Vüqar Bayramov: "Bir şeyi qeyd etmək lazımdır ki, turizm sektorunda dövlət müəssisələri xidmət baxımından keyfiyyətli müəssisələr kimi qiymətləndirilmir"
Azərbaycanda qış kurortları özəlləşdirilə bilər. Bu barədə Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasının milli iqtisadiyyat perspektivi üzrə Strateji Yol Xəritəsi"ndə deyilir.
Qeyd olunur ki, logistika üzrə özəl sektorun xüsusi çəkisinin artırılması bu sahədə rəqabət mühitini sağlamlaşdıraraq, regional və beynəlxalq turizmin inkişafı üçün də ciddi təkan ola bilər. Azərbaycanda mədəni turizm, sağlamlıq turizmi, ekoturizm, kənd turizmi kimi turizm növləri üzrə tələbatın artırılması və qış turizminin inkişafına dəstək verilməsi kimi islahatların aparılması turizmlə bağlı digər alt sektorların daha da inkişaf etdirilməsi strategiyası ilə bağlıdır.
Turizmin inkişafında özəl sektorun iştirakının genişləndirilməsi istiqamətində atılacaq addımlar sırasında dövlət mülkiyyətində olan Şahdağdakı mehmanxanalardan başlamaqla, qış kurortlarının özəlləşdirilməsi məsələsi də nəzərdən keçirilə bilər. Peşəkar mehmanxana şəbəkələrindən idarəetmə heyətinin cəlb edilməsi və ya mövcud idarəetmə sisteminə əlavə inzibati çevikliyin gətirilməsi üçün özəlləşdirmə potensialı və özəlləşdirmə şərtləri qiymətləndirilməlidir.
Maraqlıdır, ekspertlərin buna münasibəti necədir? Bunun hansı effekti ola bilər? Məsələyə münasibət bildirən iqtisadçı-ekspert Vüqar Bayramovun fikrincə, özəlləşmə həmin sahəyə sərmayənin gəlməsinə, xidmət keyfiyyətinin artmasına müsbət təsir edəcək: "Nəticə etibarilə bu proses iqtisadi sistemin sağlamlaşdırılmasına imkan verir. Həmçinin özəlləşdirmə bu sahədə daha çevik idarəetmə sisteminin yaradılmasına şərait yaradır. Özəlləşdirmə zamanı həm də büdcə vəsaitlərinə qənaət edilir. Digər müəssisələr özəlləşdirilsə, həm də investisiya cəlb etmək mümkün olacaq. Bunun sayəsində həmçinin xidmətlərdə şəffaflığın və səmərəliliyin artırılmasına da nail olunacaq. Ona görə də biz bu prosesin genişləndirilməsində maraqlıyıq. Özəlləşdirilən obyektlərin siyahısına diqqət yetirsək, burada həm sosial, həm də turizm obyektləri olduğunu görə bilərik. Xidmət sektoruna aid edilən obyektlərin özəlləşdirilməsi bir tərəfdən həmin sektora vəsaitlərin cəlb olunmasına imkan yaradacaq, digər tərəfdən isə xidmətlərin keyfiyyət və səmərəliliyini artıracaq. Bir şeyi qeyd etmək lazımdır ki, turizm sektorunda dövlət müəssisələri xidmət baxımından keyfiyyətli müəssisələr kimi qiymətləndirilmir. Xüsusən də turizm və digər sektorların praktik olaraq özəl şirkətlər kimi fəaliyyət göstərməsi daha məqsədəuyğundur. Düşünürəm ki, özəlləşdirmə prosesi, birmənalı şəkildə, sözügedən sektorların sağlamlaşdırılması, inkişafı baxımından xeyli vacibdir. Əmlak Məsələləri Dövlət Komitəsi də çalışmalıdır ki, prosesdə bütün maraqlı tərəflərin və sahibkarların iştirakını təmin edə bilsin. Müəssisələr şəffaf şəkildə özəlləşdirilsə, yeni investisiya cəlb etmək daha da sadələşər. Monitorinqlər göstərir ki, özəl turizm sektoru dövlət turizm sektoru ilə müqayisədə daha yaxşı və keyfiyyətli xidmətlər təklif edir. Düşünürəm ki, özəlləşdirmə bu sektorun inkişafı baxımından xüsusilə vacibdir".
Vidadi ORDAHALLI
