Zakir Əhmədov: "Çoxsaylı iş yeri açılacaq"
2017-ci ildə inşaat sektorunda çox böyük bir inkişaf görəcəyik. Bunu Prezident İlham Əliyev Azərbaycan Respublikasının Prezidenti yanında Mənzil İnşaatı Dövlət Agentliyinin birinci layihəsi olan Yasamal Yaşayış Kompleksində inşa ediləcək ilk doqquzmərtəbəli binanın və məktəb binasının təməlqoyma mərasimində çıxışı zamanı deyib.
Dövlət başçısı qeyd edib ki, sosial mənzillərin tikintisi zamanı əsasən yerli materiallara önəm veriləcək: "İnşaat materialları ilə məşğul olan, onları istehsal edən şirkətlər də öz fəaliyyətini bərpa edəcək, genişləndirəcəklər. Beləliklə, bu layihənin ölkə iqtisadiyyatına da çox müsbət təsiri olacaq. Nəzərə alsaq ki, son illərdə ölkəmizdə aparılan islahatlar və şaxələndirmə siyasəti nəticəsində biz, demək olar ki, əsas tikinti materialları ilə özümüzü təmin edirik, bu layihələrin icrasında biz idxal komponentindən asılı olmayacağıq. Mənə verilən məlumata görə, bu binaların tikintisində istifadə ediləcək materialların 80-90 faizi Azərbaycan istehsalı olacaq və ilk növbədə, biz idxala tələbatımızı azaldacağıq. Digər tərəfdən yerli şirkətlər də inşaat materiallarını istehsal edərək öz maddi imkanlarını yaxşılaşdıracaqlar. Mən özəl sektora da müraciət edirəm. Biz 2017-ci ildə inşaat sektorunda çox böyük bir inkişaf görəcəyik. Bax, bu gün Azərbaycanda sosial binaların tikintisi, icra edilən digər layihələr çox böyük canlanmaya gətirib çıxaracaq. Bu layihə çərçivəsində 29 bina tikiləcək".
Sözügedən layihənin həyata keçirilməsi zamanı əsasən yerli materiallardan istifadə olunmasına ekspertlər necə baxır? Məsələyə münasibət bildirən ekspert Zakir Əhmədovun fikrincə, tikinti zamanı yerli materiallardan istifadə olunması valyutanın xaricə axınının qarşısını alacaq: "Ümumilikdə, bunun iqtisadi faydası çoxdur. Ən başlıcası, bu, tikini məhsullarının istehsalı sahəsində ciddi canlanma yaradacaq. Bu da çoxsaylı iş yerinin yaranması deməkdir. Nəzərə alsaq ki, tikinti sektoru kifayət qədər böyük əməktutumludur, o zaman bunun sosial-iqtisadi effekti daha böyük olacaq. Layihənin həyata keçirilməsi üçün nəzərdə tutulan vəsaitin böyük hissəsi Azərbaycana qalacaq. Bundan yerli istehsal faydalanacaq. Bu da, öz növbəsində, ölkədə qeyri-neft sektorunun inkişafına ciddi təkan verəcək. Yeni istehsal münasibətlərinin yaranmasına, onların inkişafına stimul verəcək. Məhsula olan tələbatın əsas hissəsinin yerli istehsal hesabına təmin olunması iqtisadiyyatın vacib faktorlarından biridir". Vidadi ORDAHALLI
