Prezident İlham Əliyev avqustun 21-də 1000 meqavatt yükötürmə gücü olan 330/220/110 kilovoltluq “Qobu” yarımstansiyasının tikintisi ilə tanışlıq, həmçinin 385 meqavatlıq “Qobu” Elektrik Stansiyasının təməlini qoyarkən energetiklərlə görüşü zamanı çıxışında deyib ki, Azərbaycanda bu ilin 7 ayında iqtisadi vəziyyət qənaətbəxşdir, iqtisadiyyat cəmi 2,8 faiz azalıb:
"Sənaye istehsalı da artmaqdadır. Hətta bu il qeyri-neft sektorunda sənaye artır. Deyə bilərəm ki, pandemiyanın demək olar bütün ölkələrin iqtisadiyyatına mənfi təsir göstərməsinə baxmayaraq və hətta bəzi inkişaf etmiş ölkələrdə iqtisadi tənəzzül 10-15-20 faiz səviyyəsindədir, Azərbaycanda bu ilin 7 ayında iqtisadi vəziyyət, hesab edirəm, qənaətbəxşdir, iqtisadiyyat cəmi 2,8 faiz azalıbdır. Ancaq bunu da nəzərə almalıyıq ki, neftin qiyməti düşüb və bu bizim iqtisadi inkişafımıza mənfi təsir göstərir. Eyni zamanda, OPEC+ razılaşması nəticəsində hasilatımız da bir qədər azalıb. Ancaq sənaye sahəsində, o cümlədən qeyri-neft sənayesi sahəsində artım var və bu artım bu ilin 7 ayında 13 faizdir. Bax, budur bugünkü Azərbaycan reallıqları. Bu bir daha onu deməyə əsas verir ki, bundan sonra da elektrik stansiyalarının tikintisi və mövcud stansiyaların istismar müddətinin uzadılması istiqamətində əlavə addımlar atılmalıdır. Biz öz enerji potensialımızdan maksimum istifadə edirik və etməliyik".
Prezidentin dediyi göstəricilər, demək olar ki, pandemiya dönəmini əhatə edir. Belə vəziyyətdə bir çox inkişaf etmiş ölkələrin iqtisadiyyatında tənəzzül yaşandığı halda, Azərbaycan iqtisadiyyatında baş verən bu müsbət irəliləyişin səsbəbi nə ilə bağlı ola bilər?
“Bütün bunlar iqtisadiyyatın düzgün şaxələndirilməsinin nəticəsi və ölkəmizdə qeyri-neft sektorunun inkişafını şərtləndirən amillərdi”
İqtisadçı Elşən Əliyev “Bakı-Xəbər”ə açıqlamasında bildirdi ki, çox az sayda ölkə var ki, bu dönəmdə öz templərini qoruyub saxlaya bildi:“Bu dönəmdə iqtisadi göstəricilərində müsbət hallar qeyd olunan ölkələrdən biri də Azərbaycandır. Prezident İlham Əliyevin tapşırığı əsasında, koronavirus pandemiyası tüğyan etməyə başlayan zaman ölkəmizdə zəngin sosial paketin təqdim edilməsi ilə yanaşı, eyni zamanda, iqtisadiyyatın dayanıqlı və davamlı olması üçün də müxtəlif tədbirlər həyata keçirildi. Bunun nəticəsidir ki, ölkəmizdə iqtisadiyyatın fəaliyyəti pandemiya dövründə də uğurlu olub. Xüsusilə də koronavirus pandemiyası dövründə dünya enerji və səhm bazarlarında kəskin dalğalanmaların nəticəsi olaraq neftin qiymətinin düşməsinə baxmayaraq, qeyri-neft sektorunun ölkədə müsbət saldo ilə göstəriciləri oldu. Yəni ölkə iqtisadiyyatının vaxtında düzgün istiqamətlənməsi, düzgün qurulması ona gətirib çıxardı ki, məhz elə koronavirus pandemiyası dövründə neft ölkələrində iqtisadiyyatın daha çox zərər görməsini müşahidə etsək də, Azərbaycanda bu müşahidə olunmadı".
Ekspertin sözlərinə görə, ölkə başçısının nəticəsindən razı qaldığı 7 aylıq dönəmin böyük hissəsi pandemiya zamanını əhatə edir: “Danılmaz faktdır ki, dünya ölkələrinin əksəriyyəti son aylarda koronavirus pandemiyası qarşısında ciddi sosial-iqtisadi, tibbi, mənəvi-psixoloji problemlərlə üzləşib. Hətta onlar vəziyyətə nəzarəti itirdiyi bir zamanda Azərbaycan iqtisadi inkişaf tempini qoruyub saxlayıb. Bununla yanaşı, əhalinin bütün təbəqələri üçün ciddi sosial dəstək paketləri təqdim edib. Bütün bunlar iqtisadiyyatın düzgün şaxələndirilməsinin nəticəsi və ölkəmizdə qeyri-neft sektorunun inkişafını şərtləndirən amillərdi”.
Azərbaycan iqtisadiyyatı belə ağır şəraitdə qeyd olunan göstəriciləri ortaya qoyubsa, demək ki, stabil vəziyyətdə daha güclü inkişaf edəcəyinə şübhə yeri qalmır.
Məhəmmədəli QƏRİBLİ
