“Özbəkistan rəsmisinin də məhz indiki məqamda belə bir açıqlama ilə çıxış etməsi bundan irəli gəlir”
Özbəkistan “Şimal-Cənub” Beynəlxalq Nəqliyyat Dəhlizində iştirak etməkdə maraqlıdır.
Bunu Özbəkistan baş nazirinin müavini Suhrob Xolmuradov Özbəkistan-Hindistan hökumətlərarası komissiyasının 11-ci iclası zamanı deyib.
O, sözügedən məsələ ilə bağlı bildirib ki, bu nəqliyyat layihəsi regionun nəqliyyat-tranzit potensialını artıra bilər. S.Xolmuradov həmçinin vurğulayıb ki, Hindistan Özbəkistan, Türkmənistan, İran və Omanın iştirak etdiyi Aşqabad sazişinə də qoşulub. O əlavə edib ki, bu layihə Hindistanla Özbəkistan və Mərkəzi Asiyanın digər ölkələri ilə ticarət dövriyyəsinin artmasına xidmət edəcək.
Məlumat üçün qeyd edək ki, “Şimal-Cənub” Beynəlxalq Nəqliyyat Dəhlizini Hindistan, İran, Azərbaycan, Rusiya və Qazaxıstanı əlaqələndirir.
Özbəkistanın məhz Xəzərin statusu ilə bağlı razılaşmadan sonra belə bir açıqlama ilə çıxış etməsi təsadüfü deyil. Görünən odur ki, Xəzərin hüquqi statusu ilə bağlı imzalanan Konvensiya bütün Xəzəryanı ölkələrin bundan sonra özlərini hüquqi müstəvidə necə aparmasını qanuniləşdirir. Bu səbəbdən regionda yerləşən digər ölkələr bundan ruhlanır və böyük layihələrə qoşulmaqda tərəddüd etmirlər. Xəzərin statusu ilə bağlı məlum razılaşmadan sonra daha cəsarətlə layihələrə qoşulmağa maraq göstərirlər. Yəni artıq problemin hüquqi müstəvidə öz həllini tapması sözügedən məsələ ilə bağlı yeni imkanlar açır. Özbəkistanın da “Şimal-Cənub” Beynəlxalq Nəqliyyat Dəhlizinə qoşulmaq istəyi bundan irəli gəlir. Ölkələr sənəd əsasında nəyi edib-etməyəcəklərini müəyyənləşdirmiş oldular. Bu da region üçün bir stabillik şəraiti yaradır. Bir məqamı da nəzərə almaq lazımdır ki, Azərbaycan digər ölkələrlə müqayisədə öz infrastrukturuna görə seçilir.
Bütün hallarda, Özbəkistanın Xəzərin statusu ilə bağlı Konvensiyanın imzalanmasından sonra Şimal-Cənub Beynəlxalq Nəqliyyat Dəhlizində iştirak etmək istəyini bəyan etməsini ekspertlər necə dəyərləndirir?
Məsələyə münasibət bildirən VİP-in sədr müavini Ramil Hüseynovun sözlərinə görə, Özbəkistanın məhz indiki məqamda belə bir istəyini bəyan etməsi təsadüfü deyil: “Əvvəla, nəzərə almaq lazımdır ki, Özbəkistan əhalisinin sayına görə Orta Asiyada ən böyük ölkədir. Adıçəkilən ölkə bütün Orta Asiya ölkələri ilə həmsərhəddir. Eyni zamanda, çoğrafi baxımdan digər Asiya ölkələrinə yaxındır. Xəzərin statusu ilə bağlı razılaşmanın əldə olunması bu və ya digər dərəcədə Özbəkistanın da xeyrinədir. Çünki bundan sonra sahilyanı ölkələrə cəlb oluncaq sərmayələr, tranzit daşımalar və digər proseslər regiomda yerləşən Özbəkistanın da inkişafına öz müsbət təsirini göstərəcək. Özbəkistanın Şimal-Cənub Beynəlxalq Nəqliyyat Dəhlizinə qoşulması bu ölkənin xeyrinə olacaq. Ona görə də bütün bunlar bir-biri ilə bu və ya digər dərəcədə bağlıdır. O üzdən, Xəzərin statusu ilə bağlı razılaşmanın əldə olunması region ölkələrinin müxtəlif layihələrdə iştirak etməsinə stimul verir. Özbəkistan rəsmisinin də məhz indiki məqamda belə bir açıqlama ilə çıxış etməsi bundan irəli gəlir. Reallıq ondan ibarətdir ki, Xəzərin statusu ilə bağlı Konvensiya regionda yeni imkanlar yaradır. Yaxşı olardı ki, bütün dövlətlər bu imkanlardan səmərəli şəkildə istifadə etsin”.
Vidadi ORDAHALLI
