Son günlər sosial şəbəkələrdə bəzi məmurların sərvətləri barədə məlumatlar və fotofaktlar paylaşılaraq tənqid edilir. Aktiv müzakirə edilən 2 sabiq məmura aid olduğu bildirilən sərvətlərin təqdimatı göz qamaşdırır. İki gün əvvəl həbsi reallaşan sabiq nazir Səlim Müslümovun büdcədən 2-2,5 milyarddan çox vəsaiti mənimsədiyi iddialar sırasındadır.
Bir müddət öncə də Müslümov "Zeytunluq" deyilən ərazidə tikdirdiyi beşmərtəbəli villası ilə gündəmə gəlmişdi. Sabiq nazirin oğlu Turqay Müslümlüyə məxsus olduğu iddia edilən Orion Konstruktion MMC, Orion Qlobal MMC, Orion Cars MMC, Orion Kreativ Soluşns MMC şirkətləri də Müslümovlar ailəsinin sərvətləri sırasındadır.
Sabiq müdafiə naziri Səfər Əbiyevin isə nazirliyin balansında olan və müdafiə nazirlərinin xidməti yaşayışı məqsədilə ayrılmış 1000 kvadratmetr sahəsi olan yaşayış evini, eləcə də 1 hektardan çox torpaq sahəsini özəlləşdirdiyi iddia edilib. Əbiyevin, həmçinin, Hərbi Akademiyanın qarşısında və Teymur Əliyev, Həsən Əliyev küçələrində, "Şüşəli bazar"ın arxasında, Həzi Aslanov qəsəbəsində, Xəzər rayonu, Şimal DRES ərazisində villalarının olduğu bildirilir.
Bundan başqa, Qubada 100 hektardan çox torpağı, 30-dan çox avtomobil olan avtoparkı, Yasamal rayonu ərazisində, Statistika Komitəsi ilə üzbəüz çoxmərtəbəli binada bir neçə mənzili, "Avropa" otelinin yanındakı çoxmərtəbəli binada 5 mənzili, Ə.Ələkbərov küçəsində 7 bloklu, 17 mərtəbəli binası, Səməd Vurğun küçəsində villası və çoxmərtəbəli binada mənzilləri, "Sahil" metrosu yanında çoxmərtəbəli binada mənzilləri, Şüvəlanda, Novxanıda, Mərdəkanda, Qubada və Nabranda möhtəşəm villaları, Bakıda tibb mərkəzləri, tikiş fabrikləri, super-marketləri, konserv zavodu, istirahət mərkəzləri, ət kombinatının da Əbiyevin sərvətləri arasında olduğu iddia edilir. Tusi Klinikasının da əslində Səfər Əbiyevin obyektlərindən biri olduğu iddialar sırasındadır.
Vəzifədən uzaqlaşdırılandan sonra əlində bu qədər sərvəti saxlayan sabiq məmurlar və onların mülklərilə bağlı hansı addımlar atılmalıdır?
Hüquqşünas Mehman Muradlı qəzetimizə açıqlamasında bildirdi ki, mövcud reallıqlar sabiq məmurların əbəs yerə arxayınlaşdığını subut etmiş olur: “Təəssüflə qeyd etməliyik ki, bir sıra yüksək çinli məmurlar barədə ciddi faktlar ortaya qoyulur. Məlum olur ki, onlar işlədikləri dönəmdə xeyli varidat əldə ediblər. Hətta bir sıra araşdırmalarda onların külli miqdarda vəsaiti ölkədən kənara çıxarıb özlərinə biznes qurduqları da təsdiqini tapır. Artıq görünür ki, oğurlanan pulların həcmi 100 milyonlar, bəzən isə milyardalarla ölçülür. Bütün bunlarla bağlı mütləq mənada izahat verilməlidir. “Vəzifədən çıxdım, gedim yığdığımı sakit yeyim” prinsipi keçərli olmamalıdır. Sözügedən məmurlar büdcədən daha çox maliyyələşən qurumlara rəhbərlik ediblər. Elə bu səbəbdən də belə varidat toplaya biliblər. Bəllidir ki, onlar bu qədər sərvəti öz adlarına rəsmiləşdirməyiblər. Ancaq obyektiv araşdırmalarla həmin əmlakların əsl sahiblərinin kimlər olduğunu tapmaq çətin deyil. Hesab edirəm ki, şəffaflığı təmin etmək üçün mediada dərc edilən bu siyahılarla bağlı mütləq mənada hüquqi araşdırmalar aparılmalıdır. Həmin mülklərin hansı pullarla alındığına aydınlıq gətirilməlidir. Cinayət yolu ilə əldə edildiyi təsdiqini taparsa, hüquqi yolla onların dövlət nəfinə keçirilməsi təmin edilməlidir. Belə amillərin cəzasız qalması dövlətə olan inamı da zədələyir. Məmuru vəzifəyə xalqa xidmət üçün qoyurlar, milyardlar qazanmaq üçün yox”.
Məhəmmədəli QƏRİBLİ
