Ənvər Fərəcov: "Azərbaycanda aparılan sistemli islahatlar onu göstərir ki, yaxın illərdə biz buna nail olacağıq"
Məlum olduğu kimi, Azərbaycan Prezidenti İlham Əliyev "Azərbaycan Respublikasında 2017-ci il üçün ehtiyac meyarının həddi haqqında" 16 dekabr 2016-cı il tarixli Qanunun tətbiqi barədə Sərəncam imzalayıb.
Sərəncamda qeyd olunur ki, ünvanlı dövlət sosial yardımının təyin edilməsi məqsədilə 2017-ci il üçün ehtiyac meyarının həddi 116 manat məbləğində təsdiq edilib. Müvafiq qanun 2017-ci il yanvarın 1-dən qüvvəyə minir.
Dövlət başçısının digər sərəncamı ilə 2017-ci il üçün yaşayış minimumu ölkə üzrə 155 manat, əmək qabiliyyətli əhali üçün 164,5 manat, pensiyaçılar üçün 130,2 manat, uşaqlar üçün 136,6 manat məbləğində müəyyən edilib.
Bütövlükdə, sözügedən qərarı ekspertlər necə dəyərləndirir? Məsələyə münasibət bildirən ekspert Ənvər Fərəcovun fikrincə, büdcənin hazırkı imkanları çərçivəsində sözügedən artımları qənaətbəxş saymaq olar: "Düzdür, bu o demək deyil ki, artımlar ehtiyacları tam ödəyəcək. Tam ödəməsə də, minimum səviyyədə təmin edəcək. Ölkədə yaşayış minimumunun hesablanma qaydaları köhnəlib, indiqatorlar sovetdən qalıb və yenilənməsinə ehtiyac var. Ancaq bunu o vaxt etmək olar ki, ölkədə iqtisadi artım sürətlə getsin və daxil olan gəlirlərin həcmi artsın. O zaman yaşayış minimumunun məbləğini və ehtiyac meyarını artırmaq olar. Necə ki, bir sıra inkişaf etmiş ölkələrdə bu belədir. Bu zaman isə ölkədə minimum pensiya, minimum əməkhaqqı da buna uyğun artırılır. Ötən il Azərbaycanda iki dəfə devalvasiya baş verib. Manat dollar qarşısında iki dəfə dəyər itirib. Bu baxımdan sözügedən sahələrdə ciddi artım aparmaq mümkün olmur. Ancaq Azərbaycanda aparılan sistemli islahatlar onu göstərir ki, yaxın illərdə biz buna nail olacağıq. Ölkənin iqtisadi imkanları artacaq". Vidadi ORDAHALLI
