Bu gün Azərbaycanda qeyri-neft sektorunun, xüsusən də onun vacib tərkib hissələrindən biri sayılan aqrar sektorun inkişafı xüsusi diqqət mərkəzində yer alır. Son illər ərzində bu sahədə görülən tədbirlər nəticəsində əhəmiyyətli dəyişikliklərə nail olunub. Amma görünən odur ki, hökumət bu sahədə daha mühüm nailiyyətlərə nail olmağı düşünür.
İlk növbədə həm ərzaq təhlükəsizlyinin daha etibarlı təminatı, həm də aqrar sektiorun ixracı baxımından bu sahəyə diqqət getdikcə artır. Yeri gəlmişkən qeyd edək ki, aqrar sektorun inkişafı fonunda ərzaq təhlükəsizliyi məsələsinə Prezident İlham Əliyev Goranboy rayonunda “Region Agropark”ın açılışında aqroparkın kollektivi ilə görüşündə xüsusi toxunub. Dövlət başçısı bildirib ki, Azərbaycanın ərzaq təhlükəsizliyi məsələsi öz həllini tapacaq. Onun sözlərinə görə, bütövlükdə bu gün Azərbaycanda aqroparkların yaradılması geniş vüsət alıb: "Nəzərdə tutulan 45 aqroparkdan 4-ü artıq istifadəyə verilib: Yalama, Şəmkir, Cəlilabad və Goranboy rayonunda. Beləliklə, aqroparkların yaradılması və fəaliyyəti nəticəsində ərzaq təhlükəsizliyi məsələləri öz həllini tapacaq, işsizliyin azaldılması ilə bağlı əlavə addımlar atılacaq, yerli istehsal inkişaf edəcək, ixrac imkanlarımız genişlənəcək. Çünki burada yetişdiriləcək məhsullar ixracyönümlü məhsullardır. Ölkəmizdə kənd təsərrüfatı ilə bağlı siyasətimiz uğurla icra ediləcəkdir. Kənd təsərrüfatına böyük diqqət göstərilir. Azərbaycanda kənd təsərrüfatı prioritet sahələrdən biridir. Bundan sonra biz bu siyasəti ancaq ən müasir texnologiyalar və elmi əsaslar üzərində aparacağıq".
Aqrar sahə üzrə məhsul ixracının artırılması məsələsinə kənd təsərrüfatı naziri İnam Kərimov Azərbaycan-Avropa İttifaqı biznes forumunda da ayrıca diqqət ayırıb. Eyni zamanda bu sahəyə Qərb iş adamlarını sərmayə yatırmağa dəvət edib: "Azərbaycan Avropadan olan işgüzar dairələrə aqrar sektora investisiyalar yatırılması üçün gözəl imkanlar yaradır. Nazirlik olaraq söz veririk ki, investisiyalarınızı qoruyacağıq. İşgüzar fəaliyyətinizin uğurla həyata keçirilməsi üçün tələb olunan məsləhət və məlumatları verəcəyik. Keyfiyyət baxımdan Azərbaycanda istehsal olunan kənd təsərrüfatı məhsulları rəqabətədavamlıdır. Bu məhsulları Avropa standartlarına uyğun olaraq Avropa bazarlarına çıxarmağı nəzərdə tuturuq. Bu, gələcək ticarətin olduqca vacib aspektlərindən biridir". İnam Kərimov bildirib ki, Azərbaycanda dövlət siyasətinin əsas məqsədlərindən biri kənd təsərrüfatının inkişafıdır. O, kənd təsərrüfatı sahəsində layiqli idarəçilyin mühüm əhəmiyyətə malik olduğunu qeyd edib : "Bundan başqa, kənd təsərrüfatı həmçinin möhkəm təhsil sisteminə əsaslanmalıdır. Kənd təsərrüfatı məhsullarının ticarəti məsələsinə gəldikdə, aqrar sahədə ticarətə rəvac verməliyik. Ötən il kənd təsərrüfatı məhsullarının ÜDM-də payı 6 faizə yaxın olub. Kənd təsərrüfatı məhsullarının ixracı əsas prioritetlərdən biridir. Ötən il kənd təsərrüfatı 4,2 dəfə artıb. 2017-ci ildə kənd təsərrüfatı məhsullarının ixracı 39,8 faiz artıb. Avropa İttifaqı ölkələri ilə sıx əməkdaşlıq var. Ötən il Aİ ölkələrindən 1,9 milyard dollarlıq məhsul idxal edilib, 7,4 milyard dollarlıq isə ixrac edilib. Yeni strateji məqsəd ondan ibarətdir ki, kənd təsərrüfatı məhsullarının Azərbaycandan Avropaya ixracını artıraq".
Ekspertlər də qeyd edir ki, aqrar sektor Azərbaycan üçün indi prioritet sektor hesab olunur. Bu sahənin ölkə ixracatının strukturunda payı isə görülən işlər sayəsində əhəmiyyətli dərəcədə arta bilər. Qeyd edək ki, ölkədə qeyri-neft ixracatının 70 faizi aqrar məhsullardır. Həmin aqrar məhsulların da 90 faizi Rusiya bazarına ixrac olunur. Bu isə ondan xəbər verir ki, aqrar sektor Azərbaycan qeyri-neft ixracatının əhəmiyyətli hissəsini təşkil etsə də, yenə də aqrar məhsullarımızın dünya bazarına çıxışında problemlər var. Lakin İnam Kərimovun yuxarıda qeyd edilən açıqlamasından belə bəlli olur ki, artıq Azərbaycanda istehsal olunan kənd təsərrüfatı məhsullarının Avropa standartlarına uyğun olaraq hazırlanması və Avropa bazarlarına çıxarılması nəzərdə tutulur. Ölkəmiz üçün yeni olan və 500 milyon istehlakçısı olan Avropa bazarına çıxış isə aqrar sektorun Azərbaycana daha böyük həcmdə gəlir gətirməsi deməkdir. Bu, həmçinin, Azərbaycana yeni valyuta axını üçün də əsas yaradır. Araşdırmalar göstərir ki, aqrar sektorun ixrac potensialı indi həm subsidiyalaşmadan, həm də aqrar sektorda investisiya mühitinin yaxşılaşması istiqamətində görülən işlərdən asılıdır. Qeyd olunan səpkidə atılan addımlar isə aqrar sahənin ixrac potensialının artmasına yeni zəmin yaradır. İlkin hesablamalar göstərir ki, görülən işlər qaydasında gedərsə, aqrar sektorun ixrac potensialı yaxın tezlikdə ən azı 3 milyard dollara qədər arta bilər. Onu da qeyd edək ki, kənd təsərrüfatı əsas etibarilə ərzaq təhlükəsizliyinin, məşğulluğun təmin edilməsi və ixracın şaxələndirilməsi vasitəsidir. Bu da o deməkdir ki, aqrar sahənin inkişafı əhalinin bu sahə üzrə məşğulluq səviyyəsini də yüksəldəcək.
Tahir TAĞIYEV
