Əli Əlirzayev: "Bu tamamilə ədalətli yanaşmadır"
Prezident İlham Əliyev Azərbaycan Respublikasının Prezidenti yanında Mənzil İnşaatı Dövlət Agentliyinin birinci layihəsi olan Yasamal Yaşayış Kompleksində inşa ediləcək ilk doqquzmərtəbəli binanın və məktəb binasının təməlqoyma mərasimində çıxışı zamanı bildirib ki, sosial binaların tikintisi mənzilə ehtiyacı olan ailələr üçün böyük dəstək olacaq: "Bu, yeni bir sosial layihədir. Bu layihənin icra edilməsi bir daha onu göstərir ki, sosial məsələlərin həlli bizim üçün həmişə prioritet olub".
Prezident çıxışında xüsusi olaraq vurğulayıb ki, mənzillərin verilməsi zamanı müəyyən sosial statusu olan ailələrə önəm veriləcək: "Çünki biz bazar iqtisadiyyatı şəraitində yaşayırıq, imkanlı təbəqə, yoxsul təbəqə, aztəminatlı vətəndaşlar var və onların problemlərinin həllini dövlət öz üzərinə götürür. Artıq qeyd etdiyim kimi, müxtəlif sosial proqramlar icra olunur və mənzil təminatı da əlbəttə ki, hər bir ailənin həyatında xüsusi yer tutan amildir. İmkanlı vətəndaşlar özlərini mənzillərlə, evlərlə təmin edirlər, ancaq buna imkanı olmayanlar üçün dövlət öz yardımını əsirgəməməlidir. Bu gün bu layihənin başlanması bunun əyani sübutudur. İlk növbədə şəhid ailələrinə, müharibə veteranlarına, gənc mütəxəssislərə, müəllimlərə, alimlərə, hərbçilərə, bu kateqoriyadan olan vətəndaşlara bu yaşayış kompleksində güzəştli şərtlərlə mənzillər veriləcək. Şərtlər doğrudan da çox güzəştlidir, uzunmüddətli ödəmə şərti ilə insanlar yeni mənzillərə köçəcəklər".
Bütövlükdə, belə yanaşmanı ekspertlər necə dəyərləndirir?
Məsələyə münasibət bildirən iqtisadçı-alim Əli Əlirzayev Prezidentin yanaşmasına müsbət prizmadan yanaşdı və bunu dəstəklədiyini dedi: "Bu tamamilə ədalətli yanaşmadır. Məsələ ondadır ki, elə sosial kateqoriyadan olan insanlar var onların imkanları ömür boyu aşağı olacaq. Çünki onların xüsusi təsərrüfatı yoxdur, bizneslə məşğul olmurlar, maaşa baxan adamlardır, ayda 400-500 manat əməkhaqqı alırlar və s. Belə kateqoriyadan olan şəxslərin mənzil təminatı yalnız sosial proqramlar çərçivəsində həll oluna bilər. Yəni bu, sosial qayğıdan, himayədən asılı olan məsələdir. Ona görə də belə kateqoriyadan olan şəxslərin sosial mənzillərlə təmin olunması optimal çıxış yoludur. Onsuz da həmin mənzillər havayı verilməyəcək. Mənzili alanlar zamanla onun pulunu verəcək. Hesab edirəm ki, çəkilən xərclər daxilində həmin adamlara uzunmüddətli kredit verməklə onların mənzil ehtiyacını həll etmək olar. O üzdən bu istiqamətdə görülən işləri müsbət dəyərləndirirəm".
Vidadi ORDAHALLI
