İldırım Qurbanov: "Ölkədə stabil inkişafı təmin etmək üçün maliyyə sabitliyinin olması vacib faktorlardan biridir"
Maliyyə və vergi siyasəti uzlaşdırılmalıdır. Bu ilin sonuna qədər Maliyyə Sabitliyi Şurası 2017-ci il üçün pul proqramını, "2017-ci ilə və ortamüddətli dövrə makroiqtisadi və maliyyə sabitliyinin təmin olunması üzrə tədbirlər planı"nı təsdiq etməlidir. Bu, Prezident İlham Əliyevin imzaladığı "Azərbaycan Respublikasının 2017-ci il dövlət büdcəsi haqqında" Qanununun tətbiqi barədə Fərmanda öz əksini tapıb.
Fərmanda Azərbaycan Mərkəzi Bankına Maliyyə Nazirliyi ilə birlikdə, Maliyyə Sabitliyi Şurasının 2017-ci il üçün təsdiq etdiyi pul proqramına uyğun olaraq, pul və fiskal siyasətlərin daha sıx əlaqələndirilməsi istiqamətində tədbirlər görmək tapşırılıb.
Fərmanda Maliyyə Sabitliyi Şurasına 2016-cı ilin sonuna kimi "Azərbaycan Beynəlxalq Bankı" ASC-nin sağlamlaşdırılmasının sürətləndirilməsi ilə bağlı tədbirləri də təsdiqləmək və tədbirlər planına uyğun olaraq icrasını təmin etmək tapşırılıb.
Qeyd edək ki, Prezident İlham Əliyev "Azərbaycan Respublikasının 2017-ci il dövlət büdcəsi haqqında" Qanunu təsdiq edib. Qanuna əsasən, Azərbaycan Respublikasının 2017-ci il üçün dövlət büdcəsinin gəlirləri 16 255 000,0 min manat, xərcləri 16 900 000,0 min manat (o cümlədən, mərkəzləşdirilmiş gəlirləri 15 634 706,0 min manat, yerli gəlirləri 620 294,0 min manat, mərkəzləşdirilmiş xərcləri 16 211 286,0 min manat, yerli xərcləri 688 714,0 min manat) məbləğində təsdiq edilib.
Sözügedən məsələyə aydınlıq gətirən iqtisadçı-ekspert İldırım Qurbanov bir neçə məqama toxundu: "Burada söhbət vergi daxilolmaları və xərclərin uzlaşdırılmasından gedir. Yəni sahibkarlıq subyektlərində nə qədər vergi tutulursa, xərclər də tutulan verginin həcminə uyğun olmalıdır. Büdcəyə daxilolmalarla tutulmalar uzlaşdırılmalıdır. Sonra digər gəlirlər bülcə daxilolmaları ilə uzlaşdırılmalıdır. İkinci məsələ də ölkədə maliyyə sabitliyinin təmin olunmasıdır. Yəni xarici valyutaya olan tələb və təklif qanunauyğunluğunun təmin olunmasından söhbət gedir. Bu o deməkdir ki, xarici valyuta qıtlığı olmasın. Elə olmalıdır ki, sözügedən maliyyə çatışmazlığı olmasın. Ehtiyac yaranarsa, istənilən sahibkarlıq fəaliyyəti özünü lazımi qədər xarici valyuta ilə təmin edə bilsin. Maliyyə və vergi siyasətinin uzlaşdırılması deyərkən söhbət bunlardan gedir. Makroiqtisadi sabitliyin qorunması baxımından bu yöndə sistemli işlərin görülməsi vacibdir. Çünki ölkədə stabil inkişafı təmin etmək üçün maliyyə sabitliyinin olması vacib faktorlardan biridir". Vidadi ORDAHALLI
