Nazim Bəydəmirli: "Fondun vergi toplama funksiyası Vergilər Nazirliyinə verilsin"
Xəbər verildiyi kimi, Azərbaycanda vergi amnistiyası elan oluna bilər. Belə ki, ölkə başçısı İlham Əliyevin təşəbbüsü ilə bununla bağlı müvafiq qanun layihəsi Milli Məclisə daxil olub. Layihə Milli Məclisin İqtisadi siyasət, sənaye və sahibkarlıq komitəsində müzakirə olunacaq.
Sənədə əsasən, vergi amnistiyası 2017-ci il yanvarın 1-dək vergi borcu olan hüquqi və fiziki şəxslərə şamil olunacaq. Belə ki, qeyd edilən dövrədək vergi borcu olan şəxslər 2017-ci ilin yanvar ayında borcunun 30 faizini, fevral ayında 50 faizini, mart ayında isə 70 faizini ödəyərsə, borcun qalıq hissəsi amnistiya olunacaq. Yəni vergini vaxtından əvvəl ödəyənlərə güzəşt tətbiq ediləcək. Belə ki, yanvarda 30 faiz vergi ödəsən, onun 70 faizi, fevralda 50 faiz ödəsən, yerdə qalan 50 faizi, martda isə 70 faiz vergi borcunu ödəsən, qalan 30 faizi bağışlanacaq. Bu müddət 3 ay üçün nəzərdə tutulub. Dəyişiklik ölkədə kiçik və orta sahibkarlığın, iri biznes sahələrinin inkişafına şərait yaradacaq. Layihə beynəlxalq təcrübəyə əsaslanaraq hazırlanıb.
İstənilən halda, sözügedən qərar iqtisadiyyatın liberallaşdırılması istiqamətində addım kimi qiymətləndirilir. Bununla yanaşı, bəzi ekspertlərin fikrincə, daha düzgün yanaşma ümumi vergi amnistiyası yolu ilə müxtəlif borc öhdəliklərinə fərqli və differensial yanaşmanı özündə əks etdirən bəzi borcların sıfırlanması, digərlərinin isə mərhələli silinməsi olardı.
Maraqlıdır, iqtisadçılar buna necə yanaşır? Sözügedən məsələni şərh edən sabiq deputat, iqtisadçı Nazim Bəydəmirli Prezidentin təşəbbüsünü normal qarşılayıb. Onun fikrincə, borclu iş adamları buna müsbət yanaşacaq: "Böyük vergi ödəyicilərinin büdcə qarşısında kifayət qədər borcları var. Bu borclar aylara bölünüb və təşviq xarakteri daşıyır. Düşünürəm ki, biznes adamları çağırışa müsbət reaksiya verəcək. Amma əsas borclular dövlət şirkətləri olduğundan, bu amnistiyadan da onlar daha çox yararlanmağa çalışacaq. Söhbət "Azərenerji", "Azərsu", AZAL kimi şirkətlərdən gedir. Çünki kiçik sahibkarlığın çoxlu borcu olduğunu düşünmürəm. Fikrimcə, Dövlət Sosial Müdafiə Fondunun ləğvi başa çatdırılmalıdır. Çünki iş adamlarının əsas problemi sosial sığorta haqları ilə bağlıdır. Fondun vergi toplama funksiyası Vergilər Nazirliyinə verilsin. Bir qayda olaraq, pensiyaçıların pensiyası Maliyyə Nazirliyi tərəfindən verilsin. Gürcüstanda bu qaydada islahatlar gerçəkləşdi. Vergilər Nazirliyi özəl sektorla bağlı rəqəmlər açıqlasaydı, daha əhatəli şərh vermək mümkün olardı".
Vidadi ORDAHALLI
