ARDNŞ-in transmilli neft şirkətinə çevrilmək yollarında Kuba şansı...
Günel Fərhadqızı: "Bizim bu sahədə kadr potensialımızın yetərli olması belə layihələrdə iştirakımızı mümkün edir"
Meksika körfəzinin Kubaya məxsus hissəsində tədqiq edilməmiş neft yataqları var və Azərbaycan şirkətləri həmin yataqların işlənməsi prosesində iştirak edə bilər. Bunu Kubanın Azərbaycandakı səfiri Alfredo Nieves Portuondo deyib.
Səfir bildirib ki, energetika sahəsində ixtisaslaşmış Azərbaycan şirkətləri Kubanın enerji layihələrində müstəqil olaraq, eləcə də beynəlxalq konsorsiumların tərkibində iştirak edə bilər.
Diplomatın sözlərinə görə, Kuba Azərbaycanın ali məktəblərində, xüsusən energetika sahəsi üzrə öz kadrlarının təhsil alaraq ixtisaslaşmasında maraqlıdır.
Bu, SOCAR-ın böyük transmilli şirkətə çevrilməsində nə kimi rol oynaya bilər?
İqtisadçı Günel Fərhadqızı qəzetimizə açıqlamasında bildirdi ki, bu doğrudan da böyük uğurdur: "Kuba Azərbaycandan çox uzaqda yerləşir. Başqa qitədə olan bir ölkənin Azərbaycanın təcrübəsinə müraciət etməsi bizim neft sənayəsi sahəsində inkişafımızdan xəbər verir. Azərbaycanın bu sahədə ən tanınmış şirkəti SOCAR-dır. Artıq bu ad dünya brendinə çevrilməkdədir. Dünyanın bir çox ölkələrində işlər görür. Həmçinin bəzi ölkələrin yanacaqdoldurma məntəqələri bizim brendin əlində cəmləşib. Bu, maddi qazanc olmaqla yanaşı, həm də ölkənin dünya səviyyəsində reklamıdır. Məhz bunun nəticəsidir ki, Kuba kimi ölkə bizim təcrübəmizdən yararlanmaq istəyir. Belə amillər SOCAR-ın da reytinqini yüksəldəcək və əminliklə söyləmək olar ki, gələcəkdə digər ölkələr də bizim təcrübəmizdən yararlanmaq istəyəcək. Deyilən məsələ eyni zamnda ölkəmizi yalnız neft satan ölkə kimi tanıtmır. Bununla sübut olunur ki, Azərbaycan neft emalı sahəsində yüksək nailiyyətlərə imza atmış ölkədir. Bizim bu sahədə kadr potensialımızın yetərli olması belə layihələrdə iştirakımızı mümkün edir".
Məhəmmədəli QƏRİBLİ
