“Hesab edirəm ki, biz özəl şirkətləri bu işlərə cəlb etməliyik”. Bunu Prezident İlham Əliyev Vüqar Süleymanovu Minatəmizləmə Agentliyinin İdarə Heyətinin sədri vəzifəsinə təyin olunması ilə əlaqədar qəbul edərkən deyib.
Ölkə başçısı sözügedən məsələ ilə bağlı bir sıra məqamlara toxunub: “Bildiyiniz kimi, Ermənistan minalanmış sahələrin xəritələrini bizə verməyib, ona görə burada peyk təsvirləri önəmli rol oynaya bilər. Eyni zamanda, mən hesab edirəm ki, biz özəl şirkətləri bu işlərə cəlb etməliyik. Mən artıq göstəriş vermişəm, indi xarici şirkətlərlə danışıqlar gedir. Hesab edirəm ki, onları cəlb etmək işimizi yüngülləşdirmək üçün önəmli addım olacaqdır. Hesab edirəm ki, bununla paralel olaraq, yerli şirkətlər də yarana bilər. Çünki bizdə bu vaxta qədər belə təcrübə olmamışdır. Ancaq işin həcmini nəzərə alaraq, mən hesab edirəm ki, özəl şirkətlər yarana bilər, Azərbaycanın biznes dairələri burada öz sözünü deyə bilər və beləliklə, biz bu işləri daha qısa müddət ərzində görə bilərik”.
Prezident onu da qeyd edib ki, özəl şirkətlər müvafiq texnika ilə təmin edilməlidir. Eyni zamanda, Minatəmizləmə Agentliyi onlara sertifikatlar da verməlidir, onlar akkreditasiyadan keçməlidir. Həmçinin, xarici şirkətlərlə birgə müəssisələr də yaradıla bilər.
Bütövlükdə, özəl şirkətlərin bu işə cəlb edilməsinin əhəmiyyətini ekspertlər necə dəyərləndirirlər?
“Sözügedən məsələnin Ali Baş Komandanın nəzarəti altında olması ümid verir ki, bu iş uğurla icra ediləcək”
Məsələyə münasibət bildirən hərbi ekspert İbrahim Rüstəmlinin sözlərinə görə, özəl şirkətlərin bu işə cəlb olunması minalanmış ərazilərin təmizlənməsi işini sürətləndirəcək: “İşğaldan azad edilən ərazilərin minalardan təmizlənməsi çox ciddi məsələdir. Mütəxəssislərin fikrincə, 7 ətraf rayonun minalardan tam təmizlənməsi üçün 12 il vaxt lazımdır. Məlum olduğu kimi, Ermənistan tərəfinin minalanmış ərazilərin xəritəsini verməməsi bir sıra problemlər yaradıb. Bütün bu problemlərin həlli kompleks yanaşma tələb edir. Ona görə də cənab Prezident bu məsələyə xüsusi yer ayırdı. Qeyd etdi ki, yalnız Minatəmizləmə Agentliyi bu işin öhdəsindən gələ bilməz. Bu işə daha çox ixtisaslaşmış qurum, özəl şirkətlər cəlb edilməlidir. Həm xarici, həm də yerli özəl şirkətlər bu işə cəlb edilərsə, o zaman ərazilərin minalardan təmizlənməsi sürətlənəcək. Bu isə həmin ərazilərdə bir sıra sosial-iqtisadi işlərin aparılmasına kömək edəcək. Çünki biz uzun illər gözləyə bilmərik. Ona görə də bütün vasitələrdən sistemli şəkildə istifadə etməklə minaları tez təmizləməliyik. Prezident konkret istiqamətlər üzrə bunun yollarını göstərdi. Digər tərəfdən, Ottava Konvensiyası piyada əleyhinə minaların basdırılmasını, onların istehsalını, toplanması və ötürülməsini qadağan edir. Azərbaycan və Ermənistan həmin konvensiyaya qoşulmayıb. Buna baxmayaraq, Azərbaycan Ottava Konvensiyasını rəsmən ratifikasiya edən ölkələrdən daha çox iş görüb. Azərbaycan Ottava Konvensiyasının 7-ci maddəsinə uyğun olaraq, MDB ölkələri içərisində yeganə dövlətdir ki, hesabat təqdim edir. Ərazilərin qısa müddətdə minalardan təmizlənməsi ilə bağlı milli potensial yaradıb, proqram təsdiq edib. Bu proqram ayrı-ayrı ixtisaslaşmış özəl şirkətlərin minaların təmizlənməsi işinə cəlb olunmasını özündə ehtiva edir. Ona görə də proseslərin gedişi göstərir ki, biz ərazilərimizin daha tez bir müddətdə minalardan təmizlənməsinə nail olacağıq”.
Hərbi ekspertin fikrincə, sözügedən məsələnin Ali Baş Komandanın nəzarəti altında olması ümid verir ki, bu iş uğurla icra ediləcək.
Vidadi ORDAHALLI
