naziridir”.
Samirə SƏFƏROVA
