Günel Fərhadqızı: "Dövlətlər səviyyəsində buna dəstəyin verilməsi sevindiricidir"
Rusiyanın baş naziri Dmitriy Medvedyev turizm sahəsində əməkdaşlıq barədə Rusiya və Azərbaycan hökumətləri arasında sazişi təsdiq edib. Bununla bağlı Rusiya baş naziri müvafiq sərəncam imzalayıb. Sərəncama əsasən, Rusiyanın Mədəniyyət Nazirliyinə Xarici İşlər Nazirliyi ilə birgə Azərbaycanla danışıqlar aparmaq və razılıq əldə olunacağı təqdirdə Rusiya Nazirlər Kabineti adından sazişi imzalamaq tapşırılır.
İmzalanan yeni sərəncamın iki ölkə arasında turizm potensialının inkişaf etdirilməsində nə kimi rolu olacaq?
Ekspert Günel Fərhadqızı qəzetimizə açıqlamasında bildirdi ki, biz hazırda Rusiya ilə turizm sahəsində kifayət qədər ciddi əməkdaşlıq edirik: "Azərbaycan rusiyalılar üçün böyük maraq kəsb etməyə başlayıb. Rusiyadan gələn turist axınının artdığını görürük. Rusiyalılar asudə vaxtını Azərbaycanda keçirməyi xoşlayır.
Rusiyalıların xalqımızın mədəniyyəti, tarixi və ənənələri ilə necə maraqlandığını görürük. Bir-birimizi asanlıqla başa düşürük. Hesab edirəm ki, zamanla turizm sahəsində birgə layihələrimiz artacaq. İmzalanan yeni saziş bu əlaqələrin inkişafına təkan verəcək.
Azərbaycan Prezidenti İlham Əliyev turizmin inkişafı ilə bağlı əlavə tədbirlər haqqında sərəncam imzalayıb.
Sərəncamda Turizm Şurasının yaradılması, Bakıda hər il "şopping festival" keçirilməsi, yeni beynəlxalq aviareyslər açılması, əcnəbilərin sərhəd-buraxılış məntəqələrində sürətli keçidinin təmin olunması, turizm zonalarına vergi güzəştlərinin tətbiq edilməsi, ölkədə turizm məktəblərinin açılması, xaricdəki diplomatik nümayəndəliklərimizdə turizm nümayəndələrinin olması məsələləri yer alıb.
2016-cı il turizm üçün mühüm oldu. Belə ki, ötən illə müqayisədə bu il turizm sektorunda xeyli dəyişikliklər olub. Biz hamıya göstərdik ki, Azərbaycan xeyli sayda turist qəbul etmək potensialına malikdir və turizm səfərləri üçün cəlbedici və turizm potensialı olan ölkədir.
Xaricdən ölkəyə gələn əcnəbilər Bakıdan daha çox bölgələrimizə getməyə üstünlük verir. Qəbələ, Qusar, Xaçmaz, Lənkəran, Qazax və s. rayonlar turistlərin əsas turizm marşrutlarıdır. Xüsusilə də rusiyalı turistlərin çimərliklərə olan marağı nəzərə alınmalıdır. Xəzər dənizinin Azərbaycan Respublikasına aid olan hissəsindən turizm məqsədləri üçün daha səmərəli istifadə etməklə çimərlik turizminin inkişafı üçün əlverişli şəraitə malikik. Hesab edirəm ki, bizdə rus turistlərini cəlb etmək üçün istənilən infrastruktur mövcuddur. Rusiya dünyaya ən çox turist ixrac edən ölkədir. Üstünlüyümüz bundadır ki, Rusiya ilə həm də qonşuyuq. Nəqliyyat xərclərinin az olması rus turistlərini bura daha çox cəlb edə bilər. Dövlətlər səviyyəsində buna dəstəyin verilməsi sevindiricidir".
Məhəmmədəli QƏRİBLİ
