Pərviz Heydərov: "Bu dərhal diqqəti cəlb edəcək və qısa müddətə ardıcıl bir prosesə çevriləcək"
Biznes inkubatorlarının sayı artacaq. Azərbaycan hökuməti 2020-ci ilədək ölkədə ən azı 5 yeni biznes inkubatorunun yaradılmasını proqnozlaşdırır. Bu barədə "Azərbaycan Respublikasında kiçik və orta sahibkarlıq səviyyəsində istehlak mallarının istehsalına dair Strateji Yol Xəritəsi"ndə deyilir.
"2020-ci ilədək o cümlədən 3-5 model müəssisənin yaradılması, həmçinin il ərzində ən azı 25 startap layihəsinin başlanması gözlənir", - sənəddə qeyd olunur.
"Yol Xəritəsi"nə əsasən, bu prioritetin icrası üçün 2020-ci ilədək 50 mln. manat həcmində investisiya qoyuluşu tələb ediləcək. "Qeyd olunan investisiyalar 2020-ci ildə Azərbaycanın real ÜDM-də 35 mln. manat məbləğində artımını təmin etməlidir", - sənəddə vurğulanır.
İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, ölkədə "Kiçik və orta sahibkarlıq səviyyəsində istehlak mallarının istehsalına dair Strateji Yol Xəritəsi"nə böyük ümidlər var: "Çünki kiçik və orta sahibkarlığın inkişafı qeyri-neft sektorunun inkişafında mühüm vəzifə təşkil etməli və əsas hədəf sayılmalıdır. İnkişaf etmiş ölkələrdə ÜDM istehsalında kiçik və orta sahibkarların payına baxsaq, qeyd edə bilərik ki, neçə illərdir, məsələn, konkret olaraq kənd təsərrüfatına dövlət tərəfindən mühüm güzəştlər tətbiq edilsə də, müvafiq maliyyə dəstəyi göstərilsə də, kreditləşdirmə həyata keçirilsə də, bizdə kiçik və orta sahibkarlığın inkişaf səviyyəsi qənaətbəxş deyil.
Ona görə sənəddə də qeyd edilib ki, inkişaf etmiş ölkələrdə kiçik və orta sahibkarlığın ÜDM və məşğulluqdakı xüsusi çəkisinə nəzər saldıqda Azərbaycanda da davamlı iqtisadi inkişafın təmin edilməsində onun əsas hərəkətverici amilə çevrilməsi qarşıda duran əsas çağırışlardan olduğu qənaətinə gəlinir.
"Strateji Yol Xəritəsi" çərçivəsində görüləcək tədbirlərə mərkəzləşdirilmiş agentliyin yaradılması, xüsusi sənaye zonalarının və klasterlərin təşkili, fəaliyyətə xitam verilməsi və müflisləşmə məsələlərinin həlli sahəsində islahatların aparılması, sözügedən sahibkarlıq subyektlərinin beynəlxalq ticarət əməliyyatları üçün maliyyə xidmətlərinin genişləndirilməsi və birbaşa xarici investisiyaların təşviqi, ayrı-ayrı sektorlar üzrə ixrac
assosiasiyalarının yaradılması və o cümlədən, biznes inkubatorları, startap layihələrinin inkişaf etdirilməsi, model müəssisələrin təsisi kimi işlər daxildir ki, bunların hər biri ayrı-ayrılıqda mühüm və olduqca ciddi məsələlərdir.
Sonuncu diqqət tələb edən, xüsusi yanaşmaya ehtiyac duyan bir prioritetdir. Biznes inkubator başlanğıc mərhələdə kiçik sahibkarlıq fəaliyyətinin yaranması, başqa sözlə, təşəkkül tapması üçün yardım əli uzadan bir subyektdir. Yəni kiçik sahibkarlıqla məşğul olmaq istəyənlərə icarə üçün yer, məsləhət verir, hüquqi, mühasibat və digər xidmətlər göstərir. Bu çox mühüm və vacib məsələdir. Mən şərhlərimdə dəfələrlə qeyd etmişəm ki, sahibkar alverçi demək deyil, ideya istehsalçısı və təşəbbüskarçı deməkdir. İstənilən ideya və təşəbbüsün isə gerçəkləşməsinə yardım və köməklik lazımdır. Bu təkcə pul verməkdən ibarət deyil. Məsləhət, hüquqi yolunu göstərmək, qeydiyyata alınmadan başlayaraq, kargüzarlıq, yönləndirmə və sair buraya daxildir".
P.Heydərovun sözlərinə görə, ilk biznes inkubatorlar ötən əsrin 50-ci illərində ABŞ-da meydana gəlib. Bu gün də bunlar, demək olar, bütün dünyada mövcuddur. İnkişaf etmiş ölkələrdə biznes inkubatorların işinə, məsələn, müvafiq ofisi zəruri avadanlıqlarla təmin etmək, mühasibat uçotu, kargüzarlıq aparmaq, biznesin irəliləməsi üçün məsləhətlər, hətta müvafiq vəsait axtarışı, biznesin aparılması və bu sahədə uğura nail olunması üçün müxtəlif təlimlər, seminarlar keçirmək kimi xidmətlər daxildir: "İndi qeyd olunur ki, hökumət 2020-ci ilə kimi ölkədə azı 5 biznes inkubatoru yaradılmasını nəzərdə tutur. Eybi yox, sayca 5-dən də az olsun, amma kiçik bizneslə məşğul olmaq istəyənlərə bunun əhəmiyyətli dərəcədə səmərəsi dəysin. "Strateji Yol Xəritəsi"nə əsasən, sözügedən prioritetin icrası üçün 2020-ci ilədək 50 milyon manat həcmində investisiya tələb olunduğu yazılıb. Lakin digər müsahibələrimdə də qeyd etmişəm ki, müəyyən edilən strateji hədəfə və qeyd olunan məsələlərin həllinə çatmaq üçün əsas şərt tələb olunan vəsaitlərlə bağlı deyil və bu, medalın görünən tərəfidir. Başqa sözlə desəm, maliyyə tapmaq özlüyündə çətin iş sayılmır, hər şey məhz görüləcək işlərdən asılıdır.
Hesab edirəm ki, qarşıdakı 3-4 il ərzində hətta 2-3 biznes inkubatorunun təşəkkül tapması yolu ilə kiçik və orta sahibkarlığın inkişafına həqiqi mənada dəstək göstərilməsinə nail olunarsa, bu dərhal diqqəti cəlb edəcək və qısa müddətə ardıcıl bir prosesə çevriləcək".
Günel CƏLİLOVA
