İldırım Qurbanov: "Bütün bunlar ötən on ildə ölkədə müşahidə olunan inkişafın göstəricisidir"
Prezident İlham Əliyev Mənzil İnşaatı Dövlət Agentliyinin birinci layihəsi olan Yasamal Yaşayış Kompleksində inşa ediləcək ilk doqquzmərtəbəli binanın və məktəb binasının təməlqoyma mərasimində çıxışı zamanı bildirib ki, bu yeni bir sosial layihədir: "Bu layihənin icra edilməsi bir daha onu göstərir ki, sosial məsələlərin həlli bizim üçün həmişə prioritet olmuşdur".
İlham Əliyev çıxışı zamanı həmçinin vurğulayıb ki, son on ildə pensiya və maaşlar bir neçə dəfə artıb: "Ümumiyyətlə, son illər ərzində biz ciddi iqtisadi islahatlarla yanaşı, həmişə sosial məsələlərin həllinə də böyük diqqət vermişik. Son 10 il ərzində pensiyalar 7 dəfə, maaşlar 5 dəfə artmışdır. Ölkəmizdə bir çox sosial infrastruktur obyektləri tikilmişdir. Üç mindən çox məktəb, 600-dən çox xəstəxana tikilib təmir edilmişdir. Doxsandan çox məcburi köçkün qəsəbəsi salınmışdır və bu proses davam edir. Ünvanlı sosial yardımın məbləği artırılır və bu proqram üzrə yardım alanların sayı da lazım gələndə artırılır. Bir sözlə, sosial siyasət bizim siyasətimizin əsas istiqamətlərindən biridir. Əlbəttə ki, bu siyasəti daha da uğurla aparmaq üçün bizim güclü iqtisadi imkanlarımız olmalıdır. Bu imkanları biz yaradırıq, hətta böhranlı vaxtlarda da ciddi islahatlar aparılır və bu islahatlar öz nəticələrini verməkdədir".
Maraqlıdır, 10 il əvvəl Azərbaycanda pensiya və maaşların konkret məbləği nə qədər idi?
Məsələyə münasibət bildirən iqtisadçı-ekspert İldırım Qurbanovun sözlərinə görə, on il əvvəlki dövrlə müqayisədə xeyli irəliləyiş var: "Məsələ ondadır ki, on il əvvəl orta hesabla Azərbaycanda pensiyaların məbləği 70, 80, 90 manat idi. Pensiyaların məbləği bunun arasında dəyişirdi. Əlilliyə görə verilən sosial müavinətlərin həcmi indiki dövrlə müqayisədə qat-qat aşağı idi. Digər tərəfdən, on il əvvəl minimum əməkhaqqı 70 manat idi. Bütövlükdə isə, minimum məvacib 70-90 manat arasında dəyişirdi. On il əvvəl Azərbaycanda orta əməkhaqqı 111 manat idi. İndi Azərbaycanda orta aylıq əməkhaqqının həcmi 460 manata çatıb. Digər tərəfdən, bu gün Azərbaycanda minimum əməkhaqqının həcmi 140 manatdan yuxarıdır. Bütün bunlar ötən on ildə Azərbaycanda müşahidə olunan inkişafın göstəricisidir. Ölkə iqtisadiyyatı ötən illər ərzində dinamik inkişaf edib. Sevindirici haldır ki, artıq Azərbaycanda qeyri-neft sektorunun inkişaf etdirilməsi istiqamətində ciddi işlər görülür".
Vidadi ORDAHALLI
