Yaşar Əsədov: "Daxili istehsalın stimullaşdırılması istiqamətində artıq bir ildən çoxdur iş aparılır"
Məlum olduğu kimi, Azərbaycanda 2017-ci il yanvarın 1-dən quş ətinin satışı, eləcə də un və çörəyin istehsalı və satışının 3 il müddətinə əlavə dəyər vergisindən (ƏDV) azad edilməsi planlaşdırılır.
Bunu vergilər naziri Fazil Məmmədov Milli Məclisin İqtisadi məsələlər, sənaye və sahibkarlıq komitəsinin iclasında deyib. Nazir bildirib ki, buğdanın idxalı və satışının da həmin müddətə ƏDV-dən azad edilməsi nəzərdə tutulur.
Qeyd edək ki, 2016-cı ilin yanvarında buğdanın idxalı və satışı, həmçinin un və çörəyin istehsalı və satışı ƏDV-dən azad edilmişdi. Lakin bu güzəştlər ilin sonunadək başa çatmalıdır. Quş ətinin satışı, eləcə də un və çörəyin istehsalı və satışının 3 il müddətinə əlavə dəyər vergisindən azad edilməsi həmin məhsulların qiymətinə, eyni zamanda istehsalına necə təsir göstərəcəyi maraq doğurur.
Bəzi mütəxəssislərin fikrincə, quş əti və unla çörək məsələsində ƏDV-nin götürülməsi qiymətlərin ucuzlaşması və ən pis halda, sabit qalmasına rəvac verə biləcək. Onlar bunu onunla əsaslandırır ki, ötən il ölkədə 98 min ton quş əti istehsal edilib. Hər adam ölkədə orta hesabla 10 kq quş əti istehlak edir. Quş əti ucuz başa gəldiyindən, onun üzərindən ƏDV-nin götürülməsi də orta və aztəminatlı ailələrə böyük köməkdir. 1 kq quş ətinin maya dəyərinin 70 faizi yemdən asılıdır. Azərbaycan yemi əsasən xaricdən idxal edir. Belə olan halda, sözügedən məhsulların ƏDV-dən azad olunması istehsal xərclərinin azalmasına müsbət təsir göstərə bilər.
Maraqlıdır, bəs ekspertlər buna necə yanaşır? Məsələyə münasibət bildirən iqtisadçı-ekspert Yaşar Əsədovun fikrincə, sözügedən tədbirlərin görülməsi daxili istehsalın stimullaşdırılmasına hesablanıb: "Quş əti, buğda, un və çörək istehsalı, satışı və idxalı üzərindən 3 il müddətinə ƏDV-nin aradan qaldırılmasında əsas məqsəd daxili istehsalın stimullaşdırılmasından ibarətdir. Bu addımda digər məqsəd isə daxildə istehsal edilən bu məhsulların rəqabətə davamlılığını yüksəltməkdir. Üçüncüsü, həmin addımla sözügedən məhsulların pərakəndə satış qiymətləri də aşağı düşməlidir. Ardıcıl həyata keçirilən bu kimi tədbirlərlə sadaladığım bu 3 məqsədə çatmaq mümkün olacaq. Daxili istehsalın stimullaşdırılması istiqamətində artıq bir ildən çoxdur iş aparılır. Quş əti və çörək məhsulu, un üzərindən ƏDV-nin götürülməsi də bu addımın davamıdır.
Bildiyiniz kimi, neftin qiymətinin aşağı olması ilə bağlı dünyada iqtisadi durum çox dayanıqsızdır. Ona görə də sözügedən stimullaşdırıcı addımlarla hökumət ölkədə sabitlik mühitini və sahibkarlar üçün proqnozlaşdırılan bir şəraiti daha da gücləndirməyə çalışır".
Vidadi ORDAHALLI
