Məlahət İbrahimqızı: "Bu qərar da həmin addımlardan biridir"
Məlum olduğu kimi, Przident İlham Əliyevin tapşırığı ilə ölkədə təbii qaz və elektrik enerjisindən istifadəyə görə güzəştli limitlər artırılıb. Tarif (qiymət) Şurasının yeni qərarına əsasən, əhali üzrə aylıq elektrik enerjisi istehlakı 300 kilovat-saatadək olan istehlakçılar üçün tarif dəyişdirilməyərək 1 kilovat-saatın qiyməti mövcud 7 qəpik səviyyəsində saxlanıb, aylıq istehlak həcminin 300 kilovat-saatdan çox olan hissəsi üçün isə 1 kilovat-saatın qiyməti 11 qəpik müəyyənləşdirilib.
Eləcə də təbii qazın pərakəndə satış tarifi əhali üzrə illik istehlak həcmi 1700 kubmetrədək olan istehlakçılar üçün dəyişdirilməyərək bir kubmetr üçün mövcud 10 qəpik səviyyəsində saxlanıb, illik istehlak həcminin 1700 kubmetrdən çox olan hissəsi üçün isə bir kubmetrin qiyməti 20 qəpik müəyyənləşdirilib.
Görünən odur ki, dövlət başçısı əhalinin sosial vəziyyətini daha düzgün analiz edir. Bu da zamanında və yerində verilən doğru qərardır. Çünki qış aylarında ölkə əhalisinin müəyyən hissəsinin qızdırıcı vasitə kimi məhz elektrik enerjisindən istifadə etməsi bu kateqoriyadan olan insanların sosial vəziyyətinə təsirsiz qalmazdı. O ki qaldı qaz limitlərinin 200 kubmetr artırılmasına, burada da reallıqlar daha çox nəzərə alınıb, nəinki orta bir statistik sərfiyyat.
Bu bir daha belə deməyə əsas verir ki, əhalinin kommunal tələblərinin daha səmərəli ödənilməsində Prezident Tarif Şurası ilə müqayisədə daha dəqiq yanaşma nümayiş etdirir. Sözügedən məsələni dəyərləndirən millət vəkili Məlahət İbrahimqızının fikrincə, Tarif Şurasının elektrik enerjisi və qazın tarifləri ilə bağlı qəbul etdiyi qərar tələsik idi: "Prezident məsələni araşdırdıqdan sonra güzəştlərin artırılması ilə bağlı tapşırığını verdi. Azərbaycan Prezidenti sosial məsələlərə çox həssas yanaşır. Elə bunun nəticəsidir ki, Prezident İlham Əliyevin müvafiq tapşırığı əsasında Tarif Şurasının elektrik enerjisi və təbii qazın istifadəsində tətbiq olunan güzəştli limitin artırılması ilə bağlı qərarı verildi. Ölkə başçısı son qərarı araşdırdıqdan sonra gördü ki, burada müəyyən qədər tələskənlik və məsuliyyətsizlik var. Azərbaycan Prezidenti vətəndaşların sosial rifah halını hər şeydən üstün tutaraq bu qərarın dəyişdirilməsi, güzəştlərin artırılması ilə bağlı tapşırıqlarını vermiş oldu. Bu addım Azərbaycan Prezidentinin ilk addımı deyil. Biz Azərbaycan Prezidentinin həssas məsələlərə necə diqqət göstərdiyinin dəfələrlə şahidi olmuşuq. Bu qərar da həmin addımlardan biridir".
"Təbii qaz və elektrik enerjisindən istifadəyə görə güzəştli limitlərin artırılması əhalinin sosial baxımdan həssas və aztəminatlı təbəqəsinə kömək edəcək". Bunu isə "Trend"ə Milli Məclisin deputatı Rüfət Quliyev deyib. O bildirib ki, limitlərin artırılması sayəsində daha əvvəl qəbul edilmiş tariflərin differensiallaşdırılması qərarı ölkə əhalisinin aztəminatlı təbəqəsinə daha az təsir edəcək.
Deputat əlavə edib ki, bu qərar bir daha ölkə rəhbərliyinin aztəminatlı əhaliyə qayğısını nümayiş etdirir.
"Tarif Şurasının təbii qaz və elektrik enerjisindən istifadəyə görə güzəştli limitlərin artırılması barədə qərarı Prezident İlham Əliyevin əhaliyə göstərdiyi növbəti qayğısıdır". Bunu da "Trend"ə açıqlamasında millət vəkili Musa Quliyev bildirib. Millət vəkili deyib ki, bu addımın atılması onu göstərir ki, cənab Prezident daim xalqının yanındadır, vətəndaşların, aztəminatlı ailələrin sosial müdafiəsini, onların sosial şəraitinin yaxşılaşdırılmasını daxili siyasətində prioritet istiqamət kimi görür: "Hesab edirəm ki, bu çox vaxtında atılmış bir addımdır və əhali tərəfindən də minnətdarlıqla qarşılanır. Bu qərar, həmçinin, cənab Prezidentin qarşıdan gələn bayramlarla əlaqədar əhaliyə xoş müjdəsidir".
"Cənab Prezident İlham Əliyevin verdiyi tapşırıqlar, səsləndirdiyi fikirlər həmişə xalqın sosial rifahının yaxşılaşdırılmasına yönəlib. Təbii qaz və elektrik enerjisindən istifadəyə görə güzəştli limitlərin artırılması dövlət başçısının bu fəaliyyətinin əyani sübutudur". Qeyd olunan fikirləri isə "Trend"ə Milli Məclisin deputatı Tahir Rzayev deyib. O bildirib ki, Prezident İlham Əliyevin bu tapşırığı insanların rifahına xidmət edir: "Prezident həmişə insanların sosial problemlərinə diqqətlə yanaşıb. Təbii qaz və elektrik enerjisindən istifadəyə görə güzəştli limitlər insanları düşündürən vacib məsələlərdən biridir. Cənab Prezident tərəfindən bu addımın atılması ictimaiyyət tərəfindən rəğbətlə qarşılanır".
Deputat qeyd edib ki, dövlət başçısı əhalinin sosial müdafiəsini gücləndirmək üçün daim lazımi tapşırıqlar verir: "Prezidentin bu tapşırığı vətəndaşlara dəstəkdir. Prezident İlham Əliyev hər zaman xalqının yanında olduğunu, vətəndaşların maraqlarını hər şeydən üstün tutduğunu bir daha nümayiş etdirdi".
Vidadi ORDAHALLI
