Birləşmiş Millətlər Təşkilatının (BMT) Elm, Təhsil və Mədəniyyət üst qurumu olan UNESCO Azərbaycana qarşı qərəzli fəaliyyətini dayandırmaq, indiyə qədər tutduğu yanlış mövqeyini dəyişmək əvəzinə, yenidən davam etdirir.
UNESCO Ermənistanın törətdiyi müharibə cinayətlərini araşdırmaqdan imtina edir.
Yayılan məlumatına görə, bu barədə Fransanın “Lagazetteaz.fr” onlayn qəzetində dərc olunan məqalədə deyilir.
Məqalədə qeyd olunur ki, Ermənistanın mədəni abidələrə qarşı cinayətlərinin araşdırılması ilə bağlı ötən ilin dekabrında Azərbaycan Xarici İşlər Nazirliyinin UNESCO-ya müraciəti cavabsız qalıb.
Bildirilib ki, Azərbaycanın mədəniyyət naziri Anar Kərimov da bu məsələ barədə UNESCO-ya dəfələrlə müraciət edib.
Yeri gəlmişkən, UNESCO işğaldan azad olunmuş Azərbaycan torpaqlarına missiya göndərməkdə maraqlıdır, lakin bu qurumun məqsədi sözügedən ərazilərdə xristian abidələrinin vəziyyətini öyrənməyə xidmət edir, Ermənistanın Azərbaycanın mədəni abidələrə qarşı cinayətlərini araşdırmağa yox.
Bildiyimiz kimi, xaricdəki erməni lobbisi və bəzi ölkələrin ermənipərəst qüvvələri UNESCO-ya müraciət edərək işğaldan azad edilən Azərbaycan torpaqlarında xristian abidələrinin taleyindən “narahat” olduqlarını, bu abidələri “təhlükə” gözlədiyini bildiriblər və bu təşkilatdan xristian abidələrinin vəziyyətinin araşdırılması ilə bağlı bölgəyə missiya göndərməsini tələb ediblər.
Amma Azərbaycan illərdir UNESCO-ya müraciət edir, Ermənistanın Azərbaycanın mədəni abidələrə qarşı cinayətlərini araşdırmağa, ona qiymət verməyə çağırır, amma bu təşkilat hələ də irəliyə doğru addım atmaq istəmir.
UNESCO Ermənistanın Azərbaycanın mədəni abidələrə qarşı cinayətlərinin araşdırılması üçün hansı səbəbdən missiya göndərməkdən imtina edir?
“Erməni vandalizminə məruz qalan, dağıdılan məscidlər, pirlər, qəbiristanlıqlar, karvansaralar, bütün müsəlman abidələri UNESCO üçün maraqlı deyilmi?”
Qafqaz Tarixi Mərkəzinin direktoru Rizvan Hüseynov “Bakı-Xəbər”ə bunun səbəbini belə izah etdi: “Təəssüflər olsun ki, bəzi məqamlarda UNESCO ümumbəşəri dəyərləri yox, hansısa ölkələrin siyasi və milli maraqlarını yeridir. Bilirsiniz ki, UNESCO-nun əsas qərargahı Fransadadır və bu ölkənin UNESCO təşkilatının yaradılmasında da müstəsna rolu var. Son 30 ilə yaxın müddətdə Azərbaycan əlindən gələni edir ki, birincisi, mədəni platforma olaraq UNESCO-dan istifadə edərək dünyaya öz səsini çatdırsın, ikincisi, öz mədəniyyəti haqqında danışsın, həmçinin də UNESCO-nun layihələrində iştirak edərək Fransanın və digər Fransameylli ölkələrin, qurumların Azərbaycana qarşı neqativ fəaliyyətinin qarşısını alsın. Dediyim kimi, bu iki məqsəd prioritet idi. Amma ərazilərimiz işğaldan azad olunandan, bütün siyasi rənglər və çalarlar açılandan sonra, yəni müharibə dönəmində biz Fransanın da, əfsuslar olsun ki, UNESCO-nun da mövqeyini gördük. İkili standartlar həmişə var. Biz 20 il ərzində böyük çətinliklər çəkdik ki, UNESCO bizim işğalda olan ərazilərimizə gəlsin. Onların gəlməyi bir çətinlik oldu, gəlsələr də orada apardıqları araşdırmaların nəticəsi də bağlı qaldı, bunu ictimailəşdirməyə də UNESCO imkan vermədi. Ona görə ki, erməni vandalizmi qeydə alınmışdı, göz qabağında idi. Amma nə yaxşı heç müharibə qurtarmamış, döyüşlər gedə-gedə UNESCO təklif edirdi ki, təcili gəlib azad olunmuş ərazilərdə “erməni”, xristian abidələri ilə bağlı təftiş aparsın. Sözsüz ki, bu haqsızlıqdır”.
R.Hüseynovun sözlərinə görə, Azərbaycan UNESCO-nun bu təklifi ilə bağlı çox düzgün qərar qəbul edib, birincisi, o ərazilər minalanıb, ora sərbəst giriş-çıxış hələ məhduddur. “Bu baxımdan, xüsusən də ora getmək dünya təşkilatı UNESCO üçün çətin olacaq, təhlükəsizlik tərəfdən də problem yaradacaq. İkincisi, abidələrin qorunmasında belə maraqlıdırlarsa, nə üçün yalnız xristian abidələrini qabardırlar? Erməni vandalizminə məruz qalan, dağıdılan məscidlər, pirlər, qəbiristanlıqlar, karvansaralar, bütün müsəlman abidələri UNESCO üçün maraqlı deyilmi?”
R.Hüseynov qeyd etdi ki, bu problem təkcə Azərbaycanla bağlı deyil, İsraillə UNESCO arasında da ciddi problem var. Hətta İsrail dövlətinin UNESCO-nu tərk etdiyini, üzvlükən çıxdığını deyən R.Hüseynov hesab edir ki, bu çıxış yolu deyil: “Ən doğrusunu Azərbaycan edir. Yəni UNESCO-nun üzvlüyündə qalaraq öz mövqeyimizi qorumalıyıq. Bütün dünyaya göstərməliyik ki, çox təəssüf, UNESCO öz çərçivəsindən, öz fəlsəfəsindən çıxaraq hansısa ölkələrin milli, iqtisadi, siyasi maraqlarına qulluq edir. Bu müstəvidə bilirsiniz ki, son dövrlər Azərbaycan ən yaxın əməkdaşlıq münasibətini ISESCO ilə qurub. Ümid edirik ki, bu bizə daha uyğun olan prioritet bir istiqamətdir, bir təşkilatdır” - deyə R.Hüseynov qeyd etdi.
İradə SARIYEVA
