"Milli valyuta ilə güzəştli ticarət sazişinin imzalanması Azərbaycan iqtisadiyyatı üçün optimal variant deyil"
Bir neçə gün öncə Bakıda keçirilən Türkdilli Dövlətlərin Əməkdaşlıq Şurasına üzv dövlətlərin iqtisadiyyat nazirlərinin altıncı iclası çərçivəsində Türkiyənin iqtisadiyyat naziri Nihat Zeybekçi deyib ki, Türkiyə və Azərbaycan güzəştli ticarət sazişi imzalayacaq. Onun sözlərinə görə, hazırda güzəştli məhsulların siyahısının hazırlanması üzrə işlər gedir.
N.Zeybekçi bildirib ki, sazişin imzalanması 2017-ci ilin birinci yarısında keçirilməsi planlaşdırılan Azərbaycan-Türkiyə Yüksək Səviyyəli Strateji Əməkdaşlıq Şurasının altıncı iclası çərçivəsində gözlənir.
Belə bir saziş imzalanarsa, bunun ölkə iqtisadiyyatına nə kimi təsirləri olacaq?
İqtisadçı-ekspert Samir Əliyev "Bakı-Xəbər"ə açıqlamasında qeyd etdi ki, güzəştli ticarət deyəndə söhbət milli valyutaya keçiddən gedir: "Yəni biz Türkiyəyə mal ixrac edərkən öz milli valyutamızdın istifadə edəcəyik, qarşı tərəf isə öz valyutasından. Bu məsələ uzun müddət idi ki, Türkiyə ilə Rusiya və Türkiyə ilə Çin arasında müzakirə olunurdu. İlk baxışdan qarşılıqlı güzəştli ticarət sizişinin imzalanması cəlbedici görünə bilər. Ancaq unutmaq lazım deyil ki, Azərbaycan neft gəliri üzərinə qurulmuş iqtisadi ölkədir. Neft gəlirlərinin azaldığı bir dönəmdə manat iki dəfə dəyərini itirib. Hazırkı şəraitdə bizə dollar lazımdır. Xaricdən valyuta gəlməsi üçün ixracı stimullaşdırmaq istəyirik. Dollara tələb yüksək olduğu bir vaxtda ölkəyə türk lirəsi və rus rublu gətirmək optimal variant deyil. Nəzərə almaq lazımdır ki, Türkiyə-Azərbaycan ticarət dövriyyəsində kəsir müşahidə olunur. Yəni Türkiyə malları daha çox Azərbaycana idxal olunur. Bu məsələdə Türkiyənin qazancı daha yüksəkdir, nəinki Azərbaycanın. Azərbaycan iqtisadiyyatı üçün güzəştli ticarət sazişi optimal variant deyil".
Həmsöhbətimiz onu da diqqətə çatdırdı ki, güzəştli ticarət sazişi deyəndə vergi və gömrük rüsumlarından da söhbət gedə bilər: "Gömrük və vergi rüsumlarında qarşılıqlı güzəşt sazişi imzalana bilər".
Günel CƏLİLOVA
