Əli Əlirzayev: "Funksional vəzifələri həyata keçirmək üçün daha konkret strukturlar lazımdır"
Ölkədə aparılan iqtisadi islahatların tərkib hissəsi və vergi sahəsində həyata keçirilən islahatların davamı kimi, Azərbaycan Respublikası Prezidentinin "2016-cı ildə vergi sahəsində aparılacaq islahatların istiqamətləri"nin və vergi inzibatçılığının təkmilləşdirilməsi haqqında" 4 avqust 2016-cı il tarixli Sərəncamı ilə Vergilər Nazirliyinə verilmiş tapşırıqların icrası, vergi orqanlarında kadr potensialından səmərəli istifadə edilməsi, eləcə də daha təkmil və müasir idarəetmə menecmentinin formalaşdırılması məqsədilə vergilər naziri Fazil Məmmədovun əmri ilə Vergilər Nazirliyində ciddi struktur dəyişiklikləri aparılıb.
Nazirliyin mətbuat xidmətindən verilən xəbərə görə, Vergi cinayətlərinin təhlili və vergi borclarının alınması Baş İdarəsi və Vergi auditi və operativ nəzarət Baş İdarəsi ləğv edilərək, onların bazasında Vergi qanunvericiliyinin icrasına nəzarət Departamenti və Vergi öhdəliklərinin icrasına nəzarət Departamenti yaradılıb.
Vergi ödəyicilərinə xidmət Baş İdarəsi ləğv olunaraq onun bazasında Vergi ödəyicilərinə xidmət və şəffaf vergi partnyorluğu Departamenti yaradılıb.
Vergilər Nazirliyi yanında Bakı Vergilər və 1 saylı Vergilər Departamentləri ləğv olunaraq, onların bazasında Vergilər Nazirliyi yanında Xüsusi Gəlirlər Departamenti, Vergilər Nazirliyi yanında Lokal Gəlirlər Departamenti və Vergilər Nazirliyi yanında Bakı şəhəri Kiçik sahibkarlarla iş Departamenti yaradılıb.
Ümumilikdə, sözügedən qurumda struktur dəyişikliklərinin əhəmiyyətini ekspertlər necə dəyərləndirir?
Məsələyə münasibət bildirən iqtisadçı-alim Əli Əlirzayev buna müsbət prizmadan yanaşdı: "Bu kimi struktur islahatları vacib əhəmiyyət kəsb edir. Funksional vəzifələri həyata keçirmək üçün daha konkret strukturlar lazımdır. Ən başlıcası, paralelizm aradan qaldırılmalıdır. Departament idarəetmənin bir növüdür. Yəni qarşılıqlı əlaqədə olan ayrı-ayrı vəzifələri bir sahədə birləşdirmək deməkdir. Buna aqreqasiya deyilir. Yuxarı səviyyədən başqa, nazirliyin daxilində müxtəlif departamentlər olur. Yəni həmin təsisatlar birləşdirilir. Departament həm də mərkəzləşdirilmiş idarə formasıdır. Mərkəzləşdirmənin müsbət tərəfləri də var, mənfi tərəfləri də. Yeri gəlmişkən, biz get-gedə mərkəzləşdirilmiş idarəetmə formasına keçdiyimizə görə bu kimi struktur dəyişikliklərinin aparılması lazım idi. Bütövlükdə, idarəetmə strukturlarının formaları əsasən xarici ölkələrdən götürülür. Bunun əsas məqsədləri, vəzifələri, regional aspektləri, tabelilik prinsipləri nəzəra alınaraq, müvafiq strukturları birləşdirirlər. Nəticədə genişlənmiş formada departament yaradırlar. Güman edirəm ki, Vergilər Nazirliyində aparılan struktur dəyişiklikləri müsbət effekt verəcək".
Vidadi ORDAHALLI
