Amerikalı milyarder Corc Soros Belarus prezidenti Aleksandr Lukaşenkonu 9 avqust prezident seçkisində qələbə münasibətilə təbrik etdiyi üçün Ermənistan baş naziri Nikol Paşinyandan narazılığını bildirib. Bu barədə hökumətdəki mənbələrə istinadən erməni KİV-i yazır.
Qəzetin yazdığına görə, Soros “Paşinyanın təbrik məsələsində səhv etdiyini detalları ilə çatdırmağı” Ermənistan üzrə baş nümayəndəsi Larisa Minasyandan xahiş edib. Minasyan dövlətlərarası münasibətlər protokolu çərçivəsində bu cür təbriklərin vacibliyini qeyd etsə də, milyarder onun bəhanəsini qəbul etməyib.
Məqalə müəlliflərinə görə, təbriklə Paşinyan əslində növbəti dəfə Rusiya ilə Qərb arasında manevr etməyə çalışıb, lakin investisiyalardan məhrum olma ehtimalında “başqa oyunu” uduzacaq. Ancaq Ermənistan baş nazirinin manevrləri Sorosun tənbehi ilə nəticələnib, bundan sonra Paşinyan səsini kəsib. Məqaləyə görə, Rusiya-Ermənistan münasibətlərinin pozulmasını qarşısına məqsəd qoyan bir sıra erməni siyasətçilər, o cümlədən Larisa Minasyan Belarusdakı vəziyyətdən çox narahatdır. Paşinyan dar vaxt çərçivəsində Ermənistanın bu məsələlərdə iştirakı kimi prinsipial sualı həll etməlidir. “Paşinyan Rusiya və Qərb maraqları arasında manevr edə biləcək siyasətçi deyil” – məqalədə deyilir. Doğrudan da Paşinyanın bu iki qütb arasında vurnuxduğu aydın hiss edilir. Paşinyanın bu qeyri-stabil mövqeyini nə ilə izah etmək olar?
Politoloq Rəşad Bayramov qəzetimizə açıqlamasında bildirdi ki, Qərb və ya Soros rəsmi İrəvan üçün təkcə “ideya generatoru” rolunu oynamayıb, həm də Paşinyanın hakimiyyətə gəlməsindən ötrü Ermənistandakı səfirlik vasitəsilə media və QHT-lərə dəstək məqsədilə külli miqdarda vəsait xərcləyib:“Mediada bu məqsədlər üçün xərclənən vəsaitin miqdarı da dəfələrlə açıqlanıb. Soros ümid edirdi ki, Paşinyan bu vəsaitlərin əvəzində inqilab öncəsi verdiyi vədlərin hamısını yerinə yetirəcək və Ermənistanı Rusiyanın orbitindən tədricən uzaqlaşdıracaq. Qərbin böyük gözləntisinə və təəccübünə rəğmən, bu baş vermədi. Əksinə, bir müddət Rusiyaya, daha dəqiq deyilsə, Putinə doğru meyllənməyə başlasa da, Paşinyan bu addımı ilə Putin kimi güclü siyasətçini aldada bilmədi.
İndi Paşinyan, necə deyərlər, iki od arasında qalıb. Soros dolayı yolla “investisiyasını” geri tələb edir, Putin isə Paşinyanın dəridən-qabıqdan çıxmasına baxmayaraq, onu daim aralı, gərgin vəziyyətdə saxlayır. Görünən budur ki, Paşinyan hökumətinin xarici siyasət kursunda da müəyyənlik yox dərəcəsindədir. Paşinyan həm Qərbə, həm də Rusiyaya yarınmağa, nəticədə, hər iki tərəfdən başının sığallamasına nail olmağa çalışır. Bu davranışın əziyyətini isə Ermənistan əhalisi çəkir. Bunun heç bir nəticəsi də olmadı. 2020-ci ildən Rusiya Ermənistana satdığı təbii qazın min kubmetrinin qiymətini 165 dollardan 220 dollaradək qaldırdı. Paşinyanın və təmsil etdiyi siyasi qüvvələrin bu kimi çətinliklərdən çıxmaq üçün, ilk növbədə, cəmiyyətin etibarını itirməməsi vacib şərtdir. Son zamanlar onun nüfizunun itdiyi müşahidə edilir. Onun başçılıq etdiyi hökumətin real fəaliyyət proqramı da mövcud deyil. Ölkəsinin təməl problemlərini həll edə bilmədiyindən Nikol Paşinyan Ermənistan cəmiyyətinin başını müxtəlif şoularla qatmaq istəyir. Lakin bu vəziyyət uzandıqca, o özünü də çaş-baş vəziyyətə salır. Belə davam edərsə, bundan sonra onun ölkə ictimaiyyətinə yalanlar danışıb, şər-böhtan kampaniyasına başlayacağı gözlənilir. Nəticədə, bu gün Ermənistanda 1999-cu ilin oktyabrı, 2008-ci ilin martı və 2018-ci ilin mayının təkrarlanacağı istinsa olunmur".
Paşinyanın bu addımları onun çıxılmaz vəziyyətdə olduğunu şərtləndirir. Ona görə də oturduğu qucaqları tez-tez dəyişmək məcburiyyətində qalır.
Məhəmmədəli QƏRİBLİ
