Vüqar Bayramov: "İstifadə olunmayan torpaqlara görə verginin tətbiq olunması tək bizdə deyil"
Gələn il yanvarın 1-dən istifadəsiz torpaqlara görə yeni vergi dərəcələri tətbiq ediləcək. Kənd Təsərrüfatı Nazirliyindən verilən məlumata görə, nazirlik "Təyinatı üzrə istifadə edilən və ya təyinatı üzrə istifadə edilməsi mümkün olmayan kənd təsərrüfatı torpaqlarının müəyyən edilməsi meyarları və Qaydası" layihəsini hazırlayıb. Meyarlar və qayda kənd təsərrüfatı torpaqlarına tətbiq ediləcək vergi dərəcəsini müəyyənləşdirmək üçün hazırlanıb.
Prezidentin 6 may 2016-cı il tarixli Fərmanı ilə Vergi Məcəlləsində edilmiş dəyişikliklərə əsasən, torpaq sahibləri istifadəsiz kənd təsərrüfatı torpaqlarının hər 100 kvadratmetrinə görə 1 manat məbləğində vergi ödəyəcək.
"Azərbaycan Respublikasının Vergi Məcəlləsində dəyişikliklər edilməsi haqqında" Qanuna görə, müvafiq icra hakimiyyəti orqanının verdiyi arayışa əsasən, təyinatı üzrə istifadə edilən və ya irriqasiya, meliorasiya və digər aqrotexniki səbəblərdən təyinatı üzrə istifadə edilməsi mümkün olmayan kənd təsərrüfatı torpaqları üzrə torpaq vergisinin dərəcəsi 1 şərti bal üçün 0,06 manatdır. Təyinatı üzrə istifadə edilən və ya təyinatı üzrə istifadə edilməsi mümkün olmayan kənd təsərrüfatı torpaqları müvafiq icra hakimiyyəti orqanının - Kənd Təsərrüfatı Nazirliyinin təsdiqlədiyi qayda və meyarlar əsasında müəyyən edilir.
Ümumilikdə, bu sözügedən sahədə vəziyyətin yaxşılaşmasına necə təsir göstərəcək? Məsələyə münasibət bildirən iqtisadçı-ekspert Vüqar Bayramovun fikrincə, istifadəsiz torpaqlara görə yeni vergi dərəcələrinin tətbiq edilməsi bu sahədə problemlərin həllinə müsbət təsir göstərəcək: "Burada əsas məqsəd istifadə olunmayan torpaqların kənd təsərrüfatında əkin məqsədilə istifadəsinin təmin edilməsidir. Söhbət hasarlanmış, kənd təsərrüfatı təyinatından yayındırılan, amma kənd təsərrüfatı üçün yararlı olan torpaqların istifadə edilməməsinə görə vergilərdən gedir. İstifadə olunmayan torpaqlara görə verginin tətbiq olunması tək bizdə deyil, dünyanın bir sıra ölkələrində var. Məsələn, Rusiyada da istifadə olunmayan torpaqlara görə vergi tətbiq edilir.
Torpaq fondu kiçik olduğuna görə istifadəyə verilən torpaqların həcminin artırılması olduqca vacibdir. Burada istifadəsiz qalan torpaqlar da vergi ödəyicisidir. Digər tərəfdən də cərimə tətbiq olunur. Verginin tətbiq olunması istifadə edilməyən torpaqlarda əkin işləri aparılmasına imkan yaradacaq. Çünki bunun məbləği kifayət qədər yüksəkdir. Ona görə də bu addım həmin torpaqların istifadəsini təmin etməyə imkan verəcək".
Vidadi ORDAHALLI
