Rəsul Cahangirli: "Çünki adından da göründüyü kimi, bank əsasən infrastruktur layihələrini maliyyələşdirir"
Azərbaycanın İqtisadiyyat Nazirliyi Asiya İnfrastruktur İnvestisiyalar Bankının (AİİB) ölkəmizdə yerli nümayəndəliyinin açılması imkanlarını müzakirə etməyə hazırdır. Bunu İqtisadiyyat Nazirliyinin Beynəlxalq təşkilatlarla əməkdaşlıq departamentinin direktoru Ruslan Rüstəmli deyib.
Onun sözlərinə görə, bu cür əməkdaşlıq təcrübəsi Dünya Bankı, Asiya İnkişaf Bankı kimi başqa beynəlxalq maliyyə institutları ilə də mövcuddur: "Bu il bankın nümayəndə heyəti ölkəmizdə olub, danışıqlar aparmışıq. AİİB-in Direktorlar Şurası artıq TANAP üçün kredit ayırmaq təklifini müsbət dəyərləndirib".
Məlumat üçün qeyd edək ki, AİİB Çin hökumətinin təşəbbüsü ilə yaradılmış beynəlxalq maliyyə institutudur. Mənzil-qərargahı Çin Xalq Respublikasının paytaxtı Pekin şəhərində yerləşir.
Bankın yaradılması ilə bağlı ilk sənəd 24 oktyabr 2014-cü ildə imzalanıb. Həmin gün Asiya qitəsinin 21 ölkəsi bu nəhəng investisiya bankının yaradılması məqsədilə memorandum imzalayıb. Hazırda Azərbaycan da daxil olmaqla 57 üzvü var. Bank infrastruktur layihələrini maliyyələşdirməklə Asiya regionunun inkişafına dəstək vermək məqsədilə yaradılıb. Bankın kapitalı 100 milyard ABŞ dolları məbləğində müəyyən edilib. Bu vəsaitin təxminən 75 faizini Asiya ölkələri təmin edəcək. Ölkələrin payı onların iqtisadiyyatının dəyərinə uyğun müəyyən olunur.
Belə bir bankın Azərbaycanda nümayəndəlik yaratmaq istəyinə ekspertlər necə yanaşır?
Məsələyə münasibət bildirən ekspert Rəsul Cahangirlinin fikrincə, prinsipcə, belə bir maliyyə qurumunun Azərbaycanda nümayəndəliyinin olması yaxşı haldır: "Çünki adından da göründüyü kimi, bank əsasən infrastruktur layihələrini maliyyələşdirir. Məlum olduğu kimi, Azərbaycan Dünya Bankı, Beynəlxalq Valyuta Fondu, Avropa İnkişaf və Yenidənqurma Bankı və digər maliyyə qurumları ilə əməkdaşlıq edir. Müxtəlif dövrlərdə həmin maliyyə qurumlarından kredit götürülüb. Azərbaycan neft bumu dönəmində daxil olan vəsaitlər hesabına böyük infrastruktur layihələr həyata keçirib. Ancaq indi həmin vəsait gəlmir. O üzdən, ölkədəki infrastrukturun inkişaf etdirilməsində bu kimi banklarla əməkdaşlıq etmək ölkəyə fayda gətirəcək. Bu baxımdan hesab edirəm ki, AİİB-in Azərbaycanda nümayəndəliyinin açılması faydalı olacaq". Vidadi ORDAHALLI
