Nicat Manafov: "Bu qərar haqsız rəqabətin qarşısını almış olacaq"
Artıq xaricdən internet vasitəsilə alınan mallara görə vergi tutulacaq. Bu barədə Vergilər Nazirliyindən bildirilib.
Məlumata görə, Milli Məclisə təqdim edilən Vergilər Məcəlləsində elektron ticarətə dair xüsusi qeyd var. Bu qeyddə xarici onlayn mağazalardan alınan mallara görə ƏDV tətbiqi göstərilib. Vergilər Nazirliyindən bildirilir ki, bu cür yanaşma yerli istehsalçılar və ticarətçilərə qarşı ədalətli addım olacaq.
Məsələyə dair fikir bildirən iqtisadçı-ekspert Oqtay Haqverdiyev qeyd etdi ki, bu qərar internetdən əldə olunan gəlirə mənfi təsir göstərəcək: "Dünyanın əksər ölkələrində onlayn alış-satış xidməti mövcuddur. Biz bu xidmətdən yeni yararlanmağa başlamışıq. Bu sahəyə ƏDV-nin tətbiq olunması bizim ölkə üçün hələ tez idi. Bir neçə ildən sonra belə bir qərar verilə bilərdi".
Biznesin inkişafı üzrə mütəxəssis Nicat Manafov isə hesab edir ki, bu qərar haqsız rəqabətin qarşısını almış olacaq:
"Yerli sahibkarlar elektron ticarət vasitəsilə öz məhsul və xidmətlərini satarkən həm ƏDV, həm də idxalat və gəlir vergisi ödəməli olur. Amma beynəlxalq platformalar isə bunların heç birini ödəmir və nəticədə haqsız bir rəqabət yaranır. Həmçinin beynəlxalq platformalar reklam üzərindən də xeyli miqdarda gəlir əldə edir. Beynəlxalq platformaların bir çoxu "Facebook", "You Tube", "Google" və s. kanalları vasitəsilə reklam yerləşdirir ki, bundan əldə edilən qazancın isə vergisini ödəmir".
N.Manafovun sözlərinə görə, bununla belə, bu qərar bu kimi halların qarşısını ala bilməyəcək: "Düşünürəm ki, bu qərar belə halların qarşısını ala bilməyəcək. Çünki xaricdə yaşayan azərbaycanlıların sayı kifayət qədərdir. Onlar çox rahatlıqla dost-tanışlarının pulunu onların kartlarına yatıracaq. Onlar isə bunu ATM-də nağdlaşdıracaq.
Yenidən o vəsaiti aid olduqları ölkənin (Rusiya, İngiltərə və s.) kartına yatıracaq. Beləliklə, onların dost-tanışları internetdən alış-veriş edəcək. Yaxud da vəsaiti dost-tanışlarının adına virtual kartlara yatıracaq". Həmsöhbətimiz onu da əlavə etdi ki, bu qərar xüsusən alıcıların istehlak səbətinə ciddi ziyan vuracaq: "Onlar ciblərinə uyğun qiymətə istədiyi texnologiya, geyim və s. ala bilməyəcək. Yerli bazarda internetdə satılan məhsulların bir qismi yoxdur".
Günel CƏLİLOVA
