İranda prezident seçkiləri öncəsi soydaşlarımızın narahatlığı artır...

Azər Həsrət: “...gözə kül üfürməkdən başqa bir şey deyil”

img

İyunun 18-də İranda növbəti prezident seçkiləri keçiriləcək. Seçki günü yaxınlaşdıqca, soydaşlarımızın narahatlığı daha da artır. Güney azərbaycanlıları narahat edən əsas məqam isə seçkilərdə saxtakarlığa yol veriləcəyi ehtimalıdır. Odur ki, soydaşlarımız seçki öncəsi daha da fəallaşıblar və indidən seçkinin nəticələri ilə bağlı bədbin proqnozlar verirlər.

 

İyunun 18-də keçiriləcək seçkilərlə bağlı Azərbaycan Demokratik Firqəsi bəyanat yayıb. Bəyanatda seçkinin demokratik keçiriləcəyinə şübhə ilə yanaşılır: “Əziz həmvətənlər, İranın səsvermə hüquqlu vətəndaşları, məsləkdaşlar, ölkənin bütün mütərəqqi və azadlıqsevər qüvvələri!

Sizlər xordad ayının 28-də (iyunun 18-də) İranın prezident seçkisi adına 13-cü saxta şounun, lakin

əvvəlkilərdən fərqlənən, şahidləri olacaqsınız. Bu ssenarinin müəllifləri eynidir...”.  

Gördüyünüz kimi, firqənin bəyanatında İranda 13-cü dəfə keçirilən prezident seçkiləri saxta şou adlandırılır. Bəyanatda İranın dünyaya saxta seçki şousu təqdim edəcəyi və yenə də soydaşlarımızın problemlərinin həllinin kənarda qalacağı narahatlıqla ifadə olunur.

İranda prezident seçkiləri öncəsi soydaşlarımızın narahatlığının artmasının səbəbi nədir?

  • “İranı idarə edənlər Güney Azərbaycan türklərinin hüquqlarını heç vaxt tanımadılar, onlara münasibətdə çox sayğısız davrandılar”

Siyasi şərhçi Azər Həsrət hesab edir ki, ümumiyyətlə, Güney Azərbaycanda istənilən səviyyədə, istənilən şəkildə seçki keçirilsə, bu seçkilər bizim soydaşlarımızı təmin etməyəcək: “Niyə? Ona görə ki, İran dövləti, İran rejimi rəsmən Güney Azərbaycan türklərinin hüquqlarını tanımır. Yəni dövlət ən ali səviyyədə azərbaycanlıların, bütövlükdə, türklərin türk kimliyini tanımır. Belə olduğu halda, kimin necə seçilməsi heç nəyi dəyişmir. Ona görə də, düşünürəm ki, soydaşlarımız nəticə əldə etmək üçün öz hüquqlarının bərpası istiqamətində ciddi hərəkətlər etməlidirlər. Düzdür, yerli şuralara və sair seçkilər keçirilir. Amma şəxsi qənaətimə görə, ümumiyyətlə, vəziyyətin dəyişməsi, Güney Azərbaycan türklərinin hüquqlarının təmin edilməsi fars rejimindən qurtulmadan, başqa yolla mümkün deyil. Dediyim kimi, ölkədəki rejim, dövlət özü Güney Azərbaycan türklərini türk olaraq tanımır, bu dildə bir dənə də olsun məktəb yoxdur. Mən vəziyyəti Yunanıstanla müqayisə edərdim. Bilirsiniz ki, Yunanıstanda türk azlığı var, Yunanıstan israrla “türk azlığı yoxdur” deyə bəyanatlar verir, rəsmən onları müsəlman azlığı kimi qələmə verir. Orada yaşayan türklər də deyirlər ki, müsəlman olmağımız öz yerində, amma biz türkük, necə olur, siz bizim türklüyümüzü qəbul etmirsiniz. Bax, Yunanıstanla İranı idarə edən zehniyyət eynidir, biri Avropada, digəri isə Yaxın Şərqdə yerləşir. Bunları isə türkə qarşı düşmənçilik birləşdirir”.

A.Həsrət qeyd etdi ki, ona görə də İranda soydaşlarımızın tək çıxış yolu Güney Azərbaycanın yavaş-yavaş İran dövlətindən ayrılmasıdır: “Bu baş verməsə, İranda keçirilən istənilən seçki heç bir məsələni həll etməyəcək, narahatlığa səbəb olan amil budur. Güney Azərbaycan öz müstəqilliyinə qovuşmalıdır, İran dövləti də bununla hesablaşmalı, bunu qəbul etməlidir. Çünki İranı idarə edənlər Güney Azərbaycan türklərinin hüquqlarını heç vaxt tanımadılar, onlara münasibətdə çox sayğısız davrandılar. Belə olan halda, Güney azərbaycanlıların artıq öz müstəqil dövlətlərini qurmaq vaxtı çatıb deyə düşünürəm. Yəni çıxış yolu bundan ibarətdir. İranda keçiriləcək seçki, sadəcə, gözə kül üfürməkdən başqa bir şey deyil. Hətta bəzən olur, prezidentliyə də, hansısa vəzifəyə də türk seçilir, amma sonda bəlli olur ki, həmin türk Güney Azərbaycan türklərinə farslardan daha çox zülm edir. Ona görə də ən doğru seçim İranın artıq Güney Azərbaycandan əlini çəkməsidir” - deyə A.Həsrət qeyd etdi.

İradə SARIYEVA

Son xəbərlər