Şuşa sənədi Türkiyə-Azərbaycan birgə müdafiə sənayesinə də geniş perspektiv açdı

Ramil Məmmədli: “İki ölkə zirehli texnikalar, atıcı silahlar, pilotsuz uçuş aparatlarının istehsalını təşkil edə bilər”

img

“Bəyannamədə müdafiə sahəsində əməkdaşlıq və qarşılıqlı hərbi yardım məsələləri öz əksini tapır”. Bu barədə Prezident İlham Əliyev Şuşada mətbuata bəyanatında bildirib.

Dövlət başçısı iki ölkənin müdafiə sənayesi sahəsində əməkdaşlığını qeyd edərək bir sıra məsələlərə toxunub: “Bəyannamədə bir çox önəmli məsələlər öz əksini tapır. Mən onların arasında iki məsələni xüsusilə qeyd etmək istərdim. Birincisi, müdafiə sahəsində əməkdaşlıq, işbirliyi məsələsi. Müdafiə sənayesi sahəsində və qarşılıqlı hərbi yardım məsələləri bu bəyannamədə öz əksini tapır. Bu, tarixi nailiyyətdir. Biz bir daha göstəririk ki, bundan sonra da hər zaman bir yerdə olacağıq. Bundan sonra da bir-birimizin təhlükəsizliyini təmin edəcəyik, necə ki, bu günə qədər Türkiyə və Azərbaycan bütün məsələlərdə bir yerdədir, bundan sonra da bu, belə olacaq”.

Bununla belə, Türkiyə Prezidenti Rəcəb Tayyib Ərdoğan bəyan edib ki, müdafiə sənayesi sahəsində əlaqələrimizi texnologiya transferi və birgə istehsal layihələri ilə daha da gücləndiririk: “Müdafiə sənayesi sahəsində əlaqələrimiz bundan sonra daha fərqli şəkildə inkişaf edəcək. Bu fərqli inkişafla yanaşı, Azərbaycan bir bazar deyil, eyni zamanda, bu prosesdə istehsal mərkəzi olma imkanı da əldə edəcək. Bizim gücümüz Azərbaycanın gücü, Azərbaycanın gücü də bizim gücümüzdür”.

Ümumilikdə, Türkiyə və Azərbaycanın müdafiə sənayesi sahəsində birgə əməkdaşlığının perspektivlərini ekspertlər necə dəyərləndirirlər?

  • “Rəqəmsal hərbi vasitələrə dünya bazarında tələbat artır”

Sözügedən məsələ ilə bağlı fikirlərini “Bakı-Xəbər”lə bölüşən hərbi ekspert Ramil Məmmədli hesab edir ki, iki ölkənin hərbi sənayenin inkişafı sahəsində əməkdaşlığı perspektivlidir. O bunu belə əsaslandırdı: “Türkiyə ilə Azərbaycan arasında hərbi sənaye sahəsi ilə bağlı müəyyən əməkdaşlıq var. Ancaq bu əməkdaşlıq əsasən modernləşmə və satınalmalar sahəsindədir. Yəni müdafiə sənayesi məhsullarının satın alınması əsas prioritet olub. Ancaq iki ölkə arasında birgə hərbi sənaye məhsullarının istehsalı daha önəmlidir. Bu istehsalın əsasında da iri, strateji hərbi-texniki vasitələrin yaradılması daha önəmlidir. Hesab edirəm ki, Türkiyə ilə Azərbaycan zirehli texnikalar, atıcı silahlar, pilotsuz uçuş aparatlarının istehsalını təşkil edə bilər. Fikrimcə, məhz bu hərbi texnikaların birgə istehsalında konkret əməkdaşlıq daha vacibdir. Həmçinin, rəqəmsal hərbi vasitələrin birgə istehsalı önəmli əhəmiyyət kəsb edir. Nəzərə almaq lazımdır ki, bu cür hərbi vasitələrə dünya bazarında tələbat da artır”.

Hərbi ekspert onu da qeyd etdi ki, qarşıdakı dövrdə bu istiqamətdə əməkdaşlığın dərinləşəcəyi gözlənir.

Vidadi ORDAHALLI

Son xəbərlər