Musa Quliyev: "Bu da çoxsaylı iş yerinin açılmasına gətirib çıxaracaq"
Azərbaycanda vətəndaşların uyğun qiymətə mənzil təminatı sahəsində 2020-ci ilədək geniş strateji hədəflər müəyyən edilib. Bu barədə Azərbaycan Prezidenti İlham Əliyevin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında uyğun qiymətə mənzil təminatının inkişafına dair Strateji Yol Xəritəsi"ndə qeyd olunur.
Həmçinin, sənəddə göstərilir ki, 2020-ci ilədək olan dövr üçün müəyyən edilmiş hədəflərin reallaşması nəticəsində Azərbaycanda 2020-ci ildə real ümumdaxili məhsulun birbaşa 168 milyon və dolayısı ilə 81 milyon manatadək artacağı, tikinti sektorunda 10 minə yaxın yeni iş yerinin yaradılacağı proqnozlaşdırılır. Eyni zamanda, bildirilib ki, bu istiqamətdə dövlət-özəl resursları hesabına 900 milyon manat həcmində investisiya qoyuluşu tələb olunur.
O da qeyd olunur ki, "Yol Xəritəsi"ndə müəyyən edilmiş hədəflərə nail olmaq üçün bu sənədin üçüncü fəslində göstərilən mövcud vəziyyət nəzərə alınmaqla, 6 prioritet üzrə tədbirlər görüləcək, müvafiq imkanlardan və üstünlüklərdən tam istifadə ediləcək.
Bütün bu deyilənlərin fonunda, tikinti sektorunda 10 min iş yerinin açılması necə reallaşdırılacaq? Sözügedən məsələni dəyərləndirən millət vəkili Musa Quliyevin fikrincə, sözügedən layihə tikinti sektoru ilə yanaşı, daha 20-yə yaxın sahənin canlanmasına təkan verəcək: "Bu da çoxsaylı iş yerinin açılmasına gətirib çıxaracaq. Ümumiyyətlə, Prezident İlham Əliyevin yeni sosial evlər layihəsi Azərbaycanın yalnız inşaat sektorunu deyil, 20-yə yaxın digər sektorun da canlanmasına səbəb olmaqla yanaşı, həm də minlərlə azərbaycanlı ailəsinin mənzillə təmin olunmasına şərait yaradacaq. Paytaxtda yaxın dövrlər üçün 100-dən çox yaşayış binasının tikintisi çox böyük iqtisadi, sosial və siyasi əhəmiyyəti olan bir layihədir. Məlumdur ki, tikinti sektoru inkişaf etdikcə, özü ilə yanaşı, daha 20-yə yaxın başqa sektorun da inkişafına təkan verir. İaşə, ticarət, tikinti materiallarının istehsalı, məşğulluq və başqa bu kimi sahələrdə də analoji olaraq canlanma başlayacaq. Bu addım, digər tərəfdən, ölkənin maliyyə bazarlarına tarazlaşma baxımından da təsir göstərir. Dünyada baş verən gərgin maliyyə-iqtisadi böhran dövründə sözügedən layihənin ortaya atılması Prezidentin uzaqgörən iqtisadi siyasətinin bir ifadəsidir. Eyni zamanda, öz xalqının sosial vəziyyətini yaxşılaşdırmaq üçün qiymətli bir təşəbbüs kimi də qiymətləndirilməlidir. Həmin mənzillərin tikilməsilə yanaşı, heç şübhəsiz, infrastruktur da yaranacaq, sosial obyektlər tikiləcək, orada yaşayacaq insanların təhsil, səhiyyə, mədəni xidmətlər alması üçün də obyektlər istifadəyə veriləcək".
Vidadi ORDAHALLI
