Rəşad Həsənov: "Azərbaycan ekoloji cəhətdən təmiz məhsulların istehsalını, normal təbliğatını və reklamını təşkil etsə, bu, ölkə iqtisadiyyatına müsbət təsir edər"
Azərbaycanda ekoloji təmiz məhsul istehsal edən fermer təsərrüfatlarının formalaşdırılması nəzərdə tutulur.
Bu, Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi"ndə qeyd edilib. Sənəddə bildirilir ki, ekoloji təmiz kənd təsərrüfatı sahəsində ixtisaslaşmış fermer təsərrüfatlarının yaradılmasının dəstəklənməsi imkanları araşdırılacaq. Araşdırma nəticəsində bunun həyata keçirilməsi məqsədəuyğun hesab edilsə, ilk növbədə kənd səviyyəsində ekoloji təmiz təsərrüfatçılığın fundamental bazisi hesab edilən üzvi gübrələrin sənaye üsulu ilə istehsalı və tətbiqi istiqamətində iş aparılacaq.
Bitkilərin ekoloji təmiz kənd təsərrüfatı üsulu ilə becərildiyi sahələrin genişləndirilməsi üçün həvəsləndirmə tədbirləri görüləcək. Ekoloji təmiz kənd təsərrüfatı istehsalının toxum və əkin materialları ilə təminatı gücləndiriləcək. Ekoloji təmiz kənd təsərrüfatı üzrə pilot təsərrüfatların yaradılması ilə bağlı layihələr həyata keçiriləcək.
Məsələ barədə fikir bildirən iqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, hazırda dünya ölkələrinin əsas problemlərindən biri ekoloji təmiz, geni modifikasiya olunmamış ərzaq məhsullarına tələbatın ödənilməsidir: "Bəllidir ki, dünyada əhalinin sayı və istehsal olunan kənd təsərrüfatı məhsulları arasında disbalans beynəlxalq qurumların geni modifikasiya olunmuş məhsulların istehsalına hansısa formada loyal yanaşmasına gətirib çıxarır. Son illər bu sahədə müəyyən irəliləyiş hiss olunur. İnkişaf etmiş ölkələrdə istehlakçıların alıcılıq qabiliyyətinin yüksək olması ekoloji cəhətdən təmiz, təbii məhsulların istehlakı qabiliyyətini artırıb. Bu o deməkdir ki, Azərbaycan ekoloji cəhətdən təmiz məhsulların istehsalını, normal təbliğatını və reklamını təşkil etsə, bu, ölkə iqtisadiyyatına müsbət təsir edər. Ekoloji cəhətdən təmiz məhsullara xarici bazarda böyük tələb var".
Həmsöhbətmiz onu da əlavə etdi ki, ərzaq təhlükəsizliyi ilə bağlı Dövlət Proqramının müddəti bu yaxınlarda bitib və yeni bir konsepsiyanın imzalanması gözlənir: "Ümumiyyətlə, Dövlət Proqramı oldu-olmadı, istənilən halda, ərzaq təhlükəsizliyi dövlətin nəzarətində olan istiqamətlərdən biri hesab olunur. Bu baxımdan düşünürəm ki, Azərbaycan üçün də ekoloji cəhətdən təmiz məhsulların istehsalı mühüm əhəmiyyət kəsb edir. Azərbaycanlı alıcı da artıq məhsulun ekoloji baxımdan təmiz olmasına xüsusi diqqət yetirir. Geni modifikasiya olunmuş məhsulların istehlak səviyyəsi günü-gündən azalır. Ekoloji cəhətdən təmiz məhsul istehsal edən təsərrüfatlar yaradılsa, bu həm istehsal olunan məhsulun ixracını genişləndirər, həm də daxili tələbatın ödənilməsi üçün vacibdir".
Günel CƏLİLOVA
