Akif Nağı: “İnanmıram ki, Aİ Ermənistanın xatirinə əməkdaşlığı pozsun”
Avropa İttifaqı Ukrayna böhranı ilə bağlı Azərbaycanla münaqişə baş verəcəyi təqdirdə Ermənistana hərbi dəstək verə bilməyəcək. Bunu URA.RU-ya müsahibəsində RUDN Universitetinin Strateji Araşdırmalar və Proqnozlar İnstitutunun direktor müavini Yevgeni Semibratov bildirib.
"NATO qüvvələri hazırda Ukrayna əməliyyat teatrında yerləşdirilib. Onların İrəvanın hərbi qüdrətini artırdığını təsəvvür etmək çətindir. Əgər kiməsə güvənsəydik, bu, Aİ olardı, amma yadda saxlayaq: Ermənistanın məğlubiyyətində tarixi marağı olan Türkiyə hərbi potensial baxımından Alyansın ikinci ən böyük ölkəsidir. Bu kombinasiya mümkün deyil. Avropa İttifaqının (xüsusən də erməni diasporu ilə Fransanın) faktiki hərbi potensialı məhduddur. Aİ-nin Ermənistanın təhlükəsizliyi üçün 10.000-15.000 əsgər göndərməsi barədə danışmaq, yadplanetlilərin gəlişi ilə müqayisə edilə bilən bir xəyaldır", - Semibratov bildirib.
İrəvan əvvəlki mövqeyini qoruyub saxlayır və KTMT-yə qayıtmaq niyyətində deyil. 2024-cü ilin payızında Baş nazir Nikol Paşinyan bloka üzvlüyün dayandırılmasını ölkənin müstəqilliyinə risklərlə əlaqələndirmiş və fasiləni daimi adlandırmışdı, baxmayaraq ki, İrəvan hələ də müttəfiqlərinin hərəkətlərini izləyir.
Ermənistan Azərbaycanla münaqişə etsə, Avropa ona 10-15 min əsgər göndərməz.
Azad Vətən Partiyasının sədri Akif Nağı baki-xeber.com-a bildirdi ki, Rusiya müxtəlif vasitələrlə Ermənistanı öz ətrafında saxlamağa çalışır: “Rusiya ekspertlərin, qeyri-rəsmi şəxslərin dili ilə fikirlər səsləndirir, belə rəy formalaşdırmağa çalışır ki, Ermənistanın Rusiyadan başqa söykənəcəyi yer yoxdur, KTMT-dən çıxmamalı, Rusiyanın yanında olmalıdır. Rusiya bu yöndə təbliğat aparmağa çalışır. Təbii ki, bu gün Azərbaycanla Ermənistan arasında müharibədən danışmağa ciddi bir ehtiyac yoxdur, Azərbaycan qalib gəlib, torpaqlarını işğaldan azad edib. Yeni bir müharibə ilə bağlı Azərbaycanın planları yoxdur. Ola bilər, Ermənistanın, revanşistlərin hansısa planları, niyyətləri olsun, Ermənistanın arxasında kimin dayanmasına baxmayaraq ona da Azərbaycan lazımı səviyyədə cavab verəcək. O ki qaldı, Avropa İttifaqının, NATO-nun Ermənistana dəstəyi ilə bağlı məsələyə, bu o qədər də real deyil. Yəni o demək deyil ki, Aİ, yaxud NATO Ermənistana kömək etməlidir? NATO-nun içində Türkiyə də var. Ona görə də ortaya qoyulan sual qeyri- müəyyən bir sualdır. Amma şərti olaraq düşünsək ki, belə bir vəziyyət yaranır. Mən inanmıram ki, Aİ Azərbaycana qarşı müharibədə iştirak edərdi. Çünki Avropa dövlətlərin Azərbaycanla ciddi iqtisadi əlaqələri, əməkdaşlıqları mövcuddur. Avropanın enerji təhlükəsizliyində Avropa İttifaqı ciddi rol oynayır, Aİ ilə Azərbaycan arasında ciddi münasibətlər artıq var. İnanmıram ki, Aİ Ermənistanın xatirinə əməkdaşlığı pozsun. Aİ Ermənistana hansısa dəstək verəcəksə bununla öz maraqlarına zərbə vurmuş, öz oturduğu budağı kəsmiş olar. Ermənistan hər gün bir oyun oynayır, bu gün bir, sabah başqa söz deyir, Aİ ilə yaxınlaşağa çalışır. Ekspertin dediklıri Ermənistanın Aİ-yə daxil olması ehtimalı ilə də bağlıdır. Bu uzun bir prosesdir. Ermənistan Aİ-yə daxil ola, Aİ də Ermənistanı müdafiə edə, bu o qədər inandırıcı olmayan bir perspektivdir Ermənistanın Aİ üzvülüyünə daxil olacağı perspektivi də çox uzaqdır, ortada hələ ciddi bir addım yoxdur. Ermənistan özü buna cəhd edir, eyni zamanda Rusiyadan da çəkinir. Ortaya açıq şəkildə çıxa bilmir. Hələ də Aİ, ABŞ və Rusiya ilə oyun oynayır, həm də İranla əlaqə saxlayır. İranla daha da yaxınlaşmaları hiss olunur son vaxtlar. İran-Qacaran tunelini çəkirlər və İran artıq Ermənistanın içərilərinə girir, Gürcüstan vasitəsilə Qara dənizə, ordan da Avropaya çıxmaq istəyir. İranın da bu Ermənistandan alət kimi istifadə etməklə bağlı müəyyən planları var. Bu tunelin çəkilişi bəlkə də 10 ilə başa çatmaz. Ona görə də Ermənistanın bu tgün də, sabah da, gələcəkdə də ümidi ancaq Azərbaycan və Türkiyəyə bağlı olmalıdır.
Amma yenə də məsələ ortaya bu şəkildə qoyulursa istənilən halda Aİ-nin Ermənistanı müdafiə edəcəyi ehtimalı sıfır dərəcəsindədir”.
A.Naği hesab edir ki, bu təkcə Ukrayna müharibəsi ilə bağlı deyil, eyni zamanda Aİ və Azərbaycan münasibətləri ilə əalqədardır. “Digər tərəfindən bu Azərbaycanın gücü və müttəfiqləri ilə bağlıdır. Başda Türkiyə olmaqla Azərbaycanın ciddi müttəfiqləri var. Belə bir qüvvəyə qarşı Ermənistanın arxasında dayanıb onu müharibəyə təhrik etmək axmaqlıq olardı. Amma ola bilsin, Rusiyanın da sonuncu cəhdləridr ki, Ermənistanı təsir dairəsindən çıxarmasın. Amma Rusiyanın bu rəyi yaratmaq cəhdləri hesab edirəm ki, mənasızdır. Çünki Ermənistan bir daha Rusiyanın təsir dairəsinə qayıtmayacaq. Ermənistan hökuməti artıq kurs müəyyən edib, Paşinyan olmasa da Ermənistanın bu kursu davam edəcək. Başqa bir qüvvəni-Karapetyanı, Köçəryanı və başqalarını ortaya çıxarsalar da Rusiyapərəst qüvvələrin Ermənistanda hakimiyyətə gəlmək ehtimalı yoxdur. Ancaq çevrilişlə hakimiyyətə gələ bilərlər. Yəni Rusiyanın Ermənistan, o cümlədən Cənubi Qafqaz perspektivi artıq yoxdur. Rusiya da bunu başa düşməldir. Bəziləri başa düşür də. Putinin onları dərin bir uçruma apardığını artıq görürlər. Amma hələlik rəhbərlikdə Putindir və o da istər Ukrayana, istərsə də Cənubi Qafqazla bağlı özünün bu mənasız və avantürüst siyasətini davam etdirir. Amma hesab edirəm ki, Putinin nəyəsə ümid etməsinin yeri yoxdur”-deyə A.Nağı bildirdi.
İradə SARIYEVA
