Ermənistanın İsraildəki fövqəladə və səlahiyyətli səfiri Armen Smbatyan İsrailin ITON.TV kanalına müsahibə verərək, aparıcı Aleksandr Valdmanın sualları qarşısında aciz qalıb. Faktiki olaraq israilli aparıcı erməni səfiri sualları ilə yıxıb-sürüyüb.
İsrailin 2016-cı ildə imzaladığı 5 milyard dollarlıq müqaviləyə əsasən, Azərbaycana silah tədarük etdiyini bildirən Valdman Ermənistan Xarici İşlər nazirinin “Azərbaycana İsraildən də daha çox silah satan” Rusiyaya niyə belə suallar ünvanlamadığını soruşub. Səfir buna düz-əməlli cavab verə bilməyib. Sadəcə, ümumi fikirlər səsləndirib: “Ermənistan Xarici İşlər naziri bu silahlardan mülki əhalini məhv etməyin mümkün olmadığını düşünürdü. Yəqin o, bunu nəzərdə tuturdu. İkincisi, Rusiya haqqında dedikləriniz. Rusiya ilə xüsusi bir münasibətimiz var: nəinki tərəfdaşlıq, müttəfiq münasibətlər. Biz KTMT-də, Avrasiya Birliyindəyik. İkitərəfli münasibətlərimiz var. On illərdir Ermənistan Respublikası Rusiya Federasiyası hərbi-sənaye kompleksi də daxil olmaqla, bütün sahələrdə əlaqələri inkişaf etdirir. Yəni bu çox ciddi bir sualdır. Bəli, biz Rusiya ilə necə ünsiyyət qurduğumuzu, Rusiyanın nə etdiyini, nələr etdiyini yaxşı bilirik və bir-birimizi başa düşürük”.
Daha sonra aparıcı “siz deyirsiniz ki, İsrail silahları Azərbaycan tərəfindən mülki əhalini məhv etmək üçün istifadə olunur, bu hansı meyarlarla müəyyənləşdirilir? Mülki əhaliyə və orduya qarşı ayrı-ayrılıqda hansı silahlar işlədilir?” - deyə soruşub. Ermni səfir bu suala da aydınlıq gətirə bilməyərək çıxılmaz duruma düşüb.
Göründüyü kimi, teleaparıcı məlum sualları ilə Ermənistan səfirini fakt qarşısında qoyub.
“Rusiya Azərbaycana silahları baha qiymətə sataraq bundan böyük gəlir götürür, amma bizdən fərqli olaraq Ermənistana bunu havayı verir”
Məsələyə münasibət bildirən AMİP funksioneri Əli Orucovun fikrincə, İsrailin yerli televiziyası, faktiki olaraq, məlum suallarla Ermənistanı seytnot vəziyyətdə qoyub: “Əvvəla Ermənistan İsrailin Azərbaycana son dərəcə müasir silah komplekslərini satmasından bərk narahatdır. Çünki sözügedən silah kompleksləri sayəsində 2016-cı ilin aprelində Ermənistan ordusuna çox güclü zərbələr endirildi. Nəticədə çoxsaylı düşmən əsgəri və hərbi texnikası məhv edildi. Bütün bunlardan Ermənistan narahatdır və hər vasitə ilə İsrailin Azərbaycana silah satmasına əngəl olmağa çalışır. Ermənistan həm də ona görə İsraildə səfirlik açdı ki, bu ölkənin Azərbaycana silah satmasına mane olsun. Ancaq İsraillə Azərbaycan arasında o qədər yaxın münasibətlər var ki, ermənilərin bu yöndə cəhdlərinin bir səmərə verəcəyini düşünmürəm. Bütün bunların fonunda Azərbaycan da İsraildə səfirlik açmasını sürətləndirməlidir. Rusiyanın İsraildən çox Azərbaycana silah satmasını Ermənistan Kremlə irad bildirə bilməz. Ona görə ki, Ermənistan Rusiyanın vassalı, sattileti rolunda çıxış edən ölkədir. Ermənistanda hakimiyyət dəyişsə də, bu ölkənin Rusiyanın təsir dairəsindən çıxması real görünmür. Başqa bir tərəfdən, Rusiya Azərbaycana silahları baha qiymətə sataraq, bundan böyük gəlir götürür, amma bizdən fərqli olaraq, Ermənistana silahı havayı verir. Hətta Ermənistan Rusiya silahlarını ucuz və yaxud da havayı əldə etdiyinə görə, sonra onları üçüncü ölkələrə satır. Bir neçə ay əvvəl Ermənistanın Vatikandakı keçmiş səfiri Minasyan Paşinyanın Rusiya silahlarını üçüncü ölkəyə satması barədə faktlar ortaya qoymuşdu”.
Ekspertin fikrincə, Ermənistanın bu kimi işlərlə məşğul olmasını bütün dünya bilməlidir.
Vidadi ORDAHALLI
