İldırım Qurbanov: "Onların bu yöndə təcrübəsindən maksimum səmərəli istifadə edə bilsək, qeyri-neft sektorunun inkişafında ciddi nailiyyətlər əldə edə bilərik"
Türkiyə Azərbaycanın əsas ticarət və investisiya tərəfdaşlarındandır. Türkiyə tərəfindən Azərbaycana 10,1 mlrd. dollar, o cümlədən qeyri-neft sektoruna 2,6 mlrd. dollar sərmayə qoyulub. Azərbaycanda 2600-dən çox türk şirkəti fəaliyyət göstərir.
Ölkələrimiz arasında əlaqələrin daha da genişləndirilməsi istiqamətində indiyədək müxtəlif formatlı çoxsaylı tədbirlər keçirilib. Qeyri-neft sektorunun və ixracyönümlü iqtisadiyyatın inkişafı Azərbaycan iqtisadiyyatının prioritet istiqaməti hesab olunur. Türkiyə şirkətləri telekommunikasiya, bank, sığorta, nəqliyyat, qida, tekstil, mebel, tikinti avadanlıqları kimi iqtisadiyyatın, demək olar, bütün sektorlarında fəaliyyət göstərir. Eyni zamanda Türkiyənin inşaat şirkətləri 2003-cü ildən etibarən Azərbaycanda həyata keçirdiyi 350 layihəyə 11 milyard ABŞ dolları həcmində investisiya qoyub. Azərbaycan son zamanlar ölkədə investisiya mühitini yaxşılaşdırmaq üçün önəmli islahatlar həyata keçirir. Belə olan halda, ehtiyac olan sahələrə türk sərmayəsinin yönəldilməsi həmin sahələrin inkişafına müsbət təsir edəcək.
Türkiyənin gömrük və ticarət naziri Bülənt Tüfənkçi də bu günlərdə bənzər fikirlər səsləndirib. Onun sözlərinə görə, yaxın illərdə Azərbaycanla Türkiyə arasında ticarət dövriyyəsinin 15 milyard dollara çatdırılması nəzərdə tutulur.
Bütövlükdə, Türkiyə Azərbaycanın hansı sahələrinə investisiya yatıra bilər və bu həmin sahələrin inkişafında nə kimi rol oynaya bilər?
Məsələyə münasibət bildirən iqtisadçı-ekspert İldırım Qurbanovun sözlərinə görə, Türkiyə iş adamlarının Azərbaycanda kənd təsərrüfatının müxtəlif sahələrinə sərmayə qoymasına daha çox ehtiyac var: "Orada bu sahə üzrə ixtisaslaşan aparıcı şirkətlərin olduğunu nəzərə alsaq, fikrimcə, bunun müsbət effekti olacaq. Söhbət kənd təsərrüfatı məhsullarının becərilməsi, məhsuldarlığın artırılması və bunun emal olunaraq dünya bazarına çıxarılmasından gedir. Azərbaycanda qeyri-neft sektorunun əsasını kənd təsərrüfatı təşkil etdiyi üçün bu sahədə bir sıra işlərin görülməsinə ehtiyac var. Bu baxımdan da Türkiyə sərmayəsi bu işdə mühüm rol oynaya bilər. Məsələn, bir sıra əmək tutumlu sahələr var ki, ora Türkiyə sərmayəsinin yönəldilməsinə ehtiyac var. Bura çayçılıq, günəbaxan, soya kimi məhsulların becərilməsi, emalı daxildir. Parniklərin yaradılması üzrə Türkiyə şirkətlərinin yaxşı təcrübəsi var. Fikrimcə, türk iş adamları ilə bu işin qurulması Azərbaycan üçün səmərəli olacaq və bir sıra məhsullar Avropa bazarına çıxarılacaq. Hesab edirəm ki, türk iş adamlarının bu yöndə təcrübəsindən maksimum səmərəli istifadə edə bilsək, Azərbaycanda qeyri-neft sektorunun inkişafında ciddi nailiyyətlər əldə edə bilərik".
Vidadi ORDAHALLI
