Natiq Cəfərli: "Bankların sağlamlaşdırılması prosesi bitdikdən sonra, 2017-ci ilin ikinci yarısına doğru maliyyə sektoruna qoyulan investisiyalarda irəliləyiş müşahidə oluna bilər"
Bu ilin yanvar-noyabr ayları ərzində Azərbaycan iqtisadiyyatına investisiya qoyuluşlarının 2,6 mln. manatı və ya 0,02 %-i maliyyə və sığorta fəaliyyəti ilə bağlı olub.
Rəsmi statistik rəqəmlərə istinadan xəbərə görə, bu sahəyə investisiyaların həcmində ötən ilin müvafiq dövrü ilə müqayisədə azalma müşahidə olunub. Müqayisəli qiymətlərlə əvvəlki ilin müvafiq dövrünə nisbətən sərmayə qoyuluşunun həcmi 86,3 % azalıb. Xatırladaq ki, ötən ilin müvafiq dövründə bu sahəyə investisiyaların məcmu investisiya qoyuluşunda xüsusi çəkisi 0,14 % təşkil edib.
Qeyd edək ki, 2016-cı ilin yanvar-noyabr aylarında ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala 13 009,1 mln. manat və ya əvvəlki ilin müvafiq dövrü ilə müqayisədə 28,0 % az vəsait yönəldilib. Ümumi sərmayənin 33,0 %-i dövlət, 67,0 %-i qeyri-dövlət sektorunun sərmayədarlarının payına düşüb. Daxili mənbələrdən əsas kapitala yönəldilmiş vəsaitin dəyəri ümumi sərmayənin 41,0 %-ni təşkil edib.
Maliyyə sektoruna qoyulan sərmayənin azalması barədə fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, iqtisadiyyatın bütün sahələrində əsaslı kapital qoyuluşu azalıb. O cümlədən, maliyyə sektorunda da analoji problem qeydə alınıb: "Cari il ərzində maliyyə, bank və sığorta sektorunda bu problemlər nəzərəçarpacaq qədər yaşandı. Bank sektorunda yaşanan problemlər ciddi sərmayə qoyuluşunun azalmasına səbəb oldu. Bank sektorunda baş verən təlatümlər maliyyə sektoruna yatırılan investisiyaya marağın azalmasına səbəb oldu. Bank sektorunda sağlamlaşma addımları aparılmazsa, gələcəkdə də bu tendensiyanın davametmə ehtimalı yüksəkdir. Proses bu şəkildə davam edərsə, növbəti il ərzində də bəzi bankların bağlanmasının, qalanlarının isə birləşməsinin şahidi olacağıq".
Həmsöhbətimiz hesab edir ki, bankların normal fəaliyyət göstərməsi üçün onların problemli kredit məsələsi həll olunmalıdır. Bankların dövriyyəsi və kredit portfeli artırılsa, investisiya qoyuluşu üçün cəlbedici olar: "Problemli kredit məsələsi həll olunarsa və bankların sağlamlaşdırılması prosesi bitdikdən sonra, 2017-ci ilin ikinci yarısına doğru maliyyə sektoruna qoyulan investisiyalarda irəliləyiş müşahidə oluna bilər".
Günel CƏLİLOVA
