İyunun 21-də Göyçay rayonunda yaşayan Məzahir Həsənov Rayon Polis Şöbəsinə müraciət edərək, iyunun 16-da ona məxsus avtomobillərin yuyulması məntəqəsindən oğurluq olması barədə məlumat verib.
Məlumatla əlaqədar hadisə yerinə gələn əməliyyat qrupu müvafiq araşdırmalarla oradan qaynaq aparatı, müşahidə kamerasının yaddaş bazası, 1 ədəd krosna antenna aparatı və 12 manat pulun oğurlandığını müəyyən edib.
Faktla əlaqədar cinayət işi başlanıb.
Polis əməkdaşları əməliyyat yolu ilə oğurluğun Orxan adlı şəxs tərəfindən törədildiyi barədə məlumat əldə edib. Rayonun Qaraman kənd sakini, əvvəllər məhkum olunmuş Orxan Mustafayev şübhəli şəxs qismində saxlanaraq Polis Şöbəsinə gətirilib. Ətrafında aparılan tədbirlərlə o, oğurluğu törətdiyini etiraf edib.
İstintaq-əməliyyat tədbirləri ilə O.Mustafayevin ötən ilin noyabr və dekabr aylarında rayon ərazisindəki iki mağazadan ümumilikdə 600 manat pul və 260 manat dəyərində tütün məmulatları oğurladığı da müəyyən edilib.
Hazırda istintaq tədbirləri davam etdirilir.
Natiq CAVADOV DİN mətbuat xidmətinin əməkdaşı
