Rəsul Cahangirli: "Azərbaycanda da bankların bu yöndə inkişaf etdirilməsi istiqamətində işlərin görülməsi müsbət haldır"
Bankların rəqəmsal transformasiyasının sürətləndirilməsi üçün tənzimləmə mexanizmi təkmilləşdiriləcək. Bu barədə "Azərbaycan Respublikasında maliyyə xidmətlərinin inkişafına dair Strateji Yol Xəritəsi"ndə bildirilir.
"Yol xəritəsi"ndə qeyd olunur ki, son bir neçə onillikdə qlobal miqyasda bankçılığa dair müştəri gözləntiləri əhəmiyyətli dərəcədə dəyişib. Yeni gözləntilər əsasən fərdiləşmiş və sadə xidmətlərə yönəlib ki, bu da bankların əməliyyat modellərinin effektivlik baxımından transformasiyasına səbəb olub. Ölkədə bankçılığın davamlı inkişafının təmin edilməsi və müştərilərə yüksək keyfiyyətli xidmətlərin göstərilməsi məqsədilə rəqəmsallaşdırma və səmərəliliyin yüksəldilməsinə dəstəyin verilməsi xüsusi əhəmiyyət kəsb edir.
Beynəlxalq təcrübədə bankların standart məhsul yanaşmasından fərdiləşmiş məhsul yanaşmasına keçidi müşahidə edilib. Köhnə sistemdə standart məhsullar (kredit, depozit, sadə əməliyyatlar və ödənişlər) təklif olunduğu halda, yeni sistem ödəniş şərtləri, faiz dərəcələri, nağd əməliyyatlar və s. üzrə yaranmış sonsuz müştəri tələblərinə uyğunlaşdırılır. Bunun nəticəsində bank müştərilərinin rahatlıq, sürət və fərdiləşdirilmiş xidmətlərlə bağlı gözləntiləri dəyişib. Əməliyyatların mobil telefonlar vasitəsilə aparıla bilməsi və sorğuların dərhal cavablandırılmasına dair istehlakçı istəkləri bu dəyişikliklərə nümunə ola bilər. Müştəriyönümlü dəyişikliklər bankların rəqəmsallaşma istiqamətində transformasiyasını təşviq edir. Bankın tam rəqəmsallaşdırmaya nail olması üçün standart əməliyyatlar və sadə məhsullar alternativ xidmət kanallarına ötürülür. Rəqəmsallaşdırmaya tam keçid sektorda əməliyyat risqlərinin azalmasını təmin edə bilər. "Strateji Yol Xəritəsi"ndə 2025-ci ilə qədər bütün bankların rəqəmsallaşdırılması nəzərdə tutulub.
Sözügedən məsələni dəyərləndirən ekspert Rəsul Cahangirlinin fikrincə, bankların rəqəmsallaşdırılması müasir dünyanın tələbidir: "Sevindirici haldır ki, Azərbaycanda da bu istiqamətdə ciddi işlər görülür və qarşıya belə məqsəd qoyulub. Bankların rəqəmsallaşdırılması bu sahədə həm keyfiyyətə, həm də şəffaflığın təmin edilməsinə müsbət təsir göstərəcək. Məsələn, bu gün Böyük Britaniya müasir ödəmə texnologiyalarının tətbiqi baxımından ən qabaqcıl ölkə hesab olunur. Ölkədə təmassız ödənişlər yaxşı inkişaf edib. Mobil hesablaşma və virtual valyutalar da getdikcə daha çox populyarlıq qazanır. Nəhəng banklar isə getdikcə ənənəvi filial və şöbələrdən imtina edir. Maliyyə startapları isə yalnız onlayn mühitdə fəaliyyət göstərməli olan rəqəmsal bankinqin tərəfdarı kimi çıxış edir. Ölkədə artıq bir neçə bu növ müəssisə fəaliyyətə başlayıb. Məsələn, Atom Bank internet vasitəsilə hesablar açır. Ona görə Azərbaycanda da bankların bu yöndə inkişaf etdirilməsi istiqamətində işlərin görülməsi müsbət haldır. Biz dəyişən dünyanın müasir tələbləri ilə ayaqlaşmalıyıq" Vidadi ORDAHALLI
